موظفات الأمن في كليتنا..و من أمن العقوبة أساء الأدب

[*بسمة الجوري*]

"بسم الله الرحمن الرحيم"

السلام عليكم و رحمة الله و بركاته..

كيفكم يا أحلى بنوتات؟!..عساكم بخير و صحة و سعادة؟!..

و كيف الدراسة معاكم؟!..الله يوفقنا و ياكم يا رب..

موضووعي واضح من عنواااانه..موظفات الأمن عندنا لا أخلاق و لا أسلوب راقي في التعامل خصوصاً الطاقم القديم..ما فيهم إلا وحدة أو اثنين اللي تعاملهم كويس و الباقيين ما شفت أسوأ من تعاملهم في حياتي..

كل فترة لازم أطق لي خصمة و مضاربة مع وحدة أو اثنين فيهم بسبب أسلوبهم السئ في التعامل..

إلى درجة إني مرة وصلت الموضووع لأستاذة/ إلهام اللي موجودة في مكتب د/ أنهار و هي اللي وقفت الموظفة عند حدها..

و كان أسلوووبها جداً راقي في التعامل معانا كطالبات الله يسعدها..

و اليوووم تكرر معايا نفس الأسلووب الاستفزازي حقهم-حسبي الله عليهم- و ما كنت فاضية لهم فعديت المووضووع..

بس لو تكرر بكرا-لا قدر الله- ما راح يصير لهم طيب أبداً..

خلاصة المووضووع اللي أنا ابغى أوصل لها..بنات أنا زي زيكم طالبة في هذي الجامعة..أحب أجي الصباح راايقة و مبتسمة و ما أحب أحد يعكر لي مزااجي بس لو أحد عكره ما راح أسكككت له..

و اللي يقهرني أشوووف التعامل السئ من موظفات الأمن مع بعض البنات و البنات-الله يهديهم- يخلوها في نفسهم و يسكتوا..

يا حيااتي..ليش تاكليها و تسكتي؟!..أنا ما أقول لك تخاصمي مع خلق الله ع الصباح..بس أنا كإنسانة أولاً و كطالبة جامعية ثانياً ليا حقوووووق زي ما عليا واجبات و من أبسط حقوووقي إنهم يعاملووني باحترام زي ما أتعامل معاهم باحترام..

و و الله ما خلى هالموظفات يتمادوا و كل وحدة فيهم تتجاوز حدها إلا لأننا سكتنا لهم..

و المثل يقووول: من أمن العقوووبة أساء الأدب..

ليش نكووون أقل من الطالبات الجامعيات في باقي الجامعات و الدول اللي تعامل موظفات الأمن معاهم راقي؟

لييش كل وحدة فينا تسكت عن حقها و تعطي مجال لمثل هؤلاء إنه كل وحدة تتمادى و تتجاوز حدودها؟

يا بنات..هيا شغلتها تنحصر في إنها تشوووف البطاقة الجامعية و إذا ما جبتيها توقعي..و توقعي إذا دخلتي لاب توب و تكلمك بأسلووب راقي لو خالفتي في اللبس و لو كررتيها تسحب البطاقة بأسلووب راقي و ترجعها نهاية اليووم و تستناك إذا تأخرتي في الخرووج..

بس مووو من حقها أبداً إنها تعطيكي ملاحظات أخلاقية أو مواعظ دينية هيا نفسها ما تعمل بها..

و لا من حقها ترفع صوتها عليك أو تستخدم ألفاظ غير لائقة أو تحرجك قدام أحد..و لا من حقها تتأفف لو تأخرتي لأنه واااااجبها إنها تنتظرك و هي مبتسسسمة كمان لأنه من متطلبات وظيفتها إنها تنتظر آخر طالبة تطلع إلى الساعة 5 مساءًبس حاااولي ما تتأخري لأنهم عندهم مسؤوليات في بيوتهم كمان لكن لو حصل و تأخرتي و ما كان المووضووع في يدك فواجبها تستناكِ..

و لو إنها تجاوزت حدوودها معاك أو كان تعاملها مووو تمام من حقك كطالبة جامعية إنك ترفعي ضدها شكوى بس لاااا تسمحي لأحد أبداً يتجاوز حدووده معاك..

لا تصرخي و لا تعصبي و لا ترفعي صووتك و خليكي رااايقة عشااان يصير الحق علييييها..

كل هذا الكلام لا يعني إنه موظفات الأمن كلهم سيئات..بالعكس..الطاقم الجديد فيه بعضهم موظفات أمن ذووووق و تعاملهم رااااقي و بعضهم الآخر نفس الأسلووب السئ القديييم..

أنا و الله مووو متحاملة على موظفات الأمن و في كم وحدة منهم داااقة معاهم صحبة لكن كم موقف حصل لي و حصل لبنات ثانيين كان في تجاوز من موظفات الأمن لحدودهم..

فحبيت أنبه عليها..

عزيزتي موظفة الأمن:

رجاءً..تعاملي معي باحترام كما أتعامل معك باحترام و خلينا حبااايب و خلي لك ذكرى حلوووة عندي عشاآاآان أقووول الله يذكرهم بالخير موظفات الأمن اللي كانوا في كليتي كااانوا قمة في الذوووق و حسن التعامل و الأخلاااق الراااقية..خليني أتذكرك بدعووة حلووة يمكن تكوووني محتاااجتها ذاك الوقت أحسن ما أتذكرك بموقف سئ و تفوووتك الدعوة الحلوة و الذكرى الطيبة..

أختكم في الله:

*بسمة الجوري*

[أمل ممزوج بألم]

حسبي الله ونعم الوكيل
ذكرتني بنفسي زمان قبل اتخرج في ثالث كليه < البغدادية >
كنت جالسه بعد المحاضره مقابل غرفة الطبيبه
وكان اول يوم دوام بعد غياب شهر عن الكليه
وتعبانه مره بس ادوخ ويغمي علي ونزل وزني وقتها خلال شهر 12 كيلو
وكنت لابسه كم قصير حد الكوع
التنوره واسعه وكل شي تمام بس مشكلة الكم
واصلا يدي وقتها كلها موف ولصقات حق الابر والمغذيه
تخيلي جاتني حقت الامن و اصرت اروح العماده
واكتب مخالفه وتصرخ علي كاني لابسه مايوه
واقولها يا حرمه انا تعبانه
خذي جوالي خذي بطاقتي خذي حتى عباتي في نهاية الدوام بجي اوقع المخالف
واقولها شوفي التقارير الطبيه انا تعبانه وجالسه بجنب غرفة الطبيه عشان لو صار فيني شي اكون قريبه
واوريها مكان الابر ولا حست
وانفجر عليها واصرخ وادعي عليها بالمرض اللي فيني يصيبها
وحلفت ما اقوم الا على قبري
وقلت لو تجي العميده ما تحركت من مكاني شبر واحد
لو كنتي بنت ابوك حركيني الحين >>>طبعا بيني وبينك كنت ابكي من القهر والظلم
تخيلي سكتت وراحت وبعد نص ساعه جات وجابت ملف معها اوقع عليه مخالف وبس
بس بجد يخلون الواحد ينفجر عليهم
ومن يومها ما تقرب مني ولا تناقشني
لانه انا اصلا نظاميه وعمري ما خالفت بس ذيك المره لاني كنت تعبانه
وهي اصلا عرفت اني مستحيل اسكت عنها

[ام السوس]

معليش
قوليلي ايش صار معاكي؟

[Mis$ lolo]

والله من جـــــــــــد انا مو نازلين لي من زور

واستنى بس احد يكلمني فيهم والله ماسكتلهم .. مابقى الا هم ..


لازم بعد 2 ماتجلسي بالكليه لا لازم تروحي عند البوابه هناك حتى لو مافي كرسي

قلك مسوووين فيها نظااام .. وياطالبه وياطالبه .. واوااامر ..

[batah]

المشاركة الأصلية كتبت بواسطة أمل ممزوج بألم حسبي الله ونعم الوكيل كنت لابسه كم قصير حد الكوع التنوره واسعه وكل شي تمام بس مشكلة الكم واصلا يدي وقتها كلها موف ولصقات حق الابر والمغذيه تخيلي جاتني حقت الامن و اصرت اروح العماده واكتب مخالفه وتصرخ علي كاني لابسه مايوه لانه انا اصلا نظاميه وعمري ما خالفت بس ذيك المره لاني كنت تعبانه

الكم الين الكوع ممنوع لييييش

في السليمانيه عادي تلبسي نص كم او ربع كم حتى محد يكلمك