[نانا ...]

مرحباا .. انا فاتحه موضوع بقسم المنتظمين ووضحت فيه كلام الاستاذه وبنسخه هنا عشان الكل يستفيد (بعد اذنك صاحبة الموضوع) ..

السلام عليكم جميــعا ...

شكرا لكل من رد على الموضوع ..

بالنسبة للناس الي تقول ان هذي اشاعات ، اكيد انها من جامعة عبدالعزيز لانه ما قالوا هالكلام عندكم
لكن عندنا بالكلية الاساتذات بانفسهم هم الي جابوا الورق وقالولنا ع القرار الخنفشاري !
يعني مو معقوله حيكون كلام فاضي وفيها ورق رسمي وتوقيع ....

عموما المهم والاهم الان انه :

جاتنا الاستاذه يوم الاحد حقت الانقلش وبعد طبعا ماسمعت ردود فعل البنات واللخبطة الي صارت وفهمتنا ع الموضوع واقنعتنا فيه وان شاء الله انه يكون صحيح لانه ارتحنا من بعد كلامها

ايش حكاية الموضوع ياحلوات .. انه انتي الحين اهم شي تجتازين هذا الترم المستوى الاول وتنجحين فيه باعلى الدرجات قد ماتقدرين ... الترم اللي بعده حيكون منهجك حق المستوى الثاني بما انك اجتزتي الاول .. كمان لازم تعدي منه وتنجحي باعلى الدرجات قد ماتقدريين ..
بكذا نهاية السنه تكوني اخذتي مستويين وناجحه فيهم ، وبالتالي معدلك راح يرتفع كثيير لانه الانقلش يأثر في رفع المستوى ..

بعدها لمن تقدمي للتخصص ان شاء الله رغباتك رح تكون متاحه(لانه معدلك عالي بتأثير الانقلش+ انك اجتزتي مستويين بالانقلش) .. بعكس اللي رسبوا في المستوى الاول او الثاني راح تكون التخصصات المتاحه لهم هي الدين والعربي والجغرافيا والتاريخ ...

يعني الورق طلع للي ما اختبروا مثلا .. او حاسين انهم يقدروا يمشوا في الثاني والثالث
هما اكيد درجاتهم بتكون اعلى لانه بيحلوا اكثر من الاول في الاختبار (الموحد) بس مو معناته انه احنا مالنا نصيب ..يمكن نجيب شي بالصدف في الاختبار ونوصل لدرجاتهم

هذي زبدة الموضوع ...

عموما الكلام مبدئيا صار مريح ... يعني الحين يبقى دورنا انه نجيب في الاختبار اعلى درجات

معليش طولت بالحكي لكن حبيت اوضح للبنات مثل ما توضح لي ....