[Imani]

موضوعك ينقصه الحسّ الكوميدي بصراحة هو اقرب للتقليل والمسخرة من الطرف الآخر بس عادي عادي راح اخليك تعبري مش راح اعترض عليك واطالب بإزالته بس انصحك بقراءة اعمال كوميدية ومسرحيات والاشتغال على حسك الفني الفكاهي


اما عن الموضوع، اتسائل والله لمتى المجتمع هذا بيضل حشري ويتدخل في كل صغيرة وكبيرة، ستايل الشعر واللبس اهون بكثير من الانحرافات اللي بتصير في البلد ومجتمع الجامعة بالتحديد زي المخدرات والتدخين والشذوذ الجنسي والمغازلات وغيره الكثير الكثير

طبعا لانه الكدش حارق رزك وقارف جلالتك وعظمتك ما قدرتي تتكلمي عن اي مشكلة من اللي فوق ومسكتيه هوه وبس، اعرف اشكالك ناس يحسّبوا انهم هما افضل واحسن واجمل شيء وغيرهم يحتاجون مساعدتهم لإزالة وتعديل وتغيير طبائعهم وافكارهم وتصرفاتهم، بس احبّ اقولك بصدق النظرة السطحية هذا مابتفيد في شيء بتزيد الكراهية من جانبك وجانب الاطراف الاخرى اللي تدخلتي في شؤونهم وحرمتيهم من حريّاتهم، حمدلله ياربي كثير ناس شهدوا لي بالاخلاق والثقافة وسعة الاطلاع تخيلي لو سووا زيّك وحكموا علي من شكلي الظاهر وشعري؟ يا الله قد ايش نظرة سطحية!!

خذيها من الاخر انتي طالبة زيّك زي غيرك اهتمي بشؤونك وخليك في نفسك، نظام الوصاية هذا ماله داعي، انا شعري غجري (ناعم بس مموج) والان قصير واحب اتركه على طبيعته لاني ألبس لنفسي وآكل لنفسي ولا عمري باهتم بكلام الناس لان كلامهم لا يجيب ولا يودي

اما اذا كنتِ بتعتقدي ان كل بنت شعرها قصير فهي على طول = مسترجلة فصراحة مصيبة! لانك كذا بتظلمي وتسيئي الظن في كثييييييير بنات مالهم في الطبخة إلا ان شعرهم بالفطرة كان كدش، وعموما ماراح استغرب ولا استعجب ما كل الناس هنا بتحكم من الظاهر والشكل وانتي وحدة منهم عادي.. كل الدول المتقدمة بتترك المراهقين يعبّروا عن انفسهم من خلال ملابسهم وشعرهم وشكلهم بصفة عامة لانها حاجة نفسيّة نوع من اثبات الوجود ومافيها شيء ابــــدا إلا العرب من اكبرهم لأصغرهم يحبوا يقمعوا الصغار والمراهقين بعدين يصيروا ينفّسوا عن انفسهم المراهقين بعيدا عن رقابة المجتمع وبطريقة خاطئة وهادمة وساعتها ما ينفع الصوت للأسف..




مراهقات يابانيات في شارع الموضة

اتوقع لو عملنا انا ومجموعة من البنات زي كذا cosplay في الشلال راح ينقدنا كثييييير ويجوا زي الهمج يطلوا ويتريقوا ويضحكوا لانه كثير ناس فاضية وتحارب الفرحة والمتعة وبعدين نقول ليه اولادهم احسن من اولادنا؟ ليه بلدهم متطورة اكثر منا؟ لان عقلياتهم ارحب واوسع منكم، لان المجتمع احتضنهم وخلاهم يعيشوا يوم بيومه وحبّوه وحسوا بالانتماء مو حاربهم ورفضهم واملى عليهم قوانين صارمة واعتبرهم شواذ وخارجين عن العرف المقدس!! ماراح انسى طوال حياتي كيف كانت المدارس الحكومية والتفتيش على الاظافر والشعر كأننا بكلية عسكرية ولا تلبسي جزمة بيضاء هاتي سوداء واحاول افهمهم اني ما اقدر اشتري اسود لاني ما احبها والبيضاء البسها في كل مكان وبيكون اكثر اقتصاد ليّه وما توافق ولا تتفهم المديرة حالتي المادية وتعتبر نقاشي هذا وقاحة!! ههههههه من جهتي ماراح انسى ابدا كيف كانت المدراس الخاصة كل شي مسموح فيها بما انه بفلوس فعلا مجتمع متناقض قوانين على البعض والبعض لا!! اتوقع لو كان ستايل الكدش محصور على الامراء فقط ما كان امديكم تفتحوا فمكم بكلمة وتقولوا "الحق" و"النصائح الذهبية".


http://www.skaau.com/vb/showpost.php...&postcount=165