[طموح إعلامي !!]

بسم الله الرحمن الرحيم



السلام عليكم ورحمة الله .. صباحكم / مسائكم خير ورضا وسعاده ."


إخواني وأخواتي .. الطلبة .. // طلاب جامعه الملك عبد العزيز ..



كل عام وانتم بألف خير يارب ..


بصراحه .. ماني عارف كيف أبدأ موضوعي .. وأنا أتحسر ع ما حدث في مدينتنا الحبيبة جده خصوصا اني ماني من أهلها .. لكن ليا حبايب كتيرين فيها ..


لكن نقول .. قدر الله وماشاء فعل " ورحم الله أمواتنا وأموات المسلمين .. وتغمد الله الشهداء بواسع رحمته ..


إخواني الطلبة ..


نظرا لما حدث مؤخرا في جامعتنا والطرق المؤدية لها .. والتفاصيل المملة والتقارير في كل مكان ع صفحات الانترنت والتصاريح اللي سمعناها وقريناها من سعادة مدير الجامعة د/ أسامه الطيب والجرايد اللي بنقراها .. والأخبار اللي بنسمعها بعد كل فترة والتانية .!!


نبغى نحدد مصيرنا بأنفسنا ..




الدراسة والاستفادة ف الأول والأخير لنا إحنا .. واحنا المستفيدين والمتضررين ف المقام الأول .. وفي ناس من جد ما تفكر فينا ..!!



كيف يطلبوا مننا الحضور والدوام .. ف ديك المنطقه ( الجنوب ) والدفاع المدني .. أمر بإخلاء المنطقة اللي هناك وبعدين هادي مشكلة لأهل جده ..



دا كمان غير الأضرار اللي لحقت بالجامعه نفسها ولو تبغو الصور انا مستعد انزلها لكم والأخوان ماهم مقصرين ف كل موضوع موجود التقارير والصور مرفوعه مايحتاج يعني ..



ايش زنبنا إحنا الطلاب اللي من برة منطقة جده .. فين نروح وفين نسكن .؟؟

الكلمة دي حطو تحتها الف خط .. !!!!!!!!!!

إحنا السكن حقنا ف ابرق الرغامة .. اللي انتو عارفين انها ف مكان الخطر .. وشفتو الضرر اللي لحق بالأماكن القريبة منها وكمان بديك المنطقة ..اقرب مثال " قويزة " وحتى السكن حقنا اتعدم .. وصلني خبر بس مني متأكد منو



فأنا أبغى أفهم إزا أهل جده اللي ساكنين هناك الدفاع المدني خلاهم يخلو المنطقه .. إحنا نروح بنفسنا للتهلكة .!! ؟؟


أنا بصراحه أهلي ماهم عايفيني . !! ولا أنا عايف عمري .!! ولي اودي نفسي ف وقت أقدر أنو بكلمتنا الجماعية نقدر نخلي وقت تاني ..



وماشاء الله ما اتقطعت الجامعه ازا اتاخرت الدراسة اسبوع الين ما يتأكدوا من انو ما في شي حيصير .. وف الأول والأخير زي ما قلت .. احنا المستفيدين والمتضررين ..



فأتمنى انو كل واحد يفكر بعقلانية . وبدل ما يفكر ف نفسو يفكر ف الناس التانية .. اللي هما عندهم أكتر من سبب .!!



يا اخونا يا حبايب .. يا عاقلين .. أتمنى تفكرو .. واللي مأيد دا الكلام .. يصوت معايا عشان يتسمع صوتنا ويوصل للمسؤولين ويحسو فينا ويقدرو المعاناة اللي يحنا فيها ..!!


أنا هنا والشباب من المدينة بصراحه اهالينا خايفيين علينا .. فين حنروح .؟ وليش ما الله كاتب علينا الشقى كلها الين تنتهي الأزمة بالكتير .. يعني ما وقفت الدنيا ولا اتعطلت مخططات ولا ولا .. !! بالعكس هوا دا الصح .."



ابغاكم تتفاعلو معايا ف دا الموضوع .. وخاصة الناس اللي من برة جده .. وساكنين ف سكن الطلاب .. فين حنرووووح يا عالم .. ؟؟؟



أقل شي ألف صووت عشان يترفع صوتنا ويتسمع


وتفكر الناس ف اللي نقولو واللي عندو اضافات يشاركنا أزمتنا .. لأن الموضوع مو هين زي ما تتخيلو خاصة انو متوقع هطول أمطار جديدة ع جده ف الأيام القادمه .. الله يعينكم يا أهل جده والله يعينكم ي طلابنا .. وكل سنة وانتو طيبين ..


.
.
.
.
.
.

أخوكم // طموح إعلامي !!