[عبدالرحمن اليحيان]

بسم الله الرحمن الرحيم

السلام عليكم ورحمة الله وبركاته ... وبعد
أخواني واخواتي الكرام مدري وش أقولكم صراحه . أول مره بصدق احس بظلم لي من قلب

يعني تخيلوا ماصدقت على الله يصير فيه انتساب بالجامعة ذي وفرحت العام وماحصلي انتساب وخططت على هالسنه , واقوم واقدم عن طريق النت وأطبع أوراقي وكل شي خلاص بوديها عن طريق الـDHL ومابقى الا خطاب موافقة جهة العمل فقط وكنت ضامنه وحاطه بالجيب لأني أقول لنفسي مستحيل احد يوقف بوجهك في طموحك وسبيل دراستك الا واحد مريض نفسي .
المهم واكتب المعروض واوديه لرئيس القسم وافادني بالموافقة وأخذ الخطاب مجراه الين وصل الى المدير العام على الاداره وقابلني بالرفض القاطع بحجة ان التخصص اللي انا ابيه علم اجتماع او علم نفس وماراح أستفيد منه ، ولا يتوافق معك في تخصصك بالعمل الحالي .
يابن الناس عدل بدل الرجال صادق بكلامه ولا بس يمزح !!!
قال هذا اللي عندي . حسيت ان الدنيا صكت بوجهي .
يعني لازم يجي احد ينغص على عيشتي حتى الدراسية بعد
المهم واتعوذ من الشيطان الرجيم واستغفر الله وقلت زين وش المطلوب يااستاذ عشان يتوافق مع تخصصي ، جاوبني وفي داخله يبغى يصعب علي الأمور قال اذا تبي انجليزي E ممكن اوافق .
جاني زي الهيستيريا قلت انجليزي عاااد ؟ قال احمد ربك
المهم رديت برد سريع وحازم وبحماس واصرار نعم انا قدها وراح ادخل انجليزي وبتشوف الايام بيننا


بصراحه الحين انا ابي فزعتكم وابي مشورتكم ونصايحكم اللي توجهونها لي تكون سديده لكي يزيد طموحي واخذ الشهاده وارزها بوجهه بعد اربع سنوات عشان يعرف العناد كيف :
1 ـ هل هناك تخصص E انجليزي بالجامعة عن طريق الانتساب وهل له شروط .
2 ـ هل تتوقعون واحد مثلي اللغه شوي داج فيها بس مقدمات بسيطه يمكن يعدي الاختبارات .ووش اصعب شي في التخصص هذا
3 ـ راح اكثف دوراتي وادخل معاهد ومدرسين خصوصيين عشان اطور قدراتي تتوقعون بتفيدني بشي ولا ماراح يحتاج .
4 ـ بصراحه اعلنت الحرب عليه وبفكر بالأربع سنوات القادمه اكرسها لدراسة الانجليزي مو عشاني وبس الا عشان اعاند هالمسؤل واعلمه منهو انا بشهادتي وعلمي .

ملاحظه :
ياليت من الاخوان والاخوات مايبخلون علي بالنصايح وخاصة اللي الان يدرسون تخصص E ضروري لاتخلوني ينقتل حلمي واصراري ، بجد ابي فزعتكم


ولكم تحياتي