رد: الي يبي أجر يدخل يساعدني
ما شاء الله تبارك الرحمن الأخوان كلهم ما قصروا في ردودهم ولكن ودي اضيف بعض الإضافات اللي اشوف انها ان شاء الله راح تساعدك بإذن الله تعالى واتمنى انك تطبقينها في حياتك الواقعيه وراح تشوفين فائدتها بإذن الله تعالى :
اولاً : التوكل على الله تعالى حق التوكل في كل شي ليس في الدراسة فقط ولكن في كل شي و اعلمي أختي ان الله سبحانه وتعالى وحدة هو الذي يقدر كل شي ( قدر الله ما شاء فعل ) ولعل حمل المادتين هذي فيه خيرة لك في ان تشدين حيلك بالمرات الجاية وتعطين المذاكرة وقت اكثر شوي وتركيز اكثر شوي وانتي عارفة ما تدرين وش الخيرة فيه .
ثانياً : نسيان ما مضى في الترم الماضي واعتبار انو اللي حصل لك شيء عادي واقل من عادي يحصل لكثير من الطلبة والطالبات وليس لك انت وحدك مع انو عندك فرصة مو بس انك تنجحين بالماديتن هذي بالعكس الا عندك فرصة تنجحين فيها وترفعين معدلك بعد ومثل ما قالو الأخوان حاولي ما تفكرين بالنجاح بس ولكن فكري كيف تكون درجتك عالية
ثالثاً : حاولي بقدر المستطاع انو ترتبين وقتك تخصصين وقت اكثر للمذاكرة حوالي قبل الإختبارات بشهر ونصف إلى شهرين انك تبدين بالمذاكرة لو بالشي البسيط مع معرفة جدولك وموادك المطلوبة عليك والمناهج مع التأكد من المناهج بأنها نفس المطلوبه عليك مع التأكد وش المطلوب وش المحذوف عليك في المواد اللي بجدولك
رابعاً : قبل بداية المذاكرة اقري آية الكرسي والمعوذات والأدعية الموجودة في الورد وتوكلي على الله سبحانه وتعالى وقولي ( ربي اشرح لي صدري ويسر لي أمري واحلل عقدة من لساني يفقه قولي ، بسم الله الفتاح ، اللهم لا سهل إلا ما جعلته سهلا وأنت تجعل الحزن متى شئت سهلا ) ( اللهم إني توكلت عليك وأسلمت أمري إليك ) وبعدها سمي بالله وابدي ذاكري من دون انك تضغطين نفسك في التفكير بأمور غير المذاكرة وذاكري وانتي مرتاحة وبنفس زينه وعلى مهلك .
خامساً : ليش هذا كله اللي مسويته في نفسك ؟؟ تراها مجرد حمل مادتين لا اكثر ولا اقل يعني شي عادي جداً ليش انتي معطيته اكبر من حجمه اوكي صح يمكن ضروفك والرسوم اللي سببت لك الضغوط هذي ولكن ما افكر في الانتحار والعياذ بالله واعطي المسألة اكبر من حجمها الحمدلله انو المصيبة ماهي في الدين ولا في الصحة والعافية ( اللهم لا تجعل مصيبتنا في ديننا ) انتي اجلسي بينك وبين نفسك وقولي الحمدلله على نعمة الاسلام ونعمة الصحة والعافية وبعدين تهون عليك حمل المادتين وتدرين انها شي اقل من العادي وبعدين الحمدلله يمديك تعوضين وبكل بساطة بس اهم شي خلي املك بالله كبير دايم وفي كل شي وليس في الدراسة فقط ولا تنسين الدعاء ثم الدعاء ثم الدعاء بالتوفيق والنجاح .
سادساً : اوكي عرفنا انو والدتك زعلانه منك وكذا بس انتي في ايديك اسعادها وارضائها وانك تقومين بالتفكير بعقل وواقعية وهي انو ما راح شي ياربي لك الحمد لا انتي اول وحده حاملة المادتين ولا انتي اخر وحدة وبإمكانك التعويض مثل اكثر الزملاء في الاترام القادمة بإذن الله تعالى مع انك اكيد الحين عرفتي نظام الجامعة وطريقة المذاكرة وكل شي بإذن الله اصبح سهل عليك لأنو معروف الترم الأول هو اللي يكون صعب شوي لأن الأنسان لما الحين ما بعد تعود على نظام الجامعة وطريقة المذاكرة والإختبارات ولكن الحين انتي ولله الحمد عرفتي الانظمة وطريقة الجامعة وطريقة الأسئلة وكل شي يتبقى عليك المذاكرة واعطاء كل مادة حقها في المذاكرة وعدم اهمال أي جزء يكون مطلوب عليك في المادة .
سابعاً : اعرفي انو بعد اجتهادك بإذن لله يتبقى عليك التوكل على الله في كل شؤونك وبإذن الله الواحد الأحد بعد الأجتهاد انو راح تشوفين كل ما يسرك من نتائج مرضية وجميلة ومن سعادة في نفسك وايضاً سعادة لوالدتك وكل من حولك .
هذا ما اردت ان اقوله واسف ع الإطاله واتمنى لك وللجميع التوفيق والنجاح في الدنيا والآخرة
وان شاء الله تبشرينا الترم الجاي انك عديتي جميع المواد انتي وجميع اخواننا واخواتنا الطلبة وان شاء الله نشوف نفسيتك عالي العال اللهم آمين .
تحياتي للجميع ،،
|