وعليكم السلام
أنا جديده في المنتدى فيا ريت ترحبو فيا
أختي حلم و طموح ما شاء الله عليك اسم على مسمى
أول شي اتمنى لك من قلبي التوفيق والتيسير في حياتك العلميه والعمليه
والله ينور دربك ويعوضك باحسن من ما تتمني ياااااااااا رب
تاني حاجه واللي عشانها سجلت حابه اوضح لك شغله معينة
أنا من يين السبعين تقريبا اللي دخلو اختبار المعيدية في ام القرى واكتر
من كدا متخرجه منها
أمس طبعا شفت الاسماء اللي انقبلت ولقيت اغلبهم من دفعتي ما شاء الله
سواء بنات دكاتره او لا ودعيت لهم
بنات الدكاتره هدول أنا درست معاهم ولقيتهم والله قممممممة في الشطاره والنباهه والابداع والتواضع
أنا متخرجة العام والأولى على دفعتي والتالته والرابعه وغيرهم من المتفوقات بنات دكاتره الله يحميهم
فما يصح ابدا تربطو نسب البنت بعقلها ومؤهلاتها اللي الله فضلها بيهم
في من بنات الدكاتره من هي أحق مني ومن مئات البنات بالوظيفه والدراسه لأنها ببساطه
طالبه للعلم وللوظيفة زينا ومهي اقل مننا في شي عشان تحتاج ابوها ولا عمها
وزياده تاكيد لكلامي بنت دكتور معروف عندنا في الحاسب كمان دخلت معانا اختبار
المعيدية وللمرة التانيه واسمها ما زال خارج القائمه
ليه ما نفعتها واسطه ابوها بدل التعب دا كله وانتظار السنوات؟
البنات االلي انقبلو من اللي اعرفهم انقبلو عن جدااااااره
والجامعه بصراحه قبلو اللي جابت اعلى من 60% فلا تحكمي على نفسك
وانتي ما تعرفي نتيجتك بالضبط
كان بامكانهم يدخلوكي في القائمه وبعد المقابله ياخدو بنت الدكتور ويكملو مسرحيتهم
اتمنى تسامحيني عل لهجتي اللي ممكن تعتبريها قاسيه بس والله انا اتكلم من واقع عشته
اربع سنوات بين هدولي البنات فحررراااااااااام من جد اننا نظلمهم
ولاني عشت دور بنت المعلمه في المتوسط وتاذيت من النظره الظالمه للبنات
وبعض الاستاذات الله يهديهم مع اني في وادي وامي في وادي
يا اختي ممكن دحين اي احد يقرا كلامك يروح يخش موقع ام القرى ويشوف بنات الدكاتره
وينشر الخبر انهم دخلو بواسطة ويصير عليكي وزره ووزر اللي نقلو الخبر الى يوم الدين
كون الاسماء متتطابقه ما هو اثبات لازم نكون شاهدين على اللي نكتب وعندنا حجة وبينة
(فتبينوا أن تصيبوا قوماً بجهالةٍ فتصبحوا على ما فعلتم نادمين)
أرجو تسامحيني مرة تانيه بس والله معتبرتك اخت ليا
الله يوفقك وييسر لك دراستك ووظيفتك وكل امورك