[itx005]

رحت الجامعة اليوم و أول ماصلت رحت عمادة الدراسات العليا وصلت الساعة 9 إلا وفتحوا الباب حق الغرفة اول ماوصلت أصلا ماكان في أحد غيري ودخلت لقيت 3 موظفين محترمين سلمت عليهم وقالوا لي أيش التخصص قلت لهم حاسب وطلب اسمي وقعد يدور في الأوراق وبعدين راح وطلع مجموعة أوراق بأسمي وسألني طبعا عن اللغة قلت له لسه ما اختبرت واعطاني ورقة قبولي ولقيت عندي مادتين تكميلية :

• Computer Organization
  
• Database 1

قلت له يا بو الشباب هادي المواد درستها لما حفروا البحر وانا خريج من عندكم ومن قسم الحاسب !!!!
قل لي الكلام دا تقولوا للكلية تبعك راجعهم ويمكن يعفوك منها قلت له خير ربك يسهل أما بالنسبة للغة عندك فترة ترمين تحاول تجيبها ترم تبع موادك التكميلية وترم تقدر تأجله ، وخرجت دغري على الكلية و رحت للمرشد الأكاديمي تبعي لقيتي في وجهي أول ماطلعت و شرحت له وضعي ايش قلي؟
قلي دي المادتين انتا ما جاوبت فيهم مضبوط في الاختبار عشان كده نزلنا لك هيا، انا خبصت في Operating system أكتر من اي شيء تاني بس مشي الحال قلي شوف روح للمدرسين حقين المادة واتكلم معاهم يمكن يعفوك.
الصراحة ما حصلت غير مدرس قواعد البيانات الصراحة كان جدا محترم اتكلمت معاه و وريته الترانس سكربت تبعي وبما اني عندي شهادة أوراكل و خبرة قلي انتا رايح تضيع وقت لو درست معايا الكورس دا وانا ممكن أعفيك بس يوافق مدير القسم قلت له خير ويعطيك العافية.

وخلينا نشوف ايش يصير الأسبوع الجاي و ربنا يسهلها
بس ماكان في أي تعقيد ولا مشكلة مدري يمكن رحت في وقت كانت الدنيا فاضية ؟!