[white sugar]

الاخ اللي بيشتكي من اخلاق المراقبين وحراس الامن
والله انك صادق
مو بس عندكم الشباب .. حتى عندنا بقسم البنات
ياخي تقول مغصوبين عالشغل
المراقبات حدث ولا حرج عن اخلاقهم ..
اما حارسات الامن او بالاحرى ( البوابات) اخلاقهم مو بس زفت ، لسة يمكن الزفت انضف منها
بالذات اللي عند البوابة الغربية 1 كان نفسي اقوم الطشها
كل شوية داخلة وخارجة تصرخ (دقوا على اهاليكم .. استعجلوا اهاليكم .. احنا مو فاضينلكم نجلس نستناكم الين ما تمشوا .. احنا محنا مسؤولين عنكم) نعم يختي اجل بتاخدي راتب ليش إن شاء الله ، اصلا المفروض من الجامعة ينزلولهم قرار مافي وحدة تمشي الا لما يمشو كل الطالبات .. وبعدين الغلط اصلا منهم فجداولنا الاختبار مدته الين 10 وطلعونا 9 ونص يعني المفروض يستنوا الين 11
دا غير اللي بيسوقوا الجولف كار بعضهم مو كلهم
اتخيل وانا داخلة من البوابة الغربية اللي ذكرتها اشرتلها وهيا جاية ناحيتي ( بما انوا اختباري كان بمبنى 420 وهوا في الناحية التانية من الجامعة وما ابى اتاخر ) تقوم تهزلي راسها لا .. هادا والسيارة فاضية ما فيها الا وحدة طالبة.. والله طقيتها مشي ، مشي مين قول جري كاني فسباق المراثون عشان الحق عالاختبار
لا وفوق دا كله لما جيت خارجة من المبنى اشرت لوحدة من السيارات طلعت نفسها واقلها البوابة الغربية تقوم تقلي لا .. هيا ايش رايكم فقلة الحيا وهيا على طريقها المشكلة

عالعموم انا اخذت رقم السيارة اللي هيا شغالة عليها واسم الديك الرومي اللي قاعدة عند البوابة وراح اوصلهم لمدير الجامعة .. مو فقسم البنات لا عند الاولاد لاني لما سالت قالولي عندكم فقسم البنات ماراح يسوو شي روحي لقسم الاولاد .. خليهم يعرفوا ان الله حق