[Dr~NanoOok]

المشاركة الأصلية كتبت بواسطة miss-rahaf شكرا شكرا لكل من مر هنا وكتب حتى لو بسيط كل الشكر لك dr~nanoook بجد اجااباااتك روعه وحمستيني متى تبدا الدراسه والموضوع بجد حلوو .. نفسي بجد لمحاضرات العملي ^_^ احسها تكون ممتعه بس عارفين اليوم جالسه محتاره احس ندمت لو حطيت الرغبه الاولى طب بشري :( كلمت وحده من صديقاتي في الطب البشري وتقولي لو حطي الرغبه الاولى الطب البشري عشان اضمن مستقبل بعد كذا .. لآن الاسنان يكون محدود التخصص والوظايف اقل ايش رايكم انتم يا اعضاء؟

لسه واحدة من الدكاترة الجداد بطب الأسنان أرسلتلي رسالة.. و انها مترددة في التخصص
ورديت عليها..

وحبيت أشارككم هو وعن مشاعري لتخصصي الأسناني الحبيب

~

سبحان الله.. جيتي تسأليني هذا السؤال.. وأنا عشت هذه التجربة بالتفصيل
وتقريبا أكثر من العديد من بنات الأسنان..
ليش؟ طيب أنا أحكيكِ

أول سنة بالجامعة.. وقبل ما أدخلها.. كان طموحي الطب البشري
لكن قدّر الله لي اني ما أقدر ادخله.. ودخلت العلوم الطبية التطبيقية أول سنة
وما كنت حاطة في بالي طب الأسنان أبدا
لكن لما جا وقت التحويل.. حطيت طب الأسنان من الرغبات
وتوكلت على ربي

وسبحان الله قبلوني في التخصص !
مع ان التحويل للأسنان ولأعلى كلية مرره صعب وما توقعته يصيرلي
لكن خييييره من ربنا وحكمته

وأكون صريحة معاكِ.. بالبداية ماكنت فرحانه بالقسم وما كنت أعرف عنه اي حاجة << وهذا سبب عدم حماسي ليه وحبي بالبداية

لكن لأني استخرت ربي.. وهو اخترالي هذا الطريق.. حاولت أرضى بقسمته ليا
وحاولت أكتشف عالم الأسنان

قبل ما أداوم بالجامعة.. صرت أقرأ وأسأل عن طب الأسنان قد ما أقدر
الين لما بيدت سنة تانية.. وصراحة بنات الأسنان كانوا قمممممة في التعاون والمحبة.. وما حسسوني حتى اني محولة عندهم وجديدة عليهم

وبسنة ثانية ماعندنا غير مادة واحدة أسنان والباقي كلها مواد طب بشري
<< يعني عشت حلمي الأول بالطب البشري الحمدلله ^^

وهذه المادة الأسنانية خلتني أتعرف على عالم الأسنان وحببتني فيه أكتر وأكتر

وما تجي نهاية سنة ثانية إلا وأنا حابتها من قلبي !
وان الأسنان صار هو عالمي وحياتي!

حتى لو تلاحظي ردودي السنة اللي فاتت بالمنتدى.. حتشوفي قد ايش حبييييت الأسنان

,

واللآن وبعد ما خلصت سنة ثالثة أسنان
وهي السنة اللي تعتبر البداية الحقيقية في طب الأسنان
عشقت تخصصي ! نعم بمعنى الكلمة.. حبيت الشغل العملي و فكرة انه حيكون عندي عيادة خاصة بيا في سنة رابعة والمرضى الخاصين لي
و الشغل اليدوي والمهارة فيها
فطب الأسنان هو فن من جد !

ومين يعرف طب الأسنان ويعيشه.. حيحبه
ولأن أغلب الناس ما تعرف ايش هو طب الأسنان وانه فقط مخصص للأسنان وبس وانه ممل
أبدا مو كده.. وتصورهم عنه خطأ

احنا بنهتم بكل منطقة الرقبة والرأس وكل مافيها..
وكل الأمراض المتعلقة بيها.. وليس معالجة أسنان وخلعها وبس!
وفيها الكثييييييير من المعلومات والعوالم الخاصة بيها
وعشان كده احنا بندرس 6 سنين زي البشري بالضبط

وعلى فكرة احنا بندرس مواد الطب البشري بالاضافة لمواد تخصصنا
وبكده حنكون ملمين بكل المعلومات وحنصير دكاترة نعرف كل شي
<< بعكس البشري اللي ما يعرفوا اي شي عننا وعن عالمنا الخاص

وهذه مقدمة بسيطة مني..
معليش اعذريني اذا طولت بالكلام.. لكني لما اتكلم عن الأسنان
فما أقدر أكتب كلمة ورد وغطاها.. هذا عالمي وحياتي.. كيف ما احب اتكلم عنه !