[مطالبة]

عن السي في

طبعا اكيد قرئنا الكثير عن السيرة الذاتية في المواقع العربية
لكن خذوا العلم من اهله
الأجانب أكثر تقدم منا في مجال التقديم للعمل وكتابة السي في

حنشوف بعض ملاحظاتهم على السي في
واللي تخليه يسير مميز

ويحقق الهدف منه
لأن الهدف من السيرة الذاتية
الحصول على مقابلة عمل

(عشان كذا اقولكم احنا في نعمة ممكن تروحي تقدمي عمل وعلى طول تسوي لك مقابلة) بس اكيد من كثرة الوعي حيجي يوم نقدم سي في, وننتظر مقابلة العمل, اذكر لمن قدمت اول مرة كنت شايلة ملف تخرجي فيه وثيقتي وحسن السيرة, واستمرينا لسنوات نعبي ملفات ونسخ من شهادات الين وعيوا اصحاب العمل لأهمية السيرة الذاتية, وسارت الواجهة الأولى لك, اتصور الن لو واحدة تشيل وثيقتها ورتوح تقدم تعطي انطباع سيء انها مو قد مسؤولية لأنها شايلة ورقة رسمية في تقديم عادي.


على فكرة
عندنا نسميها سيرة ذاتية , في بريطانيا سي في في امريكا ريسم , لكن الدارج حتى هنا سي في

عن السي في
من خلال قراءاتي في المواقع الأجنبية:
(على فكرة انا مدربة اقدم دورة نحو وظيفة متميزة) وحكتب الخلاصة المهمة هنا:


- قبل تكتبي سيرتك تعرفي على العمل اللي مقدمة له, بصفة عامة يعني مقدمة عمل تربوي, تربوي احتياجات خاصة, تربوي موهوبين, تجاري, اداري, لأن سيرتك من اولها لأخرها لازم تكون مقصودة للوضيفة المرغوبة, لو بتقدمي لأكثر من وضيفة اعملي اكثر من سيرة, اكبر غلط تكون سيرتك نفسها نفسها لكل الأعمال, يعني مثلا في خانة التدريب مهم تبدئي بالدورات اللي تمس العمل المقصود, بتقدمي اداري رصي دوراتك الإدارية اولا وبعد كذا رصي الباقي, حكاية رص الدورات حسب التاريخ اكثر تنظيما واقل ذكاء, اصحاب العمل ينظرون بلمحة على سيرتك للبحث عن احتياجهم لمن تحطي 3 دورات ادارية في الأول يعطي قوة افضل من نشر الدورات الثلاث بين كل دوراتك بحجة الترتيب الزمني, وممكن ماينتبهو لها, لن العين مو صامتة لمن تيجي تطالع على طول ترسل انطباعات اول ماتشوف دورة اداري تحتها ثنتين تربوي بعدها واحدة اداري تعطي انطباع انك تربوي اكثر برغم انها لها نفس القدر من الدورات, ولا احد حيجي يدقق في تواريخ دوراتك هل هي مرتبة زمنيا او لا, وفي حالة قلة الخير واحد سألك ليش مو مرتبة زمنيا قولي دوراتي الأقوى في الأول في تلميح ان الدورات المرغوبة من قبلهم هي اقوى دوراتك بالتالي انتي ادارية درجة اولى.

- اكتبي باختصار شديد لكن اختصار ذكي عن كل شهاداتك, مثلا ماستر تربوي مع مرتبة الشرف الأولى, لو مرتبتك الثانية لاتذكريها قولي ممتاز, بكالوريوس بمعدل ...لو مو قوي اكتبي التقدير لو تقدير جيد لاتجيبي سيرته اكتبي بكالوريوس من جامعة... واكتسبي شوية من قوة الجامعة اللي انتسبتي لها, الأجانب يهتموا بكتابة المرحلة الثانيوية باعتبارها شهادة, هنا لو ثنويتك فيها شي مميز يعني من برى السعودية او مطورة واخذتيها في 2ونص سنة او فيها شي غير اكتبيها لو علمي وادبي لاتجيبي سيرتها عشان لاتغرقي في تفاصيل مو مهمة.

- يفضل ادراج معلومات الإتصال في الصفحة الأولى تحت المعلومات الشخصية لتسهيل الوصول لها.

- انهي سيرتك بهدفك من العمل ... , كيف تكتبي هدفك تنتقلي من الفايدة العامة للخاصة, بمعنى حتقولي انك (أهدف من خلال عملي كـ... إلى "هدف عام" و"هدف خاص" مستعينة بدرجتي العلمية وبما تحصلت عليه من دورات تدريبية ...وخبرات .) الهدف العام مثلا (لتطوير العملية التعليمية ) الهدف الخاص(لتنمية مهاراتي), يعني صيغيها اي صياغة, تشتمل على مسمى الوضيفة المطلوبة, هد عام وخاص, اعتماد على سيرتك, الخلاصة هدف من 3 جمل بالكثير.

- في خانة امكانات او مهارات, اكتبي عن لغتك الثانية حتى لو كتبتي في الدورات اخذتي دبلوم انجليزي تعالي في الإمكانات اكتبي اتقان اللغة الإنجليزية تحدثا وكتابة.

- اختمي سيرتك بعد الهدف بعبارة(الوثائق متاحة عند الطلب), تعطي ثقة اكبر بتوثيق كل كلمة في سيرتك اذا طلبوها.

- السيرة مقدمة لأوادم(بشر), والود ممكن تحمله كلمة, يفضل بالنسبة لي ختم السيرة بعبارة شكر بسيطة تحتها اسمك ثنائي وتوقيعك , التعامل الإنساني يجذب الكل, انتبهي لتوقيعك لايكون مرتبك .

- فيه خانة جديدة يفضل اضافتها وهيه خطة التطوير تجين تحتها تكتبين (اعتزم تطوير نفسي -ان شاء الله- خلال العام الحالي كالتالي) هذي خانة جدا مهمة جدا ذكية جدا امينة, يعني اولا فكري هذي ايت سيرة التربوية والا الإدارية والا لأي عمل حتقدميها!!! حسب العمل فكري كيف ممكن تطوري نفسك في المجال هذا, مثلا لو حتقدمي اداري اكتبي (-دورة خدمة العملاء- دورة مهارات البيع الذكي) لو حتقدمي تربوي اكتبي( ماستر مناهج وطرق تدريس- دورة لغة الجسد-دورة التعامل مع ذوي الطباع الصعبة) طبعا اذا مسكتي الوضيفة ففعلا حتحاولي تطوري نفسك لو مو اللي كتبتيه لكن خلال عام حتروحي لمديرتك معاك اثبات حضور دورة وبكذا حتعرف انك كنتي ناوية تطوري نفسك وفعلا طورتيها (في ايش مو مهم), يعني حطي خطة تطويرية لو ماتوضفتي انتي اصلا حتطوري نفسك ولو توضفتي برضو حتطوري نفسك لكن حتوفقي تطويرك حسب وضيفتك, المهم تكوني امينة يعني لو منتي راعية تطوير نفس لاتجيبين سيرة تطوير, مهم تكوني صادقة مع نفسك وماتبحثي عن رزق بتحايل.

- دائما يقال يفضل السيرة صفحة واحدة, بس فيه ناس سيرتهم حقيقة 3 او 4 صفحات وبدون مبالغة, حاول تختصري بس مو على حساب امكاناتك ومعلوماتك, في النهاية ماحد حيحساب على عدد الورق اهتمي الخط يكون 14اريال اسود, البيانات الجانبية 16 اريال بولد ازرق, اطبعي على ورق فاخر , حطي سيرتك في فايل بلاستك شفاف نظيف, ورقة 2 او 3 المهم المحتوى, افردي ورقة غلاف اكتبي سيرة ذاتية واكتبي اسمك ثلاثي وتحتها متقدمة لوظيفة ....

-ترتيب السيرة
معلومات شخصية- بيانات اتصال- تعليم-دورات-خبرات-بحوث-امكانات-خطة تطويرية-هدف-شكر

-كتبت كثير ...صح!
اسفة على كثرة الكلام
بس احب لكم الخير
زي ماااحبه لنفسي

موفقين باذن الله
تحياتي