[الملاك الأبيض]

السلام عليكم

كيفكم صبايا انا متاكدة انو مع هذي الجامعة مابقي احد مرتاح او مبسوط
وحتى ماتقولوا عني متشائمة او اني انظر للنص الفاضي من الكوباية

راح ادخل في التفاصيل , اليوم ياعزيزاتي روحت الجامعة ابغى اسأل عن جدولي ومتى راح تبدأ دراستنا نحنا اللي في كلية الاداب , المهم روحت اسأل طبعا زي العادة كل مااروح لوحدة تبعتني

للثانية بعد مالفيت المباني مبنى الجوهرة والثامن اربع مرات رايحة جاية بينهم

في النهاية بعتوني للاستاذة نسرين بخاري ودار بيننا هذا الحوار الرهيب الي ماراح اقدر انساه في حياتي :

انا : السلام عليكم

الاستاذة : وعليكم السلام

انا : لو سمحت عندي شوية استفسارات .
الاستاذة : تفضلي .

انا : استاذة انا سددت الرسوم خلاص ونزل الجدول وانا اتخصصت انقلش لغة وكنت حابة اتخصص ترجمة مثل ماهو واضح في قسم كلية الاداب ولما حطوا التي التخصصات في

الاودس مانزلوا غير لغة ليش؟

الاستاذة : ايوة هم كاتبين فرنسي وترجمة ولغة بس مو مفتوح الكم غير لغة يمكن الياقي
في السنوات القادمة ( هع مين يعيش )

انا : طيب احنا الحين مكتوب النا في النظام انو سنترا هل هذا فقط لكلية الاداب ام يشمل الادارة

وهل الترم الجاي يعني المستوى الرابع راح ندرس سنترا ولا نرجع داوم الدورة التاهيلية العادي يعني حضور ؟

الاستاذة : لا هذا النظام السنترا بدينا نطبقوا عليكم والسنوات الجاية كلها راح تصير سنترا

لدفعة 2010 ومابعدها يعني 2011 و2012 وهكذا يعني بطل في انتساب الانتساب صار في البيت . اما الدفعات اللي قبل 2010 مثل 2009 فهؤلاء يكملوا انتساب عن طريق الحضور

انا ( فتحت فمي وبديت اتلعثم ) : طيب يااستاذة كيف على كيدا كان احنا سجلنا تعليم عن بعد وريحنا انفسنا .

الاستاذة : لا التعليم عن بعد يفرق عنكم لانهم يستخدموا برنامج ايميس ويحضروا محاضراتهم عن طريق النت طول السنة مثل الانتظام بس في البيت بينما انتم الانتساب تستخدموا السنترا ولمدة
3 اسابيع فقط.

انا : طيب انا المواد كذا صعبة علي عن طريق السنترا وبصراحة مااقدر اجيب معلمة خصوصي

ممكن احضر مع الانتظام واحضر محاضراتهم بعد الاستئذان من المعلمات ؟

الاستاذة: لا اصلا اول ماتدخلي من البوابة ويشوفوا بطاقتك انتساب راح يرجعوك من البوابة .

انا واليأس بدأ يتغلغل في : طيب انا السنة الجاية اذا جبت معدل ممكن احول انتظام ؟

الاستاذة : لا انت اصلا مو سعودية وامك ماهي سعودية انت ( اجنبيييييييييييية ) يبقى مالك انتظام الا بالمنحة وهذي تيجي من قسم الرجال من العميد بس تيجي للسعوديين

او للاجانب من ام سعودية .

انا : شكرا ( ومن جواي اغلي من القهر )

هي : عفوا

طلعت وانا اتحسبن عليهم بالله ايش رايكم بهذا الخبر

والله من يوم مارجعت وانا متنكدة ولا قادرة انام ولا آكل ولا اعمل شي بس جالسة ابكي من القهر

الحين الطلاب ماطبقوا عليهم سنترا ولاجلسوهم في البيت ولا سووا فيهم اي شي من العجايب اللي

يعملوها في قسم الطالبات كاننا حقل تجارب .

والله المفروض انو مانسكت على هذا القرار لانو اقرف قرار اتخذوه بحقنا

اصلا احنا كل اللي نحضره 3 اسابيع الحين صارت الجامعة ماهي قادرة تستوعبنا لمدة 3 اسابيع
والله لو تشوفوا اليوم لما رحت الجامعة البنات مرة قليل اللي بس فاضحين الدنيا
ويقولون مافي مقاعد ومانقدر نستوعب الاعداد والله كله كذب

الجامعة فيها اكتر من 13 مبنى وكل مبنى 3 طوابق ويقولوا مافي مكان

حسبي الله ونعم الوكيل .

الرجاء عدم السكوت واسماع اصواتكم لنعترض على هذا القرار الجائر بشتى الطرق.

انتظر ردودكم .