مشاركة: استفسار عن كم ماده
هلا فيك اختي ريد فلاور
ماشاء الله الاخ سايلنت هيل بالرد الاول أفادك كثييير
وانا معاه
لكن في الرد الثاني ...مثل ما قال الحال عند الاولاد غير عند البنات
وحأقولك كيف لقيت المواد لما درستها..
Cs305 لغات البرمجه
هذه المادة تعتبر نظري بحت
مثل ما قال اخونا سايلنت هيل...عن لغات البرمجة واساسياتها وكيف طلعت....الخ
غالباً حتدرسيها مع أ.رانيا ملة
وهي أستاذة مرررة طيبة وشرحها حلو
بس ركزي معاها في المحاضرات ولازم الكتاب معاك كل محاضرة تكتبي عليها وتمشي عليها وتخططي على الكلام اللي تقوله
اسهل لك من الدفتر...لأنه شرحها يعتبر سريع
Cs455 تحليل وتصميم الخوارزميات
انا اعرف انه اسمها تحليل وتصميم نظم "سيستم أناليسز اند ديزاين"
المادة هذه درستها مع د.صالحة عبدالله
وهي دكتور ماليزية ما تتكلم عربي... تشرح انجلش وتسأليها بالانجلش
فاذا لغتك الانجلش تمام حتمشي معاها تمام
لأنه طيبة وتشرح بأمانة وتساعد كثير لما تسأليها عن اي شي
لكنها هادية وصوتها هادي ولازم تجلسي اول صف في المحاضرة
اما اذا حتدرسيها مع د.مي... ما اعرف كيف نظامها ما درست عندها من قبل
عموماً المادة فيها مشروع كبير عليه 60 درجة
والاختبار النصفي من 20 والنهائي من 20
يعني المادة عملي كثييييييييييييييييير
قروب المشروع حيكون تقريبا من 8 او 10 بنات
نصيحة حاولي تختاري قروب بنات تعرفيهم...ولا تعتمدي كثير على معدلاتهم اهم شي انكم تكونوا دائماً متفقين وانت وهم تشتغلوا بأمانة
في النهاية القروب كله حيأخذ نفس العلامة
المشروع تطبيق للمادة
في البداية لازم تختاروا مركز او منظمة او شركة
من داخل الجامعة او خارجها (داخل الجامعة يعني مثلا المكتبة او الشؤون او التعليم عن بعد...)
وهذه المنظمة مثلا تقون تستعمل في معاملاتها الورق وانت تحولوا نظامهم الورقي الى الكتروني
يعني اما محتاجين داتا بيس او ويب سايت (الويب سايت غالباً كمان له داتا بيس....لكن انتوا في الغالب حتعملوا داتا بيس وخلوه نفس مشروع مادة الداتا بيس عصفورين بحجر)
بعد كدة المشروع مكون من 7 اجزاء... وأكثره كتابة وحتأخذوا المعلومات من المنظمة
وبعدين فقي اخر الترم تشتغلوا على الاجزاء الثلاثة الاخيرة وما تأخذ وقت
وهي تصميم الانترفيس للبرنامج وبعدين اختبار البرنامج
والتصميم مهم جداً يكون مرتب وحلو وتكتبوا الشرح بشكل مرتب و واضح
(امكن ما تفهمي كلامي كثير اللين تبدأي تدرسي المادة بنفسك)
Cs424 قواعد البيانات
وغالباً حتدرسيها مع د.منال
واذا اخذتيها مع احد تاني كلامي هنا محا يفيدك ابداً
لأنه د.منال لها نظام معين تمشي عليه مو شرط باقي الاستاذات يكونوا مثلها
الدكتور طيبة ومتمكنة من المادة تمام
في بنات يعجبهم اسلوبها ويمشوا معاها كويس...وفي بنات مثلي ما مشيت معاهم طريقة المحاضرة
لكن اهم شي اكتبي الكلام اللي تقوله لأنها نادراً ما تكتب على السبورة
وبالذات في البداية والاجزاء النظرية
واحضري كل المحاضرات لأنها مهمة جداً جداً جداً
وترى ملاحظة مهمة...اجلسي في القاعة من بدري لأنها مستحيل تخلي احد يدخل وراها حتى لو كنتي دافورة او صحبتها حتى
و لما تدخلوا في شرح الجداول والمسائل حتكتب عالسبورة اكثر ويصير كله تمام ان شاء الله
والمعمل فيه مشروع..حاولي تعمليه صح عشان انت تستفيدي
المادة و المعمل جدا جدا جدا مهممممممممة في المستقبل
Cs461 نظم التشغيل
غالباً تدرسيها مع د.لميا فتوح
دكتورة طيبة كمان...لكن ما كانت تعجبني طريقة محاضراتها
لأنها تقرأ السلايدات بس
لكن لازم تحضري المحاضرات او لما تغيبي اسألي عن المحاضرة
لأنه في مسائل وبعض الاشياء مو موجودة في السلايدات
طريقة حل المسائل مهمة جداً...وتيجي في كل الاختبارات
لكن عموماً المادة تعتبر سهلة وفيها نظري كثير وفيها شوية مسائل
والمعمل للمادة جداً ظريف وخفيف
نحن درسنا فيه عن اللينكس اشياء بسيطة بس مع أ.نوف الغانمي
وكان معمل ممتع جداً :)
أتمنى أكون افدتك في الشي اللي تبغيه
وما اتكلمت عن محتوى المواد لأنه تقريبا الاخ سايلنت هيل كفى بالرد الاول
ولأي مساعدات ان شاء الله افيدك على قد ما اقدر
|