[فندام]

حسب معلوماتي ياأختي الكريمة تقيييم المتقدم للماستر يكون كالتالي :
40% على نتيجة اختبار القدرات
30% على المعدل بشهادة البكالريوس
10% على اختبار step الي عليه 100 درجة
20% على الدورات والخبرات
وبكدا يصير كل 10 درجات ب step عليها نسبة 1%
واختبار Step صار الزامي زيو زي اختبار القدرات وماعاد تقبل اي دورات باللغة الانجليزية من أي معهد
والاختبار مافيه نجاح او رسوب يعني مافي درجة معينة لازم تجيبيها الأفضلية هي لأعلى درجة وكل 10 درجات تجيبيها حتحصلي مقابلها على نسبة 1% من نسبة ال 10% المحددة للاختبار
أما كلامك عن اختبار اسيت حسب المجموعة ومستواهم فهدا كلام جديد اول مرة اسمعو وماادري ايش المقصود منو بالضبط بس المعلومة الي انا متاكد منها هو انو اختبار step موحد للجميع ويتكون من عدد من ألجزاء كل جزء يختص بمهارة معينة من مهارات اللغة يعني القراءة لها جزء خاص والاستماع لة جزء خاص والقواعد لها جزء خاص واسيعاب المقروء لو جزء خاص والاختبار بدو استعداد جيد وسرعة بالحل ولازم تكون عندك حصيلة كلمات جيدة وتكوني سريعة بالقراءة والاستنتاج وكمان لازم تكوني فاهمة مختلف قواعد اللغة الانجليزية ومهارة الاستماع لازم تكون ممتازه عندك لأنو على مااذكر اول 20 فقرة بالاختبار يعتمد حلها على الاستماع لشريط يحتوي على محادثة طويلة بين عدة اشخاص واختيار الاجابة الصحيحة على الاسئلة من خلال فهمك للحوار الي دار بينهم طبعا انا مابدي احبطك او اصعب الأامور عليكي بالعكس انا بعطيكي الواقع كما هو عشان تكوني عارفته مسبقا وما تتفاجئي بي وانت بالاختبار وبالرغم من كل هدا أقدر اقلك بكل ثقة انو الاختبار مو بالصعوبة الي ممكن تتصوريها بالعكس اختبار step اسهل بكثير من اختبار التوفل بس الحكاية كلها انو بدو استعداد جيد واعرف واحد من زملائي الي قبلو بالماجستير خلفيته جيدة بالانجليزي جاب بهدا الاختبار 66 من 100 وهنا انا بتكلم عن شخص خلفيته جيدة باللغة يعني مش واحد متمكن بدرجة كبيرة او محترف وعشان تجتازي الاختبار وتحققي فيه درجة عالية حسب وجهة نظري شوفي مدرسة انجليزي متمكنة لأنو للأسف الى الان على حد علمي ماصدرت كتب مفيدة خاصة باختبار step ممكن انو تعتمدي عليها وعموما تفاصيل الاختبار واجزاؤه موجود بموقع المركز الوطني للقياس والتقويم ممكن تطبيعيها وتطلعي عليها ونصيحة لاتعطي الموضوع هدا اكبر من حجمه وخلي تركيزك على اختبار القدرات العامة لأنو هو الي عليه نصيب الأسد من نسبة التقييم وهي 40% اما اختبار step فعليه بس 10% ومو معنى كلامي هدا انو مش مهم بالعكس لكن اختبار القدرات العامة اهم منو فاعطي كل اختبار حقه من التركيز والاهتمام بما يتناسب مع نصيبة من نسبة التقييم وخليكي متفائلة ترى كلنا العام الماضي اختبرنا وكنا متفائلين خير والحمد لله وفقنا الله للقبول وكنت أنا من المقبولين بفضل الله مع العلم انو الدرجات الي حققتها كانت معقولة يعني ماكانت عالية جد وكذلك بالنسبة لاغلب المتقدمين الي اعرفهم وانفبلنا بفضل الله فخليكي متفائلة واتوكلي على الله وقدمي للاختبار وابذلي اساب النجاح والتفوق واتركي المحبطين والمشككين ولا تلتفتي لكلامهم أبدا وباذن الله حتدخلي المنتدى في شهر رجب او شعبان وتبشرينا بخبر قبولك بالماستر
اما بالنسبة للمعلومة الي ذكرتيها بأن الحاصلين على تقدير جيد جدا او ممتاز ممكن يختبرو بعد التقديم فصراحة ماأقدر ائكد او انفي المعلومة هدي بس عشان تقطعي الشك باليقين اتصلي على القسم العلمي الي حتقدمي فيه واسفسري عن هذي المعلومة عشان تقطعي الشك باليقين وبالتوفيق يا اختي الكريمة