[A7 BS]

.. بســمـ اللــهـ الرحمــن الرحيـــم ..

.. صباح / مساء ( الورد ^^ ..

.. طبعا كلنا كنا ننتظر خبر عن اعفاء المتقدمين للبرنامج بفارغ الصبر ..

.. وعشنا ايام على هالموقع الي في اي لحظة ممكن يطلع لك عبارة انت مقبول راجع العمادة ..

.. اليوم جيت لكم بعد معاناه من يوم السبت لين الثلاثاء ..

.. استنفذت رصيدي في اجازات الدوام لعيد الحج في سبيل الاعفاء ..

.. وهذه هي النتايج من النهاية ..

1) الي دخل يوم الاربعاء وطلع له نموذج المراجعه هذا كله كلام فاضي وخطا في النظام ,, (( يعني بالعربي لاتجي لانك مانت مقبول )) , نقطة استوقفتني >> جامعة اقل مبنى بمليارات الريالات ماهي قادرة تظبط السيستم عشان يشتغل مثل الجامعات الاخرى ..

2) الي انقبل بتجيه رسالة على جواله من خلالها يراجع عمادة خدمة المجتمع عشان يطابق الاوراق ويقولوون له ياحظك ياااخي ..

.. طبعا هاذي هي الخلاصة ..

.. نجي لموضوع مهم وهو نموذج طلب التقديم على البرنامج << حسيت اني بتعامل مع واحد من بلاد الواق واق مو مع موقع جامعة محترم يتكلم العربية ..

(1)
.. في طلب التقديم يسئلك عن حالة الوالد ..

.. هل هو يعيش مع الاسرة او لا ..

.. بالنسبة لي انا اهلي في مدينة وانا في مدينة ..

.. فبكل ثقة حطيت يعيش مع الاسرة لان بالعقل مب معقول انا لحالي بكون اسرة خخخخ ..

.. يوم جيت للعمادة وشرحت لهم الوضع قالو لا ياحبيبي هذي معناها انك انت تعيش مع ابوك واهلك يعيشون لحالهم <<<< حسيت اني واحد رفيق وبخرج من الجامعة عشان انتظر بنت كفيلي ارجعها من الجامعة هههههه مب سعودي وافهم العربية ابد ..

(2)
.. بالنسبة لدخل افراد الاسرة ..

.. يعني بالله ماقد شفت اوقح من هالخيار ..

.. اذا ماكان عندك اخوان وامك ماهي موظفة وانت وابوك الي موظفين شلون تجبروني على مثل هالخيار وتقولون يعني ممكن احد من اسرتك يجيه دخل 100 ريال ؟؟؟ .. عباطة مثلا ..!!

.. طيب يا استاذي المحترم جيب لي وظيفة راتبها ب 100ريال !!! شكلك عايش في زمن اول يوم مسلسل بابا فرحان اخبر ان الي معه 100 كان واااصل وقتها ..

.. وغير كذا ممكن مايكون لك احد موظف كلهم طلبه ..

.. وحتى لو كانو موظفين ورواتبهم 10000 ريال ..

.. لمتى تبون الناس عالة على اهلها في كل ترم يجي يحوم حول بيوت اخوانه ويقلهم القطة لاهنتم ..

.. انا عن نفسي ما ارضى اني اكون عالة على احد ..

(3)
.. نجي للخيار الاعاقة او الامراض ..

.. تخيلو يوم حطيت سليم ولله الحمد والمنه ..

.. قال احد الموظفين لا لازم تكون مبتلى في صحتك عشان الاعفاء ..

.. ههههههههههههه والله شي يضحك ويبكي في نفس الوقت ..
^
^
^
.. على هذا الخيار مراح اعلق ولا بنص كلمة واترك المايك لكم ..

(4)
.. نجي للخيار حالة السكن ..

.. الحين النموذج كله يتكلم عن الاسرة والوالد !!..

.. وكل الي يخصني انا خيار الاعاقة او المرض بالإضافة للمعدل ..

.. يعني تحتار وش تختار هو لاهلك ولا لك هالسكن ..





.. حبيت اوضح شي على كلام احد الموظفين ..

.. يقول البرنامج له حسبه خاصة تعبر بنقاط قوة ونقاط ضعف تظهر قدام عيونهم بعد فترة التقديم , وهذي النقاط مايعرفون شلون يحسبونها (( راح اعلق عليها شوي )) ,, وان الترتيب للطلبة يكون على حسب قوة نقاطهم في المعدل وحالة الوالد والسكن وغيره ..

.. طيب ياحبايبنا بغض النظر عن الواسطات ومراح اتكلم فيها ابد ومراح اعلق في ذمتي شي , الحين البرنامج ذا لو اتعطل مثل موقعكم المحترم ,, شلون تحلونه ؟؟؟ ..

.. طيب لو هالبرنامج الي انا قدمت عليه وغيري قدم عليه وزوروا في معلوماته كلها باستثناء المعدل ..

.. ويوم طلبوه جا يطابق جا يطابق باوراق مزورة ,,,, هاذا مو حرام انكم تجبرون الواحد انه يكون مثلكم يغش عشان ياخذ والله العظيم ذنبهم في ارقابكم هذا اكراه على فعل هالاشياء ..

.. طيب اذا كان واحد أخطا في ادخال معلومة ليش ما يقدر يعدلها بالنسبة لي فهمتها ان لك مرة وحده ياتصيب ياتخيب وتدل على التحفظ والانانية وعدم محبة الخير للناس ..


...... اخيرا .......
.. ابارك لاخواني الطلاب واخواتي الطالبات قبولهم في البرنامج واقول لهم شفتو شلون لعبو بحسبتكم لعب فالله الله بالمعدل الزين عشان لاتحوجون انفسكم لهم مرة ثانية ..

.. وبالنسبة لاخواني الطلاب واخواتي الطالبات الذين لمن يحالفهم الحظ ان يشدو الهمة وان يستعينو بكل ماهو مفيد لهم في دخولهم البرنامج ,, فهذا البرنامج اشبه بحرب وهنالك مثل يقول (( الحرب خدعه .. )) ..


...... ملاحظة .........

.. انا احد الطلاب الذين لم يتم قبولهم بسبب خاص فيني لا استطيع ذكره ..

.. وهذي التجربة ابتدأت من يوم السبت الى يوم الثلاثاء كل يوم عند شخص وفي مكتب وفيه الرجال الي ماقصروا وكونت معهم علاقة جميلة ولله الحمد وكانو معي كاخوان مسلمين ..

.. ومنهم من كانت اخلاقه عنان السماء فعندما تدخل ينظر لك ويبتسم وعند ذكر موضوع الاعفاء يرمي وجهه في اطراف شاشة الكمبيوتر <<<< كانه يقول انتى وقتك يالحبيب ..



.. آسف ع الإطالة ..

.. وتقبلوا ودي ..