[شتاء يختزن الرعود]

,,

جتكم شتاء الدايخه وآسفه على التأخير توي واصله الديره << 9 ساعات بالطريق

المهم مثل ماقالوا الأخوات الاختبار حلو ومستواه طيب وانا متفائله بس باقي افكر بالدوره البديلة : )

بعض مقاطع الصوت معاده وعنواين القطع معاده بس المضمون يختلف نوعاً ما وطول القطع أقل من الاختبار الماضي ,,

وكثير من الاسئلة النحويه وتراكيب الجمل على عكس الاختبار الماضي كانت هذي الجزئيه قليله ,,

يعني الاسئله خليط من اسئلة الاختبارات الماضيه مع شوية تعديلات ,,

تصدقوا اول ما منعونا من دخول الاختبار لانه سبق ودخلناه توقعت انهم بيعطوا نفس الاسئله بس ما حبيت اتكلم واسوي بلبله واطلع غلطانه ,,

المهم المراقبات ماقصروا حاولوا يفهموا الطالبات حبه حبه لان بعضهم بصراحه مضيعين حاولوا يساعدونا ويريحونا بس الطريقه اللي اتبعوها للتنظيم سببت لنا تشتيت وكم سؤال راح علي بالسينق بسبة المشرفات وبرضو كم فقره بسؤال القطع .. ليش ؟؟

لأنهم كانوا يمرون ياخذوا توقيعنا اثناء اللسينق فتشتت سماعي وانتباهي وهذا خطأ منهم والشي الثاني انهم يمرون ياخذوا اوراق اجاباتنا ومدري ايش يعلموا فيها بالقلم الخطاط وهذا يحتسب من وقتنا وحنا ننتظر ترجع الورقه ,,

والتوقيع 3 مرات اعادوه والرابعه تأكيد ,, والحركه الكثيره حولنا زادت ارتباكنا يمكن انا لوحدي ارتبكت لاني جالسه بالمقدمه ,,

علوم فلكيه ,, انا بالقاعه معك اللي فيها خبيصه ولخببيصه بس كنت مره مستمتعه وكل شوي اشوف البنات وراي وادورلك مع اني ما اعرف شكلك ,,

تونا ,, مالنا حظ باللقاء هذي المره الاختبارات الجايه أكثر << فالها شر هه

بإذن الله نلتقي بالجامعه على مقاعد الدراسه ,

أم تيمو ,, شكلي انا اللي بجنبك اسنوني كانت تطقطق وجسمي ينتفض ومو عارفه انطق ولا اتكلم ,, الحروف ماتطلع تمام تلعثمت من البرد ومدري ايش اسوي عشان ادفى وبدا بي الصقيع بنصف السؤال الأخير وتأخرت فيه لاني كنت كل شوي انفخ يديني وجلست اقول في نفسي (طيب البنات اللي لابسين خفيف وجزمه مفتوحه ما اشوفهم ينتفضون وانا بوت وصوف وبموت برد شكلي انا بس بردانه ياذي الفشله وقال ايش نكها !! شتاء !! ) اثاري الكل هنا كان بردااان ههه بصراحه برد هذا الاختبار اقوى من برد الاختبار الماضي ,,

بعد الاختبار تكلمت مع البنت اللي جنبي قالت انها اقتصاد وسبق وقدمت على الماجستير بس ما انقبلت ,,

أتمنى لها التوفيق والقبول في المرة المقبلة ونشوفها زميله ,

واتمنى من قياس ان يزيد 5 دقايق على وقت كل سؤال حتى يكون هناك انصاف في حقنا وان يضرب حساب للعوارض الجانبيه التي يمكن ان تسلبنا شيء من وقتنا المخصص للاجابه كتدخل المشرفات اثناء اجابتنا على الاسئله للتأكد من البيانات ,,

وخلاص هذا الملخص بروح اريح بعد عناء السفر المرهق ,,

وآعتذر لو فيه أي خطأ أو لخبطه أكتب وماني واعيه تمام ,,

وآسفه كثرت بالكلام بس بغيت ابرد قلبي بعد التعب ,,


,,