الســـلام عليكم ورحمة الله وبركاته...
حبيبتي أول شىء أحب أقولك وبشهادة الكل مواد خطة ب أصعب بكثير من مواد خطة أ..فأنتي شدي حيلك وتوكلي على ربك..أنا فكرت لو أني في مكانك وش بسوي وطلعت بهالحلول:
1. اول شىء الافكار السلبيه الي في مخك انسيها تماماً ( انا حرسب..ما راح ادخل تخصص..ما راح أقدر أكمل ..أنا فاشله الخ) هذي كلها من مسببات الاحباط وتمهد الطريق للفشل..فانتي استرخي وشيلي من راسك هالافكار وحطي فكرة واحده في بالك (أنا راح أبذل كل ما عندي من جهد وبطلع من الاختبارات النهائية وأنا راضية عن الي سويته بغض النظر وش بتكون النتيجه)..
2. رتبي تفسك من الحين امسكي ورقة وقلم وحطي في راس كل صفحة اسم المادة وتحتها الفصول أو الجزئيات حقتها..رتبيها بعدين بحسب درجة الصعوبة..شوفي اش الاشياء الي متمكنه منها واش الجزئيات الي منتي مستوعبتها عشان تقدرين كذا تشتغلين على نفسك.
3. جمعي قد ما تقدرين اسئلة السنوات السابقة لكل المواد ..اطبعيها وخليها عندك..وشوفي الملخصات الموثوق منها والي استفادوا منها البنات وصوريها وخليها عندك..تأكدي من أن كل التمارين محلولة عندك..وبكذا تكونين مجهزة نفسك بكل شىء وما بقيلك إلا الفهم والذاكرة.
4. امسكي جزئية الدوري الاول وذاكريها من كل قلبك وكأن بكرة اختبارك..وبعدين روحي لاستاذتك واطلبي تشوفين ورقتك للدوري الاول..واقعدي على جنب وابدأي حلي كل فقرة..وأي اشكاليه تواجهك اسألي الاستاذة عنها ( ولا تستحين من هالحركة لأن هذا حق لك.واذا ما رضيت الاستاذة روحي لرئيسة القسم واطلبي تشوفين الورقة)..وسوي هالشىء نفسه مع اختبار الدوري الثاني..وفلنفرض لو ما رضوا يعطونك ورقة الدوري الاول لان مر عليها فترة..اطلبي تشوفين نموذج محلول وحلي انتي عليه.
5. بكذا تكونين قفلتي على جزئيات الدوري الاول والثاني..الشبترات الباقية ابدأي امسكيها وذاكريها حبه حبه..بدون توتر وخوف..صدقيني كل شخص عنده القدرة انه يفهم بس الناس تتفاوت بالقدرات منا من يفهم من المحاضرة ومنا من لازم يرجع يذاكر وكذا... فلا تقارنين نفسك بأحد ولا تحاولين تقلدين طريقة مذاكرة أحد إلا إذا حسيتي إنها بتفيدك.
6. أنا اشوف ان المذاكرة مع أحد جدا متعبه وما تفيد..بس المراجعة تكون مفيدة..دوريلك على صديقة تكونين متأكدة انها من النوع المجتهد وحددي معاها جزئيات تذاكرونها وراجعوها سوا...فيه طريقة دائما اسويها مع صديقاتي بعد ما نخلص المنهج نقعد سوا وكل وحده تقول وش الاشياء الي حستها مهمة أو وقفت عندها ..60% إن ما كان أكثر يجي من هالاسئة بطريقة ما في الاختبار...اذا كان عندك صحبات من شعب ثانية يكون أفضل عشان كل وحده تقول وش ركزت عليه استاذتهم ..
7. لا تترددين أو تستحين إنك تستشيرين اساتذتك بوضعك وبأي شىء آخر لانهم هم الي بيفيدونك..ممكن بعض المعلومات الي بالمنتدى تكون غير موثوقة..فالافضل انك تاخذين الراي من ناس ثقات...ونصيحة لوجه الله شيلي من راسك مواضيع البونس والدرجات ووش بيسوون وشلون بيزيدونكم آخر الترم ماضيع الخلق إلا هالاشياء.. خلي تفكيرك في ال40 درجة الي مازالت بيدك..
بعد كذا وعن تجربة مواد خطة أ قمة في السهولة وبترفع معدلك إن شاء الله..الحاسب والاتصال اذا كنتي من النوع الي يقدر يحفظ ..فهم بجيبك...والفيزياء جدا سهله وحذفوا منها كثير بس يبغالها مذاكرة بسيطة والاختبارات حلوة وخالية من التعقيد..بس هو الماث الي شوي يبيله.. بس برضو بالمذاكرة ما يصعب عليك شىء ان شاء الله..
وآخيراً وليس آخراً توكلي على الله..وخلي كل جهدك في سبيل التعليم ابتغاء للأجر والمثوبة من الله وبكذا صدقيني بتطلعين كسبانه بإذن الله..." من سلك طريقا يلتمس فيه علما ، سهل الله له به طريقا إلى الجنة"
والله يوفقك ويفتحها عليك بإذن الله ويكتب لك الخير وين ما كان..وعذراً على الإطالة