[rarba]

المشاركة الأصلية كتبت بواسطة مظلومة التحضيري rarba: كلامك بجد يريح وبالعكس ياسكر مازعلني إله خلاني أقول لمتى الحزتن والزعل وابدأ أكون إيجابية ومتفائله وليا الفخر لو شوفتك وكنتي صحبتي وأشكرك من كل قلبي وربي يوفقك

العفو يا قمر
بس كنت أبغى اقولك شي كمان عشان ما رديت عليكي امس,
حكاية (majnonha) فيه شبه من حكايتي
بابا استشاري عناية مركزة وصدرية في مستشفى الحرس الوطني بجدة, وهو سأل الصيادلة هناك, بمختلف تخصصاتهم ومراتبهم, (اتوقع سأل اعلى المراتب) المهم, ويقول لي انهم يقولوا انهم في نقص شديد من ناحية الصيادلة, اكرر مرة ناقصيييين, وبيضطروا انهم بعض الاحيان ياخدو اللي نسبهم جيدة. وبنت عمتي دحين ماشاء الله معيدة في جامعة الملك سعود وبتقول نفس الكلام وبأسمع نفس الكلام كثييييير. فمعليش احسها صعبة شوية حكاية اخو صحبتك,اكيد في شي (انا عندي مصادر موثوق فيها) . المهم, هذا الكلام خلال السنة التحضيرية وقبل ما احط التخصص اصلا. وبابا جلس يقنعني بالصيدلة وقالي كمان على طب الاسنان, وبس قالي اذا تبي تخشي طب بشري, عادي بكيفك, انا محا امنعك من اي شي. انا الصراحة مريت وعانيت بمختلف التغيرات النفسية وببعض الاحيان اكتئاب وببعض الاحيان تفاؤل, ومرة كنت حيراااااااانة بشكل اكبر من ما تتصوريه. انا الحمدلله كنت اقدر انقبل في اي شي بس استخرت ربنا, وفي النهاية ما حطيت اسنان لأني ما اقدر استمتع بدراسة اسنان وفك طول حياتي , ولمن تشتغلي , كل يوم تصحي الصبح وتصبحي على اسنان(كل يوم يجيلك شكل مختلف,وعادة تكون شكلها مأساااة ويسد النفس, الله يعين حبايبنا دكاترة الاسنان,احنا نحتاجهم, وهذا ما يمنع انو في ناس مستمتعة), ما اتخيلت انو هادا انا, وبعدين الخيار كان بين الصيدلة والطب, مع العلم انو انا احب الاثنين, وشايفة نفسي انو اقدر ابدع في الاثنين, لكن اللي حسم الموضوع, هو الاستخارة مع التفكير الطوييييييييييييييل المتعب. بس الحمد لله, اخترت صيدلة وما غيرته و ماني ندمانة على هذا الخيار أبدا.
(وعلى حكاية التريقة دي, ياما مرينا بيها, وكم مرة بكيت, وكم مرة رديت عليها وجرحت, حطي في بالك انك لو تبي تتريقي على اي احد, تقدري, حتى لو كان مين, تقدري تتريقي حتى على الاطباء والاسنان والوزراء والمدرسين واي تخصص, واي عالم, واي مبدع, واي غريب, واي احد ما يوافقك ميولك,وانا عندي كل التريقات اذا تبيني اقولك هية. هذا الشي انا اعترف وللأسف اني لسة انقهر منه الين دحين, وانا مع كل موقف احاول اني احسن نفسي والاقي الرد المثالي لكل موقف, ومرة انجح ومرة افشل,لكن الانسان يتطور مع الزمن. مع اني اعارض الكلام الفاضي اللي بيسووه الناس تجاه اي تخصص او اي عمل, كل تخصص او عمل احنا له محتاجين, وانا من جد احترم كل تخصص)
هذي حكايتي...باختصار
واتمنالك كل خير يا عسل, وبإذن الله اشوفك بداية السنة, وخليكي قوية :)