[سكون الورد k.a.u]

المشاركة الأصلية كتبت بواسطة دافئ الإحساس فعلا والله انك صادقة واي حب العرس فهو حب كاذب

عفواً اخوووي ..

القضيه مو قضية حب قبل العرس او بعده ؟؟

القضيه اللي انا اشوف انه يدور حولها النقاش بعد اذن صاحبة الموضوع ...
هل هالحب اللي سواء كان اول او ثاني ... وسواء كان قبل او بعد الزواج ...
هل هو حب فعلاً ؟؟؟ هل هو صادق ؟؟؟

يعني اللي يحب يكون مستعد لأي شي يسعد الطرف الآخر .. يعني مثلاً ...

لو رجل حب بنت بكل صدق وأمانه .. والله الذي لااله الا هو مايكن ولا يستريح له بال الا لما تصير زوجته ويسعد معها وتسعد معه لان قلوبهم معلقه ببعض ..

ولو بنت حبت رجل بكل صدق وأمانه .. تحاول بكل ماأوتيت من قوه انها تحصل عليه وتخلي اهلها يوافقون عليه بشتى الطرق الا اذا ابوها كان غاصبها على احد ٍ يبيه او احد ٍ متقدم لها حزتها ماتقدر البنت تسوي اي شي سوى انها تطلب ربها ان يعينها وتحاول تطلع حبيبها من قلبها وتدخل زوجها وتقفل عليه قلبها وترمي مفتاحه .. حفظاً لحقوق الزوج ومحاوله منها لمحبته ..


لكن انا برأي اللي يدعي الحب ويقول انا احب .. وبالنهايه يقعد يتفرج على حبيبه وهو يذبل ويموت .. او يقول والله لو حبيتك قبل هالظرف اللي انا فيه كان انت ِ الحين زوجتي ..

او تقول لو حبيتك قبل هالوقت كان تحديت الدنيا علشانك ...

كله ترهات واقاويل كاذبه ماهيب نابعه من حب وفي صادق ..

لان اللي يحب مالمفروض يخلي حبيبه مزهريه قدامه هو يستفيد منها تخفف عنه تساعده تلبي رغباته اللي بحدود الأدب (حب وحنان وعذوبه) وهو يمتنع عن انه يتقدم خطوه ويكتفي بوجودها يمه وهو لايحرك ساكن .. فأنا هنا اقوله ارجع راجع نفسك وتأكد من قلبك هل فعلاُ انت عاشق ام معجب فقط !!

ابي اذكر لكم قصة اثنين يحبون بعض عندنا بالقصيم ..

وسالفتهم معروفه لبعض من الناس .. وهي ان اثنين يحبون بعض .. لدرجة الجنون ..

ولان الرجل هذا صادق بحبه ومايبي يتنازل عنه .. تقدم لخطبة البنت اللي يحبها واهلها ارفضوه بالاولى .. ثم رجع وتقدم ثانيه .. واهلها ارفضوه .. ثم رجع وتقدم 4 مرات وهو ماكل ولا مل ولا تنازل عن حبيبته طبعا لما جا وتقدم بالرابعه .. ابوها وافق لكن اخوانها ارفضوهـ ...

البنت كان موقفها صعب بالثلاث مرات اللي مرت لكن بالرابعه اطلعت لاخوانها وقالت لهم : ابي تعطوني سبب رفضكم وعلموني عن عيوبه والله اني لانساها وماافكر به ..

طبعا اخوانها اسكتوو لان الرجل مايعيبه شي مير انه مو من قبيلتهم وهم يبون يزوجونها لاحد قرايبهم .. المهم ..

قالت البنت : دام مابه عيوب .. والله الذي لااله الا هو ماحد يخلني اصير من بنت لمرهـ الا هو سواء حلال او حرام وبكيفكم عااااد ..

طبعا اخوانها خافووو من البنت ومن ثقتها بنفسها واضطروا يوافقون على الزواج وتزوجت اللي تحبه والحين هي تقريباً عمرها 60 سنه وزوجها ماااات رحمة الله عليه

...

ورداً على سؤال الموضوع :

انا اقول انه يمحيه اذا هالقلب اللي حب الاول لقى بعده حب عطاهـ اللي ماقدر يعطيه اياهـ الاول ...
وهالشي يرجع لصدق حب الثاني ..

اعتذر على الاطاله .. وشكرااا لصاحبة الموضوع

دمتم بود