[خالد9921]

وعليكم السلام ورحمة الله وبركاته

ولأن العزاب لا يعتبروا من صنف البشر بل هم لصنف الزواحف اقرب

خبرك قديم !

من يوم إنقرضوا آكلين الضبّان
والطلب زايد على سوق الخرفان .. الحمدلله ترقيّنا خروف أول ركن جنرال
ومن عقبها ومكاتب العقار على حرّاس العماير مخرفنه أبو جدّتنا !

ويفر منهم كفرارهـ من الاسد

في هاذي صدقت حتى بغوا يسمّوني خليفة هارون الرشيد ,,
لكنّي اسكتّهم بكم درهماَ .. ماش ما احب الترييش ..

الوكاد إن سبحان الله كنت أمس في جوله مع وزيري نعمان
نعمان وضعه مثلك يا مجبور يبي شقه وإلا غرفة وإلا بايكه وإلا هنقر خيول
وكان يبيني أقط معه في الإيجار
ولكنّي غضبت وقلت معاذ الله أتريد أن أنهب بيت مال المسلمين ؟؟!!
ويحلفون إن لو عادها مره ثانية بأفرض عليه الجزيه !

مالك بالطويلة .. فرفرنا في أحيائنا الجميلة
ولا لقينا للعزّاب إلا غرف نظام 800 و 1000 اللي خبرك رايحه في أمّينها

وأفضل وأنظف عمارة لقينا فيها غرف زي كذا بالدور الأول كلّه
دخول هالغرف من الحوش بس .. ومن الحقاره مافي بابين للحوش مخلووووعه
انا قلت وااعيباه ما يسمعون ذول بقضاء الحاجات والستّر ؟
المهم نعمان شاف غرفه مسكونه قال بأدق واسأل
انا قلت له حرااام عليك يمكن الآدمي خاشع في صلاه وإلا عباده وتقطع خشوعه
قال ياخي مانيب جايب شر له .. كلّها سؤالين ورد غطاها
وبالفعل قام دق عالباب وبعد دقايق فتح الشاب الساكن باب الغرفة
طلع لنا مرعووب جداَ انا هنا تأكدت إنّه كان فعلاَ يختم المصحف !
ومن زود المؤازره قلت له هوّن عليك
ماحنا شرطة مكافحة الجماعات المتشددة < مجرد قلت له شرطه جاني سيل تكفى
الزبدة كم الإيجار ؟ 1200 ! وضعها ؟ مخيس ولا كأنها خرابه
قلت له نعمان ذي كان ممكن نستأجرها وحنّا مراهقين أيام ابو جعفر المنصور

عاد نعمان كان ساكن في شقه بعماره خليطي وشقه من أبدع ما يكون
لكنّها ضاعت عليه قبل سنتين بسبب الغزو البيزنطي لها
وكنت كخليفة اقول يومها لا علي شرهه ولا حتى عتب من قالك تسلّم الشقه !

وقررنا بعد هالفشل نقوم بغزوة نسبي ونأسر فيها كروت عائلة بالهبل

شف يا بعدي
أوكي الواحد يبي تمليك لو كان بيستقر في جده على طول أو بيعرس وكذا
لأن لو عزوبي ولا في نيته يعرس وبياخذ تمليك
بأقوله وسّع صدرك مصيرك تتركها مانت بدايم بهالشقه
وضعك إلا ما يتغيّر دامك عزوبي
ولا أخبر واحد من الشباب في شقه إلا وتركها بمافيهم اللي ساكن بشقق بطله

انا ما انصحك بقوة إنك تاخذ تمليك حتى لو بتستقر او بتعرس
لأسباب كثيرة أعرفها وشفتها عن قرب
إنت شايف سوق الطلب والعرض في الشقق التمليك
وضع مزري ..
العرض خيالي شقق تمليك يا كثرهاااااا خيشة رز 40 كيلو ولا شي
والطلب ضعيف جدا
الشركات العقارية مغرقّة الجرايد وكل مكان إعلانات شقق تمليك
مع العلم إن كثير من الشعب قادر ع تكاليفها من 300 الى 600 ألف غالباَ
لكن ولأني سبق شفت ناس يبون يشترون واعرف ناس اشتروا وانا فكرت فيها
شفت مشاكل تخلي كثير من الناس تعزف عنها
اول شي اغلب شركات بنائها نصّابه ..
لا يغرك كهرب وسبّاكه ممتازه وتشطيب ديلوكس
بدليل تلقى ضمانهم اغلبهم سنه وحده بس والله لو إنه جوال أبو كشّاف
اعرف ناس ليومك كل فتره متورّط في السباكه والا الكهرب والا حتى البويه
تخرب عليهم ومشاكل كثيره وحمّام جارك فوق ينقط عليك مع السقف
غير كذا الجار الشين ... والمخططات المنكوبة زي مخطط الحرمين
أخو واحد من الشباب مشتري عماره نفس هالنظام تجيك 6 ادوار ودوبلكس فوق
ليومك يناحل المحكمة يبي يبطل البيعه ويرجّع فلوسه < سلملي عليه
لأن كل كم يوم أزوره ألقى قدام عمارته شاطئ كوستاريكا للبيّارات وانت بكرامه
ولا يغرّك كلام شريطية العقار
نظامهم تكييس مصاريه والله الشقق مطلوووبه والله بعرض عليك شقه قصر .. الخ
لكن الواقع غير انزل المخططات شف رصّاااااات عماير التمليك الفاضية

غير كذا أنا شخصياً لو مكانك وبغض النظر عن هذا كلّه
احسّها غبينه ارمي مثلاً 550 ألف على 3 غرف في الوزيرية بالجنوب
هاذي اخر الاعلانات اللي شفتها
اذهب للجحيم علبة كبريت جنب الاستاد الرياضي بهالسعر ؟؟ غبييينه !!
لا تقول وضع العقار كذا ومرتفع .. ناظر فلوسك كم وناظر البضاعه وشهي

وحط كل الإحتمالات مثل لمّا شعبنا طايح في كامري عشان وقت البيع
لو لا سمح الله تورّطت فيها تحسب بتلقى شرّاي بسهوله ؟
والله بتنشب في حلقك اذا الجديده سوقها ضعيف كيف الشقه المُستخدمه
ونادر شقه إيجار وسط عماره كلّها تمليك < في حال تبي تأجرها

مالنا إلا نحتري مساطيل بالفيس بوك وحنين ثانيه وينسحب على أمّينهم !
ويجيك أبو متعب طاير مليون بتسهيلات في البناء والأراضي !

خلاصة كلامي
شف لك أبو بزارين يمون عليك وقول له
في مكتب عقار حالف يعشيك اسباقيتي حواشي إنت وكرت العائلة حقك ..
ويمدحون خمسين ريال لهندي العمارة منها غسيل سياره ومنها يحب راسك يومياَ
بتسكن اطلقها شقه بعمارة عوائل وبتعيش ملك . وإلا خليفة زيي ما عندي مانع

الله يوفقك واستخير وانا هذا أشوري ابعد عن هالشقق

أحس إني كتبت مُعلّقه لأمبراطور بيزنطا يا شين الخليفه إذا هستر