[عروقي شماليه]

السَلام عليكمْ ورحمةَ اللهِ وبركآتةَ



.َ









الصيف راح وزمهرير الشتا حلّ
وأنا فقيرة حال وَاهْلِي فَقَارَا

يا شاعري عن مَطْلَبِي لَلْبَشَرْ : قِلّ
صيته تِبِيْ ، مِعْطَفْ: هنادي ، وِيَارا

لو يوم واحد بَدْفِنْ الفقر وَافِلّ
هذا الْحِجَاجْ اللي كساه الغبارا

وأدَوْس بأقدامي على فَرْشَة الزّل
لو نصف يوم أهْجُرْ حياة الطُفَارا

هذا الفقر مَا كَلّ مِنَا وَلاَ مَل
ولَهْ سطوةٍ جبّارةٍ مَا تُجَارَا

بيِدْيه سَلّ الحال ياشاعري سَلّ
ولبّس عيوني ليل ما له نهارا

كم قِلْت لَهْ دِخِيْل رَبْ السما : حِلّ
عنّا ، وكم صَيَّحْت ، فيها جِهَارا

وكم قِلْت لَهْ: فارق: عَنْ أرْوَاحَنَا: وَلّ
ويِقْبِلْ عدوٍّ من عدوّه تثارا

يا شاعري مِنْ تَلّة أوْجَاعَنَا طُلّ
ومِدّ الْبَصَرْ دَاخِلْ وِجِيْه الْحيارا


تلقى بِنَا: أعمى : وأطرم : وِمِنْشَلّ
وتلقى الأسَى يَسْكِنْ عيون الصغارا

و تِلْقَى هَيَاكِلْنَا حِلَهْ مَا لَهَا ظِلّ
عَنْهَا يطيح من النحول الأِزَارَا

تشرب قَهَرْ : والقوت بَحْلَوْقَهَا ذِلّ
ورغم الفقر تلبس عباة الوقارا

ومع كُلْ طَلْعَةْ شَمْس ، تِنْدَاسْ : تِنْذَلّ
والدين وصّى لاَ ضَرَرْ: لاَ ضِراراَ

مَا مَرُّهُمْ دِيْم الْرَفَاهِيّة وبَلّ
ظُمَى الكبود إنْ كَانْ بَلّ الصحارا

حِنّا: وَطَنْ والفقر غازي ومُحْتَلّ
والْعِرْض عن عين الرذيله تِوَارَا

نَعْرِفْ طريق المال ونشوف وَنْدِلّ
بس الثمن خُزْي :وفضيحه وعارا

ونَخَافْ ثوب الْطُهرْ في يوم يُبْتَلّ
الفقر كافر : والمصايب كبارا

تِتِلّنِا يُمْني الْفَقُرْ للخطا تَلّ
بالنفس كسر وبالعيون انكسارا

لو تصفع العابد يدين الفقر ضَلّ
وصارت له قبور الخطايا مزارا

يا شاعري سَوْلَفْت لك :جُزْء مِنْ كُلّ
عن فَقُرْ عَذْرا :كَمْ وَرَاهَا عَذَارا

وذولا يبيعون المزايين والْبِلّ
سَكْرَةْ زَمَنْ وِلاّ الأوادم سُكَارا

ناَظِرْ عيوني مَابَهَا مَاطْر ٍ هَلّ
جفّت سَحَايِبْهَا بليل السهارا


وتبقى قضية فَقْرَنَا مَا لَهَا حَلّ
يَا شَاعِري مَاتْت قُلوب الغيارا

ورَاحَتْ وأنَا أقْول الْفَقُرْ شَخْص مُنْحَلّ
أبغى أَدَارِيْهَا وهِيْ مَا تُدَارَا

أخاف أصَرّح ثُمْ عَلى راسي اتْهِلّ
سُحْب المصائب من يمين ويسارا

بَسْكِتْ وَبَبْلَعْهَا مِثِلْ كَاتِمْ الْغِلّ
وأقول ياربي تعين الفقارا

وسلام :يا نَرْجِسْ: وِكَادِي :وِيَا فُلّ
وسلام يَا كِذْبَة غِنَى وازْدِهَارا






..َالقصيدة كتبتهأ إمرأه فقيرة تشكيَ حالهاَ من الفقرَ
راقت لي فنقلتها لا أعرف كاتبتهاَ