[esraa.kh]

السلام عليكم اخويا عارفه انو هادا الموضوع من زمان.. بس اتمنى تنتبه لكلامي
انا طالبه متخرجه من نفس دفعتك ودرست في ام القرى منتظمه سنتين بس بماأني ماكنت مقتنعه بتخصصي بكل بساطه سحبت وجيت في بداية في السنه دي سجلت والحمد لله قبلوني بأريحيه تامه..
انا نسبتي الموزونه النهائيه كانت اعتقد 86 والقدرات 76 والتحصيلي 72 والثانوي 93%..
يعني مو بعيده عن درجاتك كتير..
المهم حاول تشوف النسبه الموزونه حقتك تكون اقل اقل اقل شيء 80 او81 هادا اقل شيء عالحافه واذا كانت الموزونه فوق ال85 إن شاء الله يجيك القبول بالراحه والله اعلم طبعن ((انتا خلي طموحك اعلى)) وكل ماكانت اكتر كانت فرصك اكبر.. بس لاتشيل هم انا 86 وقبلوني بالرااااااحه بس برضو قفلوو آخر نسبه اخدوها كانت للعلمي 84 ))عند البنات بسس((..

تاني حاجه اخوي.. اول مايفتح القبول في الجامعات سجل في كل الجامعات اللي باقي ماسجلت فيها سجل في كل مكان لانها آخر فرصه ليك سجل ام القرى ينبع الصناعيه كل مكان فقط للإحتياط..

تالت حاجه.. حابه انبهك على شيء بسيط ان شاء الله بس ابدن لاتشيل همو دحين بس فكر بيها (((بعد القدرات والتحصيلي والقبول))).. اكيد عارف انو في عزوز في مقرر انقلش اربعة مستويات تاخدو على مدار السنه بسسسسسسسس قبلها يسوو اختبار تحديد مستوى ((ماعليه درجات ولا لو دخل بالقبول في الجامعه هاادا الاختبار انقلش بعد القبول)) يختبروك عشان يحددو مستواك يعني انتا بأي لفل واي مستوى فالانقلش.. فمثلن اذا حليت بالاختبار وطلعت المستوى الرابع اللي هوا آخر مستوى فخلاص تدرسو في اول 6 اسابيع بسسسسسس وتخلص من دي الماده.. في الجهه التانيه غيرك اللي ماحل في الاختبار تمام رح يطلع المستوى الاول اوالثاني فهادا يقعد طول السنه مكروف يدرس 3 ساعات انقلش كلللللل يوم ومره رح يتعب.. اما انتا فخلاص اذا طلعت المستوى الرابع فخلاص تعدي وتشقح المستوى 1 و2 و3 وعلى طول بس تدرس الرابع..
انا مو قصدي اخوفك لا بالعكس بس بنبهك عليه هادا الاختبار اصلن مايتززاكر ابد بس ((حاول تطووور نفسك في الانقليزي ووقت الاختبار ررررررررركز واديه كل ماعندك..)) الطالبات دخلو وما أعاروه اي اهتمام وحلو اي كلام وخرجو وشوفهم الين نهاية السنه لسا لفل 3 وانا قيد مخلصه الانقلش من الترم الاول لاني ركزززت وقت الاختبار ودحين جدولي مرررررره خفيف كل يوم من 8 لا12 وعندي يومين اووف..!! وأقدر اركز واشد حيلي في المواد التانيه.. اما غيري كل يوم من 8 ل3 او 4 العصر 5ايام في الاسبوع كلو بسبب الانقلش بس..!

القدرات والتحصيلي والنسبه الموزونه.. فقط الخطوه الاولى لاتخاف منها ان شاء ميسره وقلوبنا معاك طمننا عليك لما تجيب القبول

الخطوه الأهم انك بعد القبول تشد حيلك في السنه التحضيريه من البدايه عثن لايروح تعب السنين دي لازم هادي السنه تشد حيلك وتجيب اعلى معدل عشان تدخل القسم اللي تتمناه ان شاء الله..

اتمنى بعد ماتجيب القبول من البدايه تشد حيلك وتكون افعال مو مجرد كلام زيي انا دخلت بعد تعب سنتين وكلو كلام كل شويه اقول بكره ازاكر بعد اسبوع ازاكر بعد الاجازه وكده راحت عليا ومعدلي مقبول بس مو راضيه عنو.. فاتمنى ماتسوي نفس غلطتي ومن البدايه تزاكر أول بأول..

ولاتقول انو ضاعت عليك ال3 سنين على فاضي الماضي راح وبما انك استفدت واتعلمت ولو شيء واحد هادي ال3 سنين صدقني ما خسرت شيء بالعكس كسبت خبره في الحياة وحتكون فاهم وواعي اكتر من غيرك وحيكون عندك هدف محدد وحتوصلو ان شاء الله وانتا حتشوف دا الشيء بإذن الله..سووري أدري مره طولت.. بس حبيت افيدك من تجربتي وبالتوووفيق ان شاء الله =)