[T@RIQ]

اهلين لمعه ،

انا بعد ماشفت موضوعك ، كلمت الوالدة وخالتي يعني عندهم شوية خبرة بالاعشاب.
المهم يقولون نفس الموضوع هذا حصل مع اثنين نعرفهم ، يعني انجرحوا وبعد كذا تطور الجرح لنفس وضع الوالد الله يقومه بالسلامه.

المهم الاثنين كلهم استخدموا عشبة المر ، والحمدلله نفعت معاهم ، طبعا هيا تختلف على حسب حالة كل شخص ، لكن الواحد لازم يكون أمله بالله كبير ، وفي النهاية هذي الادوية مجرد سبب والشفاء من عند الله.

بالنسبة لعشبة المر هذي تلاقونها عند العطارين ، وعلى حسب وصف الوالده وخالتي الله يحفظهم افضل شي يكون لونها عسلي وتكون حضرميه ، تتغلي في المويه وتتنقع من 3 الى 5 ساعات ، وبعد كذا يتغسل الجرح ويتنضف وبعدين تتحط عليه وتتلف ، وتتغير كل يوم 3 مرات او 5 مرات ، وتقدروا تسئلوا طبيب شعبي او عطار عنها واذا كانت تنفع للوالد وتسئلو عن طريقة استخدامها اذا ماعرفتوا تسووها.

المهم عشبة المر هذي ماينفع الاطفال الي مادخلوا المدارس يشموا ريحتها ، خصوصا اذا تغلت بالزيت لانه بعض الناس تغليها بالزيت لدرجة انه ريحتها تضر حتى الاطفال الي برا البيت ، لكن اذا ماتغلت وتنقعت بمويه فقط مايكون لها ريحه ، لكن للاحتياط لاتستخدم بمنزل فيه اطفال ، انا حبيت احذر عشان ابرئ ذمتي.

وبالنسبة للجروح عشان تلتئم لمرضى السكر ، من اول ماينجرح الواحد ينضف الجرح ، ويشتري عسل الغابة السوداء من السوبر ماركت ويحطه على الجرح ، وهذي الوصفه ماهي من عندي هذا دكتور قالها لواحد نعرفه وجربها والحمد لله نفعت معاه ، والدكتور انا راح ادلك عليه ، اسمه الدكتور عدنان المرداس جراح في مستشفى الملك عبد العزيز بجده وعنده عياده في مستشفى بخش بجده والافضل اذا حبيتوا تعدوا عليه تروحوله بمستشفى بخش لان حالة الوالد مستعجله الله يقومه بالسلامه.

وفي دكتور كمان يقرب لهذا الدكتور وهو الي دلنا عليه في مستشفى الملك فهد تخصص سكر اعتقد ، اسمه هاني المرداس كمان بجده.

وفي النهاية ، الله يقومه بالسلامه ويخليه لكم ، وان شاء الله تتطمنوا عليه وما يصير الا كل خير بأذن الله ، قولي اااااااااامين ، وياليت تطمنينا احنا كمان على صحة الوالد واذا عندك استفسار او اي شي لا يردك الا لسانك على قولهم ، واعتبريني مداوم بالمنتدى على طول ان شاء الله.
ولا تنسون الدعاء اهم شي هذي وصيتي لكي ، خصوصا في السجود وفي التشهد الاخير من كل صلاة وبين الاذان والاقامه وفي الساعة الاخيره من يوم الجمعه وفي الثلث الاخير من الليل ، كل هذي اوقات استجابة بإذن الله، ولاتنسون تسوون صدقة كمان.

استودعتكم الله في حفظه ورعايته وماتشوفون شر ان شاء الله.