[LeLou]

طيب أنا راح أبدأ بردودك واحد واحد واحاول أتناقش معاك و أوصل لك وجهة نظري بالتدريج شوية..
أحب أنوه أنه كل الكلام اللي أكتبه مو من اكتشافاتي و لا فلسفاتي،، و إنما هي أشياء اتوصل لها العلماء..
ما عدا مسألة الانفجار العظيم،، هذيك كانت وجهة نظر شخصية..

المشاركة الأصلية كتبت بواسطة سملّق :) أخت ليلو ،، ماشاء الله توني اشوف ان تخصصك فيزياء .. الله يوفقك وتكملي الماجستير بإمتياز ،،،،،،،،،،،،،،، أنا يا أختي اول شيء مجرد باحث ولست خبير .. واقرأ عنه بإستمرار ،،،،،،،،، حبيت أجيب لك افكار ، حسب دراستي للأمر

آمين يا رب،، و لا تحسب أنه معلوماتي من دراستي،، بالعكس كلها من البحث،، يا ليت اللي عندنا يعلمونا معنى الفيزياء في الأول ( لكن حرام مو الكل)..

المهم ما أبغى أخوض في مشاكل قسمنا..

نرجع للموضوع..

يا أختي الكريمة الحركة هذي مانقدر نوقفها زي ماقلتي .. ولكننا نقدر " نواكبها "!! مثال على ذلك ،، اذا مثلاً انتي ماتقدري توقفي سيارة تمشي 120 كلم/ساعة !! فيوجد طريقة ثانية توقفي هذي السيارة " بالنسبة لك " وهي انك تمشين بنفس سرعتها ، فتصبح بالنسبة لك واقفـة ! ما اقصده هنا وهو الفكرة الكبيرة اللي في راسي .. هي اننا ماراح نوقف هذي الحركات العظيمة ! ولكننا نستطيع ان نمشي بسرعات تقارب لسرعتها ( سرعة الضوء ) فنستطيع بذلك ايقافها بالنسبة الينا

طيب كلامك دا صحيح مية في المية في حكاية أنه الجسمين اللي بيمشوا بنفس السرعة بيكونوا ثابتين بالنسبة لبعض..
يعني أنا لو ركبت صاروخ سرعته نفس سرعة دوران الأرض حول الشمس و مشيت جنب الأرض راح أحسها ثابتة..
لكن دي الحركات سرعتها لا تقارن بسرعة الضوء،، يعني لو اتحركنا بسرعة الضوء راح نسبقها مو راح نوقفها،، و هي راح تقعد ماشية بسرعتها..
عشان يوقف الزمن،، لازم يتوقف كل شي عن الحركة عتى الفضاء بحد ذاته لازم ما يتحرك..

معلومة يمكن شوية خارجة عن الموضوع: سرعة الضوء هي السرعة القصوى في الكون تبعًا لنظرية آينشتاين،، مستحيل أي جسم يتعدى سرعة الضوء،، و عشان يوصل الجسم لسرعة الضوء لازم يكون عديم الكتلة..
بمجرد ما إنه يكون عنده أي كتلة مهما كانت صغيرة،، عمره ما راح يوصل لسرعة الضوء..

معلومة : ( الذباب عمره 7 ايام فقط ) هل تعتقدين انه يشعر بالسبعـة ايام هذه ،، زي مانشعر بها الآن ؟ (السلحفاة متوسط عمرها 150 سنة ) هل تعتقدين انه يشعر بالـ 150 سنة مثل ما نشعر انها طويلة ؟ حسب اعتقادي الشخصي / ان الحركة لها دور في هذا الشيء ،، وهذا الموضوع انا أدرسه الآن في هاليومين السلحفاة بطيئة ، واعتقد فقط اعتقد انه : بسبب حركتها البطيئة واستجابتها البطيئة فشعورها بالزمن سريع ( مثل الإلكترونات اللي ذكرتيها في مثالك ) الإلكترونات = سريعة جددددددداً ......... لذلك شعورها بالزمن بطيء جددددددداً والذبابة : تفقد الذاكرة كل 5 ثواني ، وهذا يدعم كلامي هذا .. وهذا يعني ان الـ 5 ثواني بالنسبة لها " فترة طويلة " لكي تنسى الماضي !!

أنا ما كنت حابة أخوض في دا الموضوع..
لكن إنت فتحت علينا باب جديد..
شكله الموضوع ما بيخلص و الإدارة بتطردنا ..

باختصار الموضوع دا حله عند اللي اسمهم Neurologists،، إللي هما الناس إللي بيدرسوا المخ و الأعصاب..

الدماغ يلعب دور في احساسنا بالزمن..
ليش لمن تكون تستنى الشغلة تحس الوقت بطيء،، و لما تكون مبسوط تحس الوقت مر بسرعة؟!
احنا كلنا بنمر بالزمن ثانية تلو الأخرى لكن مو دا اللي بنحس بيه..
في دراسات أثبتت أنه مع التقدم بالعمر احساسنا بالزمن يصير أسرع،، كأنه الزمن يمر بسرعة أكبر..
في الواقع احساسنا بالزمن بيتحكم بيه العوامل البيولوجية و السيكولوجيبة..

راح أعطيك مثال:~
أحيانًا لو في ناس بتدخن ماريجوانا،، راح يحس " أنا قاعد هنا من زمان،، من متى و أنا هنا"
إللي بيحصل أنه الشخص دا مو قادر على انه يحط علامة هو متى وصل هنا،، فبالتالي من غير العلامة دي راح يحس كأنه هو كان هنا من زمان..
كل شخص و بالتالي كل كائن حي له زمنه الشخصي اللي بتتحكم فيه أعصابه..
و كمان الحيوانات سبحان الله عقولها مو زي عقولنا و إدراكها مو زي إدراكنا أبدًا أبدًا..

عارفة أنه اللي قلته شرح غير وافي،، بس ما راح أزود عن كذا لأنه الكلام في دا الموضوع ما راح يخلص..
إذا حاب أوضح أكثر من كذا بأمثلة أخرى ما عندي مانع..

بس بقول حاجة:~
بالنسبة للسلحفاة،، المفروض إذا احنا شايفينها عايشة 100 سنة و احنا إللي أسرع منها في الحركة،، هي المفروض تحس نفسها عايشة 200 و لا 300 سنة..
إنت ما تعرف قد أيه لازم يكون الفرق في السرعة عشان ينتج فرق واضح في الزمن..
السلحفاة مهما كانت بطيئة فهي تعتبر في نطاق سرعة البني آدميين..
يعني إنت لو قعدت جالس ما تتحرك أو تزحف عالأرض بسرعة السلحفاة راح تحس الدقيقة مرت كثانية؟! بالعكس راح تشوفها مرت كأنها ساعة..
أنا أعتقد و الله أعلم أنه دا يرجع لطبيعة جهازها العصبي..

أخت ليلو .. ياليت ما اكون اثقلت عليك بالاسئلة ولكن لو سممممحتي مجرد توضيح بسيط لان التوضيح السابق ،، شوش علي وعجزت افهمه :( ياليت توضحين هالنقطة لاني احس اني قريت عنها سابقاً .. بس احس الموضوع مبهم بالنسبة لي

أمممم،، ماني عارفة كيف أشرح أكثر من الأول..
يا ليت تقتبس لي الأشياء إللي أشكلت عليك،، و توضح لي أيش إللي ما فهمته بالضبط..
و إن شاء الله أنا بعد ما أصحى من النوم راح أحاول أفكر في طريقة أفضل لشرح الفكرة دي..
و بالعكس ما في ثقالة،، أنا سعيدة أنه سنحت لي الفرصة أتكلم عن دا الموضوع،، و العلم مو حكر على أحد..
بالعكس أنا يسعدني أني أشارك ما تعلمته..

لي عودة إن شاء الله||~