[Dr.Shaikhah]

بعد إذن صاحب الموضوع حـ اجاوب =)

المشاركة الأصلية كتبت بواسطة دره جده لو سمحتو في ناس قالولي دا الكلام وابغى استفسركم يقولو ان لاتدخلي قسم الاشعه لأنه جدا خطير بعدين لمن تتوضفي !! ممكن توضحولي دي النقطه وبكل صراحه ؟؟ وشكرا

تخصص الأشعة التشخيصية الجميل , كثر الهرج واللقط والقيل والقال عليه من الغالب اللي مايعرفون حقيقة هذا التخصص
وحلو انك جيتي تسألين وتستفسرين مننا قبل تختاري التخصص

ممممم زي ماحنا عارفين ان الأشعة لها أضرار أكيد ولها منافع كمان في انها تكشف وتشخص المرض وممكن نعالج بها المريض كمان
وأن لو تعرضنا لها كثير ممكن تصابين بسرطان لاسمح الله
حتى أشعة الشمس مثلا مع ان لها فائدة في تكوين اليود بالجسم لكن لو جلسنا 24 ساعة تحت الشمس بنحترق وبيجينا سرطان
لكننا كأخصائيي وأخصائيات اشعة درسنا في سنة ثانيه من السمستر الأول مادة اسمها Radiobiology & Radiation protection < الإشعاع الحيوي والحماية من الإشعاع
فيه تدرسين اساليب الوقاية والحماية من الإشعاع وكيف تحمين نفسك وايش الجرعات اللي مفروض ماتتعديها خلال فترة معينة عشان تكوني في السليم ومتى مفروض ماتتعرضين لأشعة
وراح يكون معاك جهاز صغير تعلقينه فترة التدريب واذا توظفتي ان شاء الله يقيس مدى الإشعاع اللي تعرضتي له بحيث انهم يشيكون عليه مابين فترة وفترة عشان يتأكدون انك ماتعرضتي لجرعة تضرك

وانتي اذا اتبعتي هالأساليب ماراح يصير عليك شي
في دكاترة لهم دهور في مجال الأشعه وصاحيين مافيهم شي
السر يكمن في مدى اهتمامك بالوقاية من الأشعه وان الأشياء اللي بيعلمونك اياها تطبقينها وماتتجاهلينها

والله يحميكِ

المشاركة الأصلية كتبت بواسطة Dr-JooJ س سؤال دي السنه مافي ناس حتدخل أشعة؟؟! لانو ماني شايفا احد جالس يسال حسيت اني حكون لوحدي اقربع في الكليه

لا في ان شاء الله بس اغلبهم مايدخلون المنتدى يمكن
لا تستعجلين عليهم

المشاركة الأصلية كتبت بواسطة NoOoNy360 اول شي مررره شكرا على الموضوع وجزاك الله خير تاني شي انا اللي عرفتو انو اول ماتتخصص اشعة هتكون في مادة رياضيات<< اش رح ناخد في الرياضيات يعني لو مثلا حسيت نفسي ماقدرت امشي في الأشعة وحبيت أحول هندسة ممكن تتعادل هادي المادة؟؟ وكمان انا محتارة بين الأشعة والتغذية بس يمكن حاسة كأنو الأشعة ممتع اكتر بس مني عارفة ايت اصعب << ممكن تفيدوني بمعلومات

لا تطمني مافي رياضيات ولا راح تشمي ريحته بعد

بالنسبة للتخصص الأحسن انتي شوفي تميلي اكثر لأيش واقرأي عن مواد كل تخصص وشوفي الأقرب لك واللي تحبينه , اقرأي عن طبيعة العمل بعدين كمان وتخيلي نفسك وشوفي ايش تحبي تكوني اكثر اخصائية اشعة او اخصائية تغذية

انا ما أروّج لتخصصي بس ماراح تندمي اذا اخترتيه