رد: الطالب المستجد في جامعة المؤسس .. الرجاااااء الدخول
1- مسألة الكتب أو المراجع الدراسية : يعني وشهي المذكرات ووشهي المراجع اللي يقول شف مرجع كذا وكذا ووشهي المواد اللي تحتاج إلى شراء الكتب والعكس من المواد اللتي تكفي عنها المراجع ؟ وكم تحتاج من المبالغ المالية ( بالتفصيل) ؟ وماهي اللاسيدات والأشياء هذي ؟
خطة ا
ماث انا درسة من الكتاب القديم وكفاني و غير كدا كان عندي مدرس خصوصي مره ممتاز سهلي الماده بعد الله بعد ما كنت اشوفها مره صعبه
فيزيا يوسف زويل و اشرف بركات وافضل افهم من يوسف و اطبق ف اشرف و كمان مره مهمه اسألة السنوات الماضيه
ملاحضة : كتاب الفيزيا مره مو مهم فا لاتشتروه
مهارات اتصال : اقرأ الكتاب مره بتركيز مره كفايه كدا و طبعا لازم تسلم كل التكاليف عشان ما تنقص الماده مره حلوه وممتعه تحس انها تخرجك من جو الجامعه والي حيكون عند دكتوره اميره النمر اضمنلو انو حيستمتع بالماده
الحاسب: الماده مره سهله بس كنت دايما ما افهم كيف تجي اسألة النظري بس لحد يستسهل فيها ومايذاكر يبالها تركيز بذات النظري
الي يبدأ بخطه الف مره يحاول يجيب ف المهارات و الحاسب و الماث اي بالكتير لانها مره سهله و حلوه
اما بالنسبه ليا كانت عقبتي ف الخطه دي الفيزيا
خطه ب
احصاء : كتاب + جمال السعدي + لحد يفوت ولا محاضره خصوصا مع ريم الحربي او سماح سندي + اسألة سنوات سابقه قد ما تقدرو حلو+ في كتيب مصطلحات يجي مع نفس الكتاب بعد ما تخلصو مزاكره احفظو المصطلحات من الكتيب دا
و افضل انو ماتعتمدو ع جمال السعدي خصوصا في الدوري التاني و الفاينل لانو الكتاب كان فيها افضل
كيمياء: سلايدات ليلى الحربي بلا منازع + تست بانك فقطططط و اضمنلك بأذن الله البلس >> بالنسبه للبنات طبعا
الاحياء : احم الماده دي ما اعرف كيف هيا الماده الوحيده الي حملتها رغم درجاتي كلها ف اغلب المواد ف البلس حملتها عشان مره كنت مهملتها و اغلب الاختبارات ما اروح مزاكره بس لمن اخدتها صيفي اخدت فيها البلس لانو مزاكره اول بأول وافهم ف الكلاس و مره حسيت انها سهله و ندمت ندم عمري اني اهملتها
كل الناس تقول كتير عشان يسمعو 4 شباتر دوري اول 6 دوري تاني 10 فاينل فا كان يجيني تحطيم واقول ما اقدر ازاكرها بس لمن تزاكروها ما تحسوها مره كتيره
بالنسبه للانجلش انا بديت من ليفيل 2 كلها سهله وحلوه بس اسوء شي كان ليفيل 3 فا مره ركزو فيه او يمكن عشان الاستاذه كانت سيئه مدري ما حبيتو والانجلش الكتاب يكفي ويوفي
2- كيف تكون أول الأيام الدراسية ؟ وكيف يكون اليوم منذ ذهاب الطالب إلى الجامعة حتى عوده؟
اول يوم كرهت الجامعه وطبيعي جدن ترجع البيت وتقول ما تبا تكمل دراسه خصوصا انو ما تكون من نفس جده و محد معاكي من صحبات المدرسه فا لحد يتسرع ف دي الفتره و يسحب كلها اسبوعين وتتعودو واحس التعود يجي خصوصا ف كلاسات الانجلش لانو الطالبات ما يتغيرو و وقت طويل مع بعض فا من هنا حتكونو صداقات
اول اسبوع كلو مافي دراسه فعليه من تاني اسبوع يبدا الجد افضل تروحو يوم واحد ف اول اسبوع بس ما يكون اول يوم يعني يا الربوع او الاتنين عشان تتعرفو ع القاعات وتشوفو الكتب و والدكاتره عشان تاني اسبوع من جد حتبدا الدراسه صح
وقت الطالب ف الجامعه انا بالنسه لجدولي كانت محاضراتي ورا بعض و ماعندي بيركات و احس مره كان حلو اروح بدري واخلص بدري فا ما اجلس كتير ف الجامعه فا ما كنت اعرف اغلب الملتقيات و دي الاشياء
و فيه شي كنت احس بيه انو صح في دراسه ف الجامعه وقرف زي المدرسه بس اليوم الدراسي ابدا مو ممل ف الجامعه يمكن عشان فيه حريه اكتر و جوالات وتقدر تاكل ف المحاضره ومافي تسلط الابلات
3- ماهي طريقة الطالب مع الدكاترة ؟ وكيف تكون أجواء المحاضرة ؟ هل تكون أشبه بالحصة في المرحلة الثانوية أم أنها تحتلف؟
يب عادي ما فرقت بس في الجامعه فيه راحه اكتر وحريه اكبر و مللل اقل
عن نفسي اي محاضره ممله وتكون الدكتوره ماتشرح قبل المحاضره نشتري. انا وصحباتي اكل وناكل ف المحاضره وتروح كلها ضحك واكل وفله ومحد داري عنك بس طبعا دي بس في المحاضرات الي مانفهم من الدكتوره زي الفيزيا و الحاسب
اما في كلاسات الانجلش خصوصا لو الاستاذه شديده ما تقدر لا تهش و لا تنش و دا عشان عدد الطالبات قليل و الكلاسات صغيره فا تسوي اي حركه مفضوحه مفضوحه هوا الكلاس الوحيد الي يرجعني لايام المدرسه
4-الزي الذي يلبسه الطالب في اليوم الدراسي؟؟
في السليمانيه تعالي بدري و البسي الي تبيه بس برضو يعني لحد يتمادا يعني عادي كنت البس بنطلون وتيشيرت عادي بس كنت بالعبايه خصوصا في الممرات اما جوت الكلاس عادي بدون عبايه
5- الوقت القصير مابين المحاضرات ماذا عنه؟
الوقت القصير ال 10 دقايق يادوب تتنقل من كلاس لكلاس فا ما كنا نعترف بال 10 دقايق خصوصا انو انا ما كان عندي بيركات فا كلو ورا بعضو
6- كم يستغرق من الوقت الانتقال من مبنى إلى مبنى مثلا من مبنى 91 إلى مبنى 31؟
ابعد مبنى كان 12 و كنت اخد في انجلش ليفيل 2
افضل مبنى 7 احسو نظيف و مريح الي هوا مبنى العلوم كنت اخد فيه ماث وفيزيا وكيميا و احصاء و مهارات يعني مره دا المبنى مهم ف التحضيري
مبنى 3 في النص كنت اخذ في حاسب جيد المبنى بس احسو قديم
مبنى460 قدام بوابه شماليه 3 دا المبنى كلو انجليزي اضن اخدت فيه ليفيل 3 وقتها كانو دوبهم فاكينو المبنى جديد ونظيف ومرتب ع حسب اخر مره دخلتو ما يبعد المبنى عن 7 و 3 في النص
مبنى 13 مره قديم كنت اخد فيه انجلش ليفيل 4 بس عادي
دي المباني الي درسة فيها
اقرب بوابه ل 12 شماليه 1
اقرب بوابه ل 7 غربيه 1 اضن او 2 نسيت رقمها و حتى شماليه 3 تعتبر قريبه
اقرب بوابه ل 460 شماليه 3
و للكسلانين الي ما يحبو يمشو فيه سيارات قولف توديكم للمبنى الي تبوه استعملو القولف خصوصا ف البدايه عشان ما تحوسو
8- أيضا سؤال خارج عن جوّ الدراسة وهو السكن هل هو قريب من الأماكن العامة مثل الأسواق والمطاعم وهكذا؟؟
السليمانيه اقرب شي لها الاندلس و فيه ماك والبيك وكارفور دا الي اعرفو
9-أيضا المكآفأة :متى يستلم الطالب أول مكآفأة ؟
استلمنا البطايق في تالت او تاني اسبوع مدري الي افتكرو انو اول ما استلمناها كان فيها مكافأت شهر 10 و بعدها بس فتره نزلت مكافأت شهر 11
طبعا هما يحددو يوم وموعد ومكان استلام البطاقه ع حسب الرقم الجامعي ترتيب الايام
10- وأخيرا اللي عنده نقطة يحب أن يوضحها ولم أذكرها يتفضل
احس مره طولت والاسأله كفت و وفت جاوبت عشان من جد بداية ما دخلت الجامعه كنت اتمنى دي الاجابات و الله يوفق الجميع
|