السلام عليكم ورحمة الله وبركاته
سامحوني حبيباتي بس رح اكتب كل شيء عندي عشن افيد اللي بعدي وأتمنى كل بنت تكتب في المواد اللي عندها..
المستوى الثالث
بسم الله نبدأ
Econ107 الإقتصاد الجزئي : مع هدى خيري عبد الحميد
أستاذه عسل بصراحه وأخلاااااق حتى لوكنتي مضيعه في حصتها عادي تضحكلك بس ماآآآتحب الكلام أثناء المحاضره اكييد
اول ماحضرتلها انفجعت لأنها تقرأ السلايدات وتترجم بعدين تشرح شويه بصراحه تفهمي اذا تركزي
شرحها حلووو ماكتشفت دا الشيء الا آخر الترم لما بدأت اركز
بس الاقتصاد مايبغالو هداك الشرح الا في جزئيات التمارين ركزوو..
بس بصراحه هيا اكتر استاذه مرتااااحتلها تعاملها طيييب وسهل دايمن تقول اللي عندها اسئله تجي تسألني
تحضر كل كلاس يعني لازم تحضري وال10 درجات للواجبات تديكي 6 واجبات مافيها تعقيد وأغلبها تكون من التست بانك!
حتى أسئلة الاختبار سهله ومن التست بانك تساعدك وقت الاختبار وتقدر وضعك اذا كلمتيها وتشلك الغيابات اذا سرلك حرمان..
Account 117 محاسبه: مع سحر جبروني
مو قد المدح صحيح شرحها تمااام ولكن انا اهم شيء عندي الاخلاق للأسف كتير احيان تعاملها جااااف وأبدن ما أرتااااح لأسلوبها وتعاملها..
بعكس بعض الطالبات يرتاحو لطريقتها بس انا ابدن لاء..
نظامها زي المدرسه لازم تشاركي وتنتبهي في الكلاس وفي البدايه كانت تسأل قبل ماتبدأ المحاضره عن المحاضره
اللي فاتت وتنادي عالاسامي اللي عندها بالكشف!!+ اذا مسكتي الجوال اتحملي التهزيء والهجوم اللي يجيكي قدام كل الكلاس
+ أبدن مهي متساهله في الحضور والغياب والتأخير بغياب
شرحها حلوو يفهم و to the point بس اللي متعوده تتأخر وماتركز ما انصحها تروح عندها الااا والاااااا وهيا مدية الماده حقها وحاسبه حسابها
ومنتبهه من البدايه ومركزه وحاضره عالوقت واكيييد بتنبسط.. ولااااازم مجهود منك في المذاكره كمان لاتعتمدي عليها بس
أما اذا غير كده بتكرهي المحاسبه..
وماتعطي واجبات وال10 درجات بيدهاآآ حسب مشاركتك
بس ماشاء الله عليها بتعرف أغلب البنات.. طبعن كل بنت لها رأيها والأسلوب اللي يريحها
Arab101 عربي: مع أستاذه نسرين بامنصور
انسانه رائعه جدن انيقه ومرتبه أخلاقها رااائعه وحتى شرحهاااا رآآآآآآآئع بس نظاميه
بس تحضررر كل كلاااس اسم اسم يعني لااازم تحضري وماشاء الله كل البنات بحترموها وماحدا بيتكلم في كلاسها.. تعاملها سههل حتى في التحضير اذا كلمتيها بتقبل عذرك بصدر رحب
English201 : مع مس رجاء
أستاذه طيبه وعسل ومتساهله ومتفهمه عادي تتأخري تلت ساعه نص ساعه ماتحضري تخرجي على كييفك
بس ماتتكلمي في الكلاس والتحضير تطلع ورقه كل محاضره وتمررها عالكلاس يعني من ناحية الفله فلله..
نجي للشرح شرحها قليل بالنسبه لكلامها الجانبي ونصايحها اللي مااااااتخلص بس لما تنتبهي معاها تفهمي وشرحها حلووو..
تعمل شوية كويزات مررررررررره سهله وبيدها درجات كتير فتشاركي معاها وتحفظيها اسمك بداية السنه وتمشي معاها تماااااام..
تركيزها في الشرح عالرايتنق وماتشرح القرامر كتير
Stat271 إحصاء أعمال: مع هبه باشيخ
أستاذه طيييييبه ومخلصه ومتفهمه وشرحها حلووو كويس ويفهم شويه لخبوطي وسريييييع بحكم انو الماده كده
بس ماااااتحب الكلام وقت المحاضره وتلتزم بالماده والتحضير بس والله عسل اذا منتي فاهمه شيء تروحيلها وهيا على اتم استعداد انها تراجعلك الشبتر كلوو..
بس أهم شيييييييييييء من أووووووووول محاااضره تكتبوو معاها كل كلمه تقولها لأنو الشرح مو موجود في الكتاب واذا مامشيتو معاها من البدايه صح رح تضيعوو..
نحنا كنا مضيعين في الماده رحنالها انا وصحباتي وراجعتلنا اغلب شباتر اللي موفاهمينها الله يجزاها الجنه..
مخلصه وفاهمه الماده بس شرحها سررريع ممكن تضيعي اذا ماتنتبهي تمام على نفسك.. هيا الماده قلق وواجبات وبحوث فأنتبهو لها من البدايه
ومن المستوى السادس
Mrkt260 تسويق: مع أسماء زاهر
أستاذه أسماء زاهر والله بصراحه مع اننا نجلس مفهيين في الكلاس بس شرحها كويس تديكي امثله عشن تفهمي
بس اغلب شرحها قراءة من السلايدات لأنو الماركتنق هوا كلو مصطلحات وحفظ ومنهج طويل فلازم تسرع..
هيا هنديه فطبعن شرحها وكلامها كلووو انقلش بس بتدي امثله وتوصل المعلومه و الحلو فيها تديكي كم واجب مقالي مو صعبين
واتوقع بتاخدي عليهم ال10 حقت المشاركه.. وأي شيء منتي فاهمتو تروحي تسأليها وتحرص انها تفهمك هوا..
أحلا شيء انها تقلك عالمواضيع المهمه قبل كل اختبار وهادي المواضيع المهمه هيا اللي تجي في الاختبار..
واذا ماقالتلكم روحو اسألوها ايش المواضيع اللي نركز عليها وبتساعدكم..
التحضير تحضر بداية كل كلاس.. شرحها مو مره تسأل كتير احيان تحب احد يشاركها ويناقشها بس طبعن ماعندنا سالفه..
بس مرره مرتاااحه معاها بصراحه..
اتمنى اكون افدتكم ولو يشيء بسيط
وأتمنى لكم التووفيق