[HU~]

أنا كنت عند أستاذة آسيا زقزوق: هي مو معروفة لأنها أول مرة تدرس تحضيري أعتقد ، بس كانت ماشاء الله كويسة و تفهم .. والله يسعدها تهتم فينا كتير و تحاول قد ماتقدر تغطي أكبر كمية ممكنة من الأفكار و كانت تعملنا ملخصات لكل سكشن عشان تسهّل علينا .. عيبها الوحيد: * يمكن إنّها كانت تاخدنا أحياناً ساعات زيادة عشان نختم المنهج بس أعتقد كل الشعب نفس الوضع عشان الرياضيات منهجه طويل و يبغاله وقت، * و كمان إنّها مو مرتبة يعني عشوائية نوعاً ما في توصيل الفكرة بس في الأخير صارت تنتبه لنفسها و تحاول قد ماتقدر ترتب أفكارها و صارت متمكنة أكتر وبالذات بعد ماسارت تعمل ملخصات .. و غير كدا لو عندك أسألة ماتقصر و تشرحلك ، و من مميزاتها كمان: إنها تبدأ معاكي خطوة بخطوة يعني في ناس كتير مو متأسسين رياضيات صح ف هي بتراعي هذا الشي فينا ~
بالنسبة لأسلوبها: بإختصار طيبة و محترمة، بس عصبية شوييية، تتنرفز بسرعة لو شافت اتنين يتكلمو، غير كدا تنصحنا دايماً و تعطينا أمل في الحياة لوول و تهون علينا و تراعي ظروفنا ~

طريقة مذاكرة الرياضيات: كنت أنتبه معاها و أكتب الملاحظات اللي تقولها و أرجع البيت أفتح الدرس و أراجعه و أحل الهوم وورك آخر كل سكشن و أكتر حاجة ساعدتني هي الوورك شوب في موقع الأستاذة: دعاء قاروت + نماذج إختبار سابقة !! وإن شاء الله a+

عارفة كلامي كتير بس ماحبيت إني أخرج بدون ما أقول كل شي أعرفه عن دي الأستاذة .. و نصيحة يمكن تتلخبطي في البداية و ماتتعودي على طريقة شرحها بس لو طوّل دا الوضع معاكي حاولي تحضري عند أحد تاني ~ و أساساً منهج الرياضيات مكرر من ثالث ثانوي و غير كدا قد ماتدربي يدك على المسائل و الأفكار قد ماحترتاحي في الإختبار بإذن الله و بالتوفيق ~