[M7mmd.Y]

وعليكم السلام ورحمة الله وبركاته،،

عزيزي محمد، قرار زي هذا انت الوحيد اللي تحدده، استخير الله اول شيء، وبعدين شوف قلبك لأيش يميل

رح افيدك باللي اعرفه:

برنامج ارامكو فيه واحد من اصحابي في الثانوي دخله، تعب معاهم لأنه كل فترة يروح مكان، مرة "راس تنورة"

مرة "بقيق" وزي كدا، يقضي فترة هناك ويرجع جدة، والتذاكر عليهم طبعًا

لكن اقدر اقولك انه تعب مرة، ولكن اكيد كل شيء بحقه ;) ماديًا مرتاح

بينما لما تكون هندسة، فيه برنامج لأرامكو خاص اسمه على ما اعتقد ccp وهو ابتعاث داخلي

يعني تكون في الجامعة زي ما انتا وتكمل دراستك طبيعي،

لكن توقع عقد معاهم وتكون كأنك اتوظفت عندهم خلاص ويعطوك كافة المميزات

بدلات + مكافأة شهرية محترمة + تأمين + تذاكر سنوية .... زي برنامج سابك برضو

الميزة هنا؛ صح انك ملزم تشتغل معاهم قد الفترة اللي ابتعثوك فيها " وقت دخولك البرنامج "

لكن بعد ما تخلص الفترة هذي تقدر تسحب عليهم وتروح المكان اللي تبغاه بشهادتك كـ مهندس

وحتى لو ما دخلت اي برنامج من برامج الابتعاث الداخلي هذي، وقت ما تتخرج بتعرف قيمة شهادة الهندسة

لأن بيكون عندك - بإذن الله - اختيارات كثير، على عكس ما تكون مربوط بشركة واحدة بس،

وما اعرف الحقيقة عن البرنامج حق الثانوية هذا، وقت ما تخلص دراسة ايش بيكون المسمى الوظيفي حقك وايش شهادتك

استفسر عن الشيء هذا لأني ما عندي معلومات كثير عنه، إن شاء الله اكون افدتك ولو بالقليل

بس شيء اخير، لو قررت انك تكمل في الجامعة لازم تشد حيلك وترفع معدلك، وركز على المواد:

فيزياء - ماث - انجليزي، هي مفتاح دخولك للهندسة، حاول قدر الامكان ترفع معدلك لـ 4 او فوق

عشان تضمن الهندسة بإذن الله،،

دحين، اكتبلي كل الاسئلة اللي عندك بخصوص الهندسة وإن شاء الله اجاوب على اللي اعرفه

وربي يسهلك امرك،،