[T@RIQ]

وعليكم السلام ورحمة الله وبركاته

هلا اخوي، اسمحلي اخذ راحتي معاك بالنقاش.

اولا لازم نرتب الامور عشان تكون واضحه ليه ولك، وبإذن الله بعد كذا راح يسهل الاختيار.

انت عندك خيارين تفكر فيها الوظيفة الحكومية او وظيفة بالقطاع الخاص واش هيا التخصصات المناسبة لها.

في الاول نبدء من وضعك الراهن، انت على وظيفة حكومية بالمرتبة السابعة ما شاء الله تبارك الله، وهذا شي طيب وحلو بالوقت الحاضر بسبب قلة الوظائف الحكومية.
وبالنسبة للشهادة معاك بكالوريوس ادارة عامة وهو مناسب لهذه الوظيفة، لكن انت لك حق مشروع وهو بحثك عن الافضل، طيب في حالة كملت على نفس وظيفتك معناته الافضل بالنسبة لك انك تكمل الماستر بنفس تخصصك واذا كفى الوقت معاك تقدر تأخذ الدكتوراه حتى لو تتأخر بعد زوجتك سنه ان شاء الله مو مشكلة ممكن ترتبها مع جهة عملك وتثبت انك ماشي بالدكتوراة ومابقيلك كثير ويمشي الحال ان شاء الله، اهم شي تكون لغتك الانجليزية طيبة عشان ما تطول بدراسة المعهد، واذا كانت انجليزيتك ممتازة من الان خذ التوفل واطلع جاهز عشان تبدء الماستر مباشرة بإذن الله، او تكمل الدكتوراة بنظام المراسلة من هنا وانت اصلا وقتها راح تكون مشيت خطوة كبيرة ان شاء الله.

اما اذا رجعت بالماستر فقط حتترقى ان شاء الله للمرتبة الثامنة، ومع بقية شهاداتك وخبرتك واتقانك اللغة الانجليزية بإذن الله ما راح تطول على الثامنة وحتكون ترقيتك سريعه ما شاء الله تبارك الله، واذا قدرت تجيب الدكتوراة كمان هذي لها وضع اخر بإذن الله.
اما اخذ بكالوريوس اخر والاكمال بالوظيفة الحكومية ماراح يفيدك كثير والله اعلم.

طيب الان بخصوص التوجه الاخر القطاع الخاص، شوف انك تبدء من الصفر هذي العملية مرهقة انا اشوفها كذا انت حر برأيك، وخصوصا انك اخرتها حتجي ببكالوريوس يعني عندك زيه الفرق بالتخصص فقط، اما اذا عادلت شهادة الكلية التقنية وكانت المعادلة عادلة بمعنى انك حترتاح مثلا من نصف المده وتتعادل لك باربعة اترام او على الاقل ثلاثة هنا ممكن اشجعك اذا كان لك رغبة بالقطاع الخاص، ولكن هذا الشيء اشك فيه ما ابغى احطمك لكن هنا جامعة الملك عبد العزيز تعادل التقنية بترم واحد او ترمين والله ناسي المهم واحد من الاثنين فما بالك بالخارج ربما يكون اصلا غير معترف فيه بالنسبه لهم، ربما انا ما ابغى احطمك اسأل وتأكد، ولكن اذا كانت المعادلة جيده يمكنك ايضا ان تكمل الماستر بالخارج، وبكذا ان شاء الله ترجع بالماجستير وهذا يعتبر شي جيد لانه فعلا انت انتقلت من مستوى الى مستوى اخر بشهادة الماجستير.
لكن في هذه الحالة لا تنسى انك لما حترجع سواء بكالوريوس او ماجستير انك راح تبدء بالبحث عن وظيفة في القطاع الخاص والله العالم عن الراتب الي راح يعطونك اياه.

يعني بصراحه انا افضل الخيار الاول المخاطرة اقل والربح بإذن الله مضمون وزي مايقولوا عصفور باليد.

في حالتين فقط واحده فقط ادعمك بقرار البدء ببكالوريوس جديد،
الاولى انك ما تكتفي بشهادة البكالوريوس، يعني مثلا انت درست محاسبة ممكن تكمل بكالوريوس محاسبة وتحصل على شهادة محاسب قانوني من امريكا، اكيد بما انك درست محاسبة تعرف قيمة هذي الشهادة، وغيرها على حسب تخصص البكالوريوس الي راح تكمل فيه خصوصا التخصصات المالية والقانونية لديها شهادات عالمية قوية بعد البكالوريوس ومعضمها لن تأخذ منك حتى سنة واحدة ان شاء الله لأخذها وتكون اقوى من شهادة الماستر ايضا.

الثانية انك تكون مقرر بدء عمل خاص، فتح مكتب مثلا للاستشارات القانونية او فتح مكتب للمحاسبة القانونية وغيرها، المهم ان تتأكد من جلبك للشهادات الازمة لذلك.

اخيرا سامحني على الاطالة لكن موضوعك فعلا معقد وان شاء الله اني ما أكون نسيت شيء، هذا رأيي انا والله اعلم وإن اصبت فمن الله وإن اخطأت فمن نفسي والشيطان، وتأكد اخي ان الخيره فيما يختاره الله عز وجل لك فهو علام الغيوب، ولذلك انصحك بالاستخارة فهي مفتاح النجاح.

بالتوفيق ان شاء الله، وأسأل الله ان ييسر لك ماهو خير لك ولجميع المسلمين بإذنه عز وجل.

دعواتك الصادقة في ظهر الغيب لي ولجميع المسلمين، اخوك طارق.



ملاحظة اخيرة ، إن شاء الله او إن شاء المولى تكتب هكذا، وليست انشاء