[Wishes~]

يعطيك العافية على الموضوع المحفز
اتمنى تكون سنه حماسيه وكلها توفيق ونجاح بإذن الله

انقل لكم نصائح من تجربة احدى الطالبات بصراحة جداً افادتني

..

لجميع أخواتي المستجدّات، أعرف شعوركم بهاللحظة والخوف من اللي جايّكم وكيف راح تتأقلمون؟ وكيف بتكون هالجامعة اللي دايم نسمع عنها وعن الأشياء اللي تصير فيها؟ كيف بأكون محتكّة بمحيط كبير بعدما كنت بمدرسة ومحيطها صغير جدًا؟
أول شيء حطّي بين عيونك حلمك وهدفك اللي تعبتي عشانه بالثانوي وبذلتني حتّى نلتي أعلى الدرجات!
استعيني بالله وتوكّلي عليه واحتسبي أجر كل خطوة تخطينها في سبيل العلم، تذكّري إن "من سلك طريقًا يلتمس به علمًا" وش جزاءه؟ "سهّل الله له بهِ طريقًا إلى الجنّة" أنتِ متعلمة متعلمة بكل الحالات، يكون علمك هذا طريق للجنّة أو يروح عليك أجره؟.
بتواجهين أول الأيام ممكن ضيق أو عدم ارتياح أو أحيانًا بتحسّين إنك حنيتي للثانوي وتبين ترجعين.
أنا أسبوعين يمكن كانوا ثقال عليّ جدًا!
وكنت دايمًا أرجع للبيت وأنا ضايق صدري وبس أفكر أترك الدراسة وأجلس بالبيت أو أحوّل لجامعة ثانية، بما أنّ جامعتنا كان الدوام فيها طويل لـ 3.
وعلى شوّي شوي وبتوفيق الله ثم دعم أهلي لي تأقلمت وحبّيت الجامعة!
صرت أروح كل يوم وأنا متفائلة جدًا و واثقة إن يومي بيكون جميل مهما كان متعب. أو يمكن بقدّ تعبه يكون جماله.
أول شيء حاولي تكونين لطيفة بالتعامل، والابتسامة دايمًا على شفاكِ، ظنّي بالناس خير وعطي نفسك فرصة الحديث مع غيرك أو التعرّف عليهم، بتلاقين شخصيات غريبة، وشخصيات تشبهك، وناس عمرك ما توقعتي تقابلين أحد منهم، زي أنّ بكل مكان فيه شيء جميل بنفس الوقت لازم يكون فيه شيء سيء.
حاولي بقدّ ماتقدرين ماتكوّنين علاقات سريعة، أيوه أجلسي معاهم واضحكي وكلّش بس لا تحاولين تعمّقين العلاقة لأن يلزمك وقت حتّى تعرفين الناس.
رتّبي وقتك واستفيدي من كل وقت فراغ يجيك وخصوصًا إذا جامعتك أو قسمك فيه بريكات كثيرة.
الترم الأول فاتت علينا، بس الترم الثاني استفدت منها كثثثير! استفيدي منها سواء بحضور دورات أو بمذاكرة مادة صعبة أو أي شيء مفيد لك :")
إذا أنتِ تحضيري غالبًا طاقم التدريس يكون منتقى بعناية ويكونون على كفاءة عالية، وإذا حتّى مو تحضيري تأكّدي إنّه بيكونون بإذن الله بقدرات عالية ()
خليك محترمة ولا تتأخرين عن المحاضرات، بأول يوم اطبعي جدولك مع أماكن القاعات حاولي تدورين الجامعة كلّها حتى تتعرفين على أماكن محاضراتك.
الدكتورات كلهم أو المدربات يهتمّون بالوقت! وأهم شيء هو قبل الشطارة أو الفعاليّة بالمحاضرة.
حاولي قدّ ماتقدرين تذاكرين أول بأول لأن هذا الشيء اللي يفرّق بين الحريص واللي يبي الدرجات العالية والعكس، وهالشيء بيريحك بعدين بشكل ملحووظ!
حاولي تعاملين نفسك بمبدأ المكافأة كلما أنجزت هالجزء بأعطي نفسي الشيء اللي تحبّه وهكذا.
اسألي الله الصحبة الصالحة لأنّها من أساسيات نجاح الواحد، لا تغترين بالبنات ومظاهرهم لأن الصحبة الصالحة هي الوحيدة اللي بتحبّك عشانك أنتِ وبتكمل معاك للأخير، لا تسمعين لكلام المحبّطين والبنات اللي دايمًا يتذمّرون ويتشكّون! هذولي أكبر سبب لفشل الكثير من الناس اللي سمعوا لهم وانجذبوا لهم. دايمًا حطّي بين عيونك إن اللي يبي الشيء الزين لازم يتعب عشانه.
الدراسة الجامعية ممتعة جدًا! وحتّى وإن تعبنا أحيانًا هي فيها من الأشياء الجميلة الكثثير! تذكّري أنّك أنتِ أم المستقبل، وأنتِ اللي بتصنعين الغدّ وبتكونين من شباب الإسلام اللي بيرفعونه عاليًا!

بتتغير يمكن شوي من شخصيتك بالجامعة بتكونين اعتماديّة على نفسك أكثر وبتصقل جوانب إيجابية في شخصيتك، إذا أنتِ فعلًا حرصتي على تطويرها.
مافيه قسم بالحياة صعب وقسم سهل، يختلف القسم على حسب الشخص اللي يدرس فيه، والله بذل وتعب بيصير سهل، ما بذل وحطّ يدّه على خدّه بيصير صعب وجدًا بعد!
الصلوات لا تفوتينها دايمًا بيكون فيه وقت للصلاة والضحى بعد()
وفي كل صباح حطّي لك صندوق صغير وكل يوم دخلي فيه ريال، تكونين فيها قريبة من الله، والصدقة دايمًا تدفع الأذى:" والملائكة كل يوم تقول: " اللهم اعطي ممسكاً تلفاً واعطي منفقاً خلفًا"

كوني مرتّبة بلبسك، لا تحاولين تتزينين مرّة لأنه صرح تعليمي، ولا تكونين مبهذلة لأنه بنفس الوقت صرح تعليمي يتطلب فيه الترتيب.
حاولي دايمًا تشيّكين على منتدى الجامعة لأنّ التحديثات والإعلانات مهمّة جدًا. وإذا كان فيه لجامعتك تجمّع للطالبات والطلبة بيكون فيه أسئلة للسنوات اللي فاتت، وبيكون فيه نصائح وأشياء جدًا مفيدة، لا تبعدين خليك قريبة من التجمّع والمنتدى()

أول ترم أو يمكن أول سنة بتكون متعبة وبعدها بإذن الله بتكون السنوات أخفّ وأريح.

تمنّياتي لكم بدراسة موّفقة مسددّة وبأيام جامعيّة مزهرة ملوّنة ()