يا اخت اماسي
الظاهر في فرق بين قسم الحاسب عند الشباب وعندنا
بس اقولك كيف اللي عندنا
اول شي لما تبدأي دراسة الترم الجاي حتأخذي اربع مواد
امكن رياضيات وفيزيا او كيميا واحصا وكلها 101
معاها الثقافة والعربي101
والترم اللي بعده حتأخذي انجليزي و ثقافة102 مع المادتين العلمية اللي مااخذتيها لسة
وفي الترم التاني لك في الجامعة تقدمي على التخصص
وصار الكلام هذا على النت تسويه
اذا كانت رغبتك هي الحاسب لازم معدلك التراكمي يكون فوق ال4
والرغبة التانية لازم تحطيها رياضيات او احصا او فيزيا
ومارح تنزلي تخصص حاسب على طول في نفس الترم
حتنزلي في تخصص الرغبة التانية لك
بس مارح يكون في مشكلة لأنو في الترم التالت رح تأخذي اربع مواد كمان
وهي رياضيات102 وحاسب101 وعربي201 وانجليزي102
وهذه المواد هي متطلبات الاقسام الاربعة (حاسب -رياضيات -فيزيا -احصا) في الترم التالت
عشان كدة مايكون في مشكلة لما ماتنزلي حاسب على طول لأنو نفس المواد حتدرسيها
حتسألي طيب متى يصير تخصصي حاسب؟
اول شي لازم تعرفي انو في شي اسمه مفاضلة
عشان ماعندنا في الجامعة عدد كبير من الاستاذات يدرسوا الحاسب
مايقدروا يقبلوا اكثر من 60 او 70 بنت (امكن يزيدوا العدد لأنه يتغير من سنة لسنة)
والمتقدمات للقسم يكونو في حدود 300 بنت تقريبا
فما يقدروا يأخذوا بنات بعشوائية ويصير ظلم
يدخلوا البنات في مفاضلة يأخذوا أعلى 60 معدل مثلا (حسب العدد اللي يبغوه)
واذا في بنات معدلاتهم متساوية يأخذوا بعلامة الرياضيات وسمعت انو يأخذوا بعلامة الانجليزي بس مو متأكدة
وكدة يفاضلوا بينهم
في الترم التالت تنزل اسماء البنات اللي دخلوا المفاضلة بس لسة ما قبلوا في القسم
واذا مالقيتي اسمك في شي اسمه مفاضلة تانية تقدمي فيها وتنتظري الين الترم اللي بعده
واذا نزل اسمك تنتظري الين تنزل اسماء المقبولات في القسم(زي حالتي دحين)
وعشان المفاضلة هذه لازم تحاولي يكون معدلك اعلى مايكن
يعني امكن تجيبي فوق 4 ويكون كويس لكن يكون في 60 بنت جايبين فوق ال4.5 وتصير لك مشكلة في المفاضلة
وترى موصعب ابدا تجيبي فوق ال4.5 ومو بعيد تجيبي ال5
بس عاد حسب اجتهادك
وانا شخصيا اول ترم جبت 4.77 بس تاني ترم خبصت الدنيا عشان صارت لي ظروف
وبدون اي ملخصات ولا اسئلة زيادة ولا شي لأني احس أضيع بالاوراق الزايدة
بس الحمد لله ربي وفقني وكنت مع استاذات ممتازات
وابدا لاتخافي من الاستاذات ولا من المواد
واعطيك رأيي في المواد:
رياضيات 101 خذيه مع أساذة آسيا او رويدة مليباري وهو مثل الثانوي تقريبا وعليه زيادة وبالانجليزي
بس لا تخافي انو بالانجليزي لأنو الشرح عربي بس الكتابة انجليزي وتراه فلللة بالانجليزي(تغيير)
فيزيا 101 بصراحة ما اعرف مين احسن استاذة بس هو سهل وعربي
كيميا 101 حاولي تشدي حيلك كويس فيه رغم انه يعتبر سهل بس طويل شوية (انا اخذته مع أ.تهاني الزيات)
احصا 101 برضوا حاولي تشدي حيلك كويس وهو زي رياضيات ثانية ثانوي بس اكثر (انا انصح بأستاذة سلافة اذا كنت تحبي اللي يشرحوا بسرعة او انك تأخذي مع أ.عائشة فيومي)
العربي مرة سهل وتافه بس برضوا لا تستهوني فيه والاختبار النهائي يجي اختياري
الثقافة الاسلامية حتشوفيها سهلة لكن لا يغرك ابدا لأنو هي المادة اللي البنات يخبصوا فيها وحاولي انك تكوني دايما على اطلاع فيها يعني مو شرط كل يوم ممكن كل اسبوع
والانجليزي كله مصطلحات علمية لكنه سهل ويتفهم إن شاء الله
اما رياضيات 102 اللي سمعت عنه كلام كتير و..... اقولك بعد ما يخلص الترم واشوف كم اجيب فيه (بأدرسه هذا الترم)
عارفة اني طولت عليك بس اتمنى اني اعطيتك معلومات كافية تشيل توترك
|