شوف يا ليدر
والله موضوع مررة حلووو
وخلينا نشوف رائي الاعضاء هنا
==========
الشوفه الشرعية حق من حقوق الزوجين . . الله كتبه لهم لكي يرضى كل طرف عن الثاني ولكي لا ينخدع بوصف شخص اخر لان مستحيل ان يتفق الناس على شي واحد . . . ومستحيل ان ترا في الشي مثل ما يرا غيرك
لكن في الوقت الحالي صارت الشوفه الشرعيه "تخبيص في تخبيص"
يجلس معاه وياخذ رقمها ويكلمها . . . وتوصل انه يخرج معاها وقابلات وسهر تلفونات ولا تقول غير مملكين . . اذا كان هذه في ايام الخطبه اجل في فترة الملكة ايش حيسوا ؟؟؟؟؟؟
==========
مدام اني مريت بهذي الفترة حقول تجربتي
انا ما شفت الشوفه الشرعيه . . . طبعاً حتقولوا "ليش" انا اقولكم "ليش"
يا حبايب . . . زوجتي هيا من بنات الجيران . . . طبعاً نحنا صغار العيال مع البنات لعب
خلص كبرنا وصاروا العيال لحال والبنات لحال "تحسوا انها من قصص الف ليله وليله
"
يعني في سابق معرفه بين العائلتين
لما خطبت . . . طبعاً خلاص نحنا محددين موعد الملكه بعد الخطبه بـ 8شهور . . . وكان المفروض اشوفها وهذه من حقي ومن حقها . . وابوها" اللي هو عمي حالياً" اللي قال هذا الشي
لكن في هذه الفترة جاني انتداب خارج مدينة "مكة" لمدة 3 شهور والشوفه حتكون قبل الانتداب . . . وطبعاً بما اني عارف نفسي خفيف . . . فرفضت اني اروح اشوف "لاني لو شوفت حانشعف وحارجع من الانتداب واسوي الملكه وازنق نفسي وازنق اهلي " وكمان في حاجه ثانية " من المواقف اللي تصير في الشباب خوفتني". . . فرفضت رفضا باتاً وقلت انا ما ابغى اشوف خلاص انا مقتنع بالزواج وانتهينا . . . طبعاً وصلت لهم وقالوا خلاص . . . واتفقنا على هذا الشي .
لكن بعد ما رجعت من الانتداب "طول فترة الانتداب وانا خارج مكة" يوم من الايام كانوا في زيارة لاهلي . . . وطبعا "ابو التمر" يتمتع بدهاء وحنكة وبعد نظر
. . . تلصصت"حلوة كلمة تلصصت
" . . بطريقة ما . . وشفتها . . طبعا بدون محد يدري ومحد عرف غير بعد الملكة .
وطبعاً سويت الملكة قبل الموعد المحدد بشهرين . . . مو اقولكم خفيف ومشعوف
بس طبعاً صوري صلت لهم من زمان
=========
هذه قصتي اتمنى ما اكون طولت عليكم
لكن في النهاية هي حق شرعي لازم منه
وماني مع الزواج بدون شوفه شرعيه . . . لان مو كل واحد يتمتع بالدهاء والحنكه وبعد النظر اللي اتمتع به
تحياتي لك يا ليدر على الموضوع الجميل
وتحياتي لباقي الاعضاء