[::Law fair::]

مرحبا , انا عضوة جديده
و تسجيلي بسبب هدا الموضوع , مع اني كنت متابعه من ورا الكواليس هع
شي طيب انو اخيرا مشاكلنا بتوصل للرئيس في مشاكل عديده يتفقوا معايا فيها البنات
منها :
- بعض المواد الي بناخذها عن طريق الشبكه ومن دكتور واتكلم هنا عن المواد الوحيدة الشعبة زي احكام التزام عند د. العساف الوقت دائما مره متأخر يعني من 3 لـ4
مع انو في مجال انها تكون بدري في الصبح او حتى في الظهر بس مو للعصر
وتلقى كل الشعبة مخلصين دوامهم من 12 و الي قبل , بسبب التفاوت الفظيع وغياب التنسيق بين اوقات المواد بشطرنا وبشطر الطلاب .
- انعدام التنسيق واضح مرا اوقات الاختبارات النهائية , مواد القسم عندنا نختبرها في اسبوع يحكروها في 3 ايام ويزيد الطين بله لمن تجي المواد الي بناخذها مع الدكاتره في نفس الاسبوع او قبل بيوم , فترة الاختبارات النهائية في الجامعه حوالي20 يوم بس في قسمنا امكن 6 او 5 ايام بالكثير , وغياب التنسيق بين مواد القسم في نفس شطرنا بدليل انو في طالبات ومنهم قريبتي اختبروا بنفس اليوم التجاري والاداري والجنائي كان قبلهم بيوم بسس وهي مواد من نفس المستوى .
- تفعيل دور اللجان الطلابية بالقسم , ماعمري سمعت بلجنة قانونية طلابية او بنادي لطالبات القانون زي جامعة الامام , ووجودها مهم في تنظيم دورات قانونية داخل الجامعه والقيام بزيارات خارجية للمحاكم و السجون حتى دكتوراتنا لمن يبغوا ينظموا حاجه زي كدا بيتماطل الموضوع لنهاية التيرم ولمن نسألهم بيقولوا انو من ادارة القسم الرجالية هدا التأخير .
- اش المانع من وجود محكمة افتراضية زي الي موجوده بشطر الطلاب , احنا محتاجات نتعلم اصول الترافع بالتدريب ومو بالقراءة والتخيل .
- اتاحة التدريب واعطاء تصريح بذلك ودا شي مو مره صعب , كل الاقسام بكل الكليات
يقدروا يتدربوا حتى لو كانت تخصصاتهم نظرية , اما احنا قسمنا حدث ولا حرج تخصص عملي بحت و لكن بلا تدريب او تمرين.
- في بعض الدكتورات بيتجاوزا خطوط حمرا كتير اثناء الشرح , بيتريقوا بنصوص القوانين و بحال السعوديات وليش ما تكونوا كدا وليش بلدكم كدا وما بيضيفوا للماده اي شي بالعكس بيخسفوا معدلاتنا وبيظلمونا في التصحيح وفييي الي يهدد ويتوعد لمن نشتكي.
نتمنى انو ما يفرض علينا اسم دكتور يعطينا ماده مالها دكتورة موجوده بالشطر عندنا ويفضل ماسكها طول العمر, لازم التنويع والتغيير مثلا : د. الخياط و د. مصطفى بيطار ومن تجارب الطلاب يعتبروا من خيرة الاساتذة المتفهمين وما عندهم معيار غير منطقي للتصحيح نتمنى انهم يمسكوا المواد الي ماسكينها دكاتره يعطوا 70 و80 لكل الشعبة ولمن يطلب منهم مراجعة الورقة يرفضوا مراجعتها وتفضل الدرجة ويتخسف المعدل.
- نتمنى يكون في اجتماع مع د. العطاس لأنو ما بنوصل لو بسهولة وفي اشياء مارح يحس بمعاناتنا فيها الا لمن يسمعها مننا.
دا كل الي بجعبتي وادا افتكرت حاجه رح ارجع.
الله يجزاكم خير