[Dr~NanoOok]

المشاركة الأصلية كتبت بواسطة Jo0o0o0o0oRy كنت حابة أسأل د.نانوك إيش الصعوبات اللي واجهتك ( نفسياً و دراسياً ) عند دخولك طب الاسنان ؟ وكيف قدرتي تتغلبي عليها ؟ وبجد ما أعرف كيف أشكرك .. كلامك جداً مريح ربي يسعدك ويوفق للخير دائماً

ربي يسلمك عزيزتي..
واحنا أخوات طبعا.. ولبعض دايما إن شاء الله ^_^

واللي أقدر عليه إن شاء الله.. ما حـبخل بيه عليكم

~

قبل دخولي القسم كنت متخوفة من ايش اللي حـ أواجه.. وطبيعة الدراسة وكده
ومع اكتشافي ليه أكتر وأكتر.. بأحبه اكثر

مثلا الآن أنا خلصت سنة ثالث..
وخلال السنة هذه عشت طب الأسنان حقيقة.. واتعرفت عليه من جد
من خلال المواد الأسنانية وعن طبيعة شغلنا وتخصصنا كيف
ولما دخلنا معمل الفانتوم.. واشتغلنا على أسنان اصطناعية.. وداخل فم زي كأنه حقيقي
واتعلمنا كل شي عشان نطبقة السنة الجاية بالعيادة
مررررره أتحمست.. وما انسى أول يوم لما مسكنا الـ hand-piece وكان شعورنا مافي زيه ^^
<< هي آلة الحفر اللي بنستخدمها للأسنان

وقتها حسينا اننا فعلا طبيبات أسنان ^_^

واتعملت الدقة و الاهتمام بالتفاصيل << وانا مررره أحب كده.. ومن شخصيتي هذا الشي.. والحمدلله مره ساعدني
كل شغلنا في الأسنان يكون بـ الـ ملم ونص الـ ملم كمان
وبداية ما اخدنا نتدرب على رسم خطوط.. مابينها 1 ملم أو 3 ملم أو نص ملم
كان مره صعب.. وما نقدر نفرّق بينهم بسهولة
<< ماشالله متعودين على السم والمتر طول حياتنا "^^

لكن بعدين ومع التعوّد.. صاير الملم شي كبير بالنسبالنا

~

وكل شي بالبداية صعب.. بعدين مع التعوّد والحب للشي حيسهل باذن الله
لو شفتوا كمية الشيتات والحاجات اللي درسناها في سنة ثالث
ماشالله كمية كبييييرة ! لكني حبيتها أكثر من سنة تانية وأولى كمان
حتى لما نجي نختبر مادة أسنان.. هي لنفسنا أقرب وأسهل من مواد البشري
<< مع ان مواد الأسنان تكون أدسم في الكمية و المعلومات
لكننا نحبها ^^

~

وأي ضغوط دراسية تواجهكم.. تقدروا تعملوا study groups
وتزاكروا مع بعض.. ترا مررره يسّهل الموضوع.. واللي ما تفهميه غيرك فاهمته.. وبكده تفيدوا بعض

أنا بالنسبالي مو متعودة على المزاكرة الجماعية.. لكن بعض المواد تحتاج انك تزاكريها مع أحد.. فأروح أزاكرها مع صحباتي

لكني أفضّل اني أراجع مع صحباتي .. وأحسه مررررررررررره مررره كويس
وساعدنا كتير.. يعني فقرة أو جزئية مهمة تنبهها علينا واحدة.. أو شي مو فاهمته هي تفهمني هو

وعشان تقللوا هم الضغط وتراكم المواد والدروس
حاولوا تزاكروا أول بأول.. طبعا بتقولوا دا الشي صعب وكتير
والدوام حقنا طويل وما يمدينا..

أهم شي ما يجي نهاية الأسبوع إلا قاريين اللي اخدتوه خلاله
<< قراءة تكفي.. عشان ترسّخ المعلومات اللي سمعتوها خلال المحاضرات
ولما تجي تزاكريها وتحفظيها.. تلاقي كمية لا بأس بها مازالت براسك ^^

~

أتذكر اول مره حسينا فيها بضياع وتوتر من مادة
كانت ببداية سنة ثانية.. ولما أخدنا ناتومي "تشريح" لأول مره
كانت كمية الحاجات اللي بندرسها كتيره.. ولما دخلنا المشرحة وشفنا كل شي وانها تلخبط
وقتها مو عارفين حتى كيف نزاكر وكيف نتزكر كل دا
مره خوفنا و اتوترنا..

لكن لما سألنا غيرنا وقالولنا كيف نحفظ وايش المهم وكده
مررره ارتحنا..

<< ولما عرفنا أن البشري بياخدوا زي اللي بناخده في الاناتومي لكن بتعمق مررررررره كتير
وقتها كلنا حمدنا ربنا اننا ما دخلنا بشري "^^

,

وبالتوفيق للكل إن شاء الله