السلام عليكم ورحمة الله وبركاته
|
وعليكم السلام ورحمة الله وبركاته
الهدف من هالموضوع تعلمونا كيف بتذاكرو
راح احط اسئلة للناس اللي مو عارفه كيف تحكي عن نفسها
بس تقدرو تكتبو بدون ما تجاوبو ع الاسئلة براحتكم يعني ^^
|
اوكي :)
1) روتينك اليومي ؟ متى ترجع من الجامعة وايش تسوي لين تنام ؟
|
تختلف من يوم لآخر ... بس بشكل عام: أصحى > أفطر > أروح الجامعة > أرجع البيت > اتغدى > اقعد مع الاهل > العب ع الكمبيوتر > أنام > تكرار.
2) متى تبدأ تذاكر للاختبارات؟ وكم محاضرة تنجز في اليوم؟
|
قبل الإختبار بأسبوع - أسبوعين...
من الأحد إلى الخميس دوام .... جمعة وسبت إجازة
4 ) مستواك الناتج من هذا الروتين ؟
|
ليش الإحراج؟
5) ايش اللي تتمنى تغيره وتحس حتجيب درجات افضل لو غيرته؟
|
أزبط جدولي ووقتي عشان أذاكر زي الخلق
6) كيف تبدأ تذاكر المحاضرة؟ ( ايش هيا خطوات مذاكرتك )
|
تختلف من مادة لأخرى ... بعضها أجمع الملخصات وبعضها أجيب محاضراتها والأخر أجيب التسجيلات ومنها اللي أدور لها شروحات ع النت سواء فيديو أو صور ... بس بشكل عام أبدأ أشيل الملهيات وأهيء نفسي للمذاكرة
اتمنى الكل يجاوب ع الاسئلة ، حتفيدو نفسكم وغيركم
شكرا لكم
|
جاوبنها وعفوًا ...
نجي للمهم اللآن
طبعًا الروتين اللي كتبته سيء جدًا وجابني واللي معايا ورى
وحتى لو كتبت لكم الروتين المثالي للطالب المثالي ماراح تستفيدوا أي شي...
كل واحد يحدد روتينه, ظروف الناس تختلف من بعضها ... بعضهم عايش لوحده في السكن فما يقعد مع اهله ... بعضهم هو اللي ماسك شغل البيت كله عشان كذا ما يلاقي وقت لخرجات مع اصحابه .. البعض مايخرج مع اصحابه او ما عنده فتلاقيه فاضي.
صعب ان الواحد ياخذ روتين شخص اخر عشان يطبقه او يستفيد منه.
اللي تحتاجوا تعرفوه كطلاب سنة ثانية طب هو الأتي:-
1- حياتك قبل الطب "لا تساوي" حياتك بعد الطب ... اختلاف تام.
2- ليست بمأساة أو كارثة ... بشرط !! ... تذاكر أول بأول.
3- هذه حياتك من الآن فصاعدًا .. فتأقلم معاها .. بأي طريقة!
4- المناهج ليست صعبة في الفهم ولا المصطلحات صعبة الحفظ ... لكنها طويلة! ... قد ما تعطيها من وقتك قد ما تعطيك من معلومات تفيدك في حياتك الطبية أولا ثم الإختبارات.
5-دايما لخص واحتفظ بالملخصات ( يفضل تتعلم طريقة الخرائط الذهنية ) عشان ترجع لها في وقت الحاجة ...
6- كن مرتب من أول يوم وحاول تسوي إعادة تهيئة لحياتك اليومية .. يمعنى إنك تفضي أول أسبوعين من الدراسة ما تسوي فيها أي شي يشغلك عن المذاكرة أبدًا !! لو عندك خروجات أو تلعب أو تتفرج أرميها فقط مؤقتًا طول ما في درس ما خلصته .. إلين تفهم كيف الدراسة ماشية وكيف الضغط عشان تلاقي وقتك فاضي تقدر ترتبه .. بعدين يصير تحط أي شي في الأوقات الثانية.
7- لازم تستمتع بوقتك ... لازم ! .. وإلا راح تنفجر وتضيع وصعب هنا ترجع للمسار.
8- سمعتوا عن Teach Me Medicine by Med13 ؟ .... سجلوا فيها إن أمكن
وأخيرًا خذوا هذه النصائح الذهبية من خبرتي ( ويالها من خبرة
) وخبرة الكثير من زملائكم:
1- المذاكرة أول بأول !
2- المذاكرة أول بأول !
3- المذاكرة أول بأول !
4- لا تراجع ولا استسلام
5- أبدًا لم يفت الأوان ... دائمًا في وقت للبداية من جديد والبداية بقوة .. حتى لو وصلت لإنك تعيد السنة, هذا موضوع يترتب عليه حياتك وحياتك عائلتك فحتى لو تأخرت مو مشكلة .. المهم تكون ماشي صح !
طبعًا الكلام دا عبارة عن رأي شخصي وخبرتي المتواضع من التخبط في الكلية هذه ... ولكن ع التخبيط ع قد المتعة
الله يوفقكم ويعينكم إن شاء الله ... المرحلة الجاية صعبة وطويلة وحلوة .. بالفعل مغامرة لن تنسى! ... وثقوا كل دقيقة من حياتكم عشان حتندموا لو ما خلدتوها في ذاكرتكم
في أمان الله