أسألة مكررة :
1) التحويل من التمريض
التحويل التحويل التحويل .. ياجماعة الخير .. دوامة التحويل مرت علينا كلنا .. وانا شخصياً عشت فيها تلاتة شهور من بداية م اتسكنت الى اول اختبار في اغث مادة في الحياة ..
<< اي نعم جبت 5\15 بس وقسم ماكنت اعرف اش في في المنهج على اساس اني محولة x'DDDDDD
الموهم .. التحويل من التمريض بعد ماتسكنتي فيه له كم حكاية بسيطة ..
الاولى .. عندك واسطة "قوية" الله معاكي في خلال يومين حتكوني حولتي بس الله اعلم فين ..
الثانية " النظامية" .. انك تحولي بعد مرور سنة كاملة بمعدل اكتر من 4.5 وعشان تدخلي الطب او اي كلية صحية دي حكاية تانية تقتضي انك تكوني جايبة اعلى شي في كل البنات المحولين لدي الكلية في دا الوقت ..
يعني مسلن الكلية عندها تلاتة كراسي للمحولات من الكليات الصحية .. وعدد الطالبات الي طالبين تحويل للكلية دي 12 حياخدو افضل تلاتة منهم ..
وعلى هاكذا قيسي كل الكليات الصحية .. الموضوع موضوع اما مفاضلة ودفرنة تقتل نفسها او واسطة جميلة سعيدة :$
الكلام دا م بأقوله من راصي .. كلمت عميدة كلية الطب اول مافقدت الامل في حرف الواو .. وقالتلي انو السنة دي كان عندهم كرسين فاضية قبلو فيها بنتين فقط وحدة من الصيدلة كانت جايبة 4.9 والتانية جايبة اقل منها بقليل !
لا اخفيكم سرا انو طبعا النسب تختلف من دفعة لدفعة ف دفعتكم الي الصلاة ع النبي ادفرن دفعة في الحياة والله اعلم نسبة التحويل كم حتكون لو حابين تتبهدلو شوية راجعو الشؤون الي في الشطر والله يعين ..
بالعربي كدا .. الي حابة تحول من يوم ماتبدأ السنة تشد حيلها شدة اليمة .. لانو الموضوع دا مو سهل زي مااحنا متوقعينو ابدا ..
التالتة .. انك تفقعي من دحينا وتروحي الشؤون تطلبي تحويل .. لو كنتي استوفيتي الشروط للكلية الي تبي تحولي فيها .. حيتم تحويلك على طول إن شاء الله .. بس لو ماستوفيتي الشروط يعني نسبتك اقل المقاعد خلصت مدري اش هوا .. ياحببتشي .. ماعرفشي بس حتتبهدلي حبتين ويا هتكملي معانا يا حتروحي لتخصص اقل نسبة
وانا بصراحة اقلكم هيا .. خلو الموضوع موضوع خييييييييرة .. استخيرو وشوفو ربنا اش كاتبلكم .. ولو انكم متأكدين انكم ماتبو التمريض حاولو تحولو عشان ماتندمو بكرة انكم ماحاولتو!
بس الي حاصل : ولازم تنتبهو منو مزبوووط ..
البنات بيدخلو على عمى عيونهم .. ودا الشي مرة غلط .. نسبة كبيرة مننا دخلو كدا .. والفئة الي مازالت مصرة انها تحول ضاعت مرة كتير وضيعت اكتر ودنيتها سارت دنيا .. ومحد متكي ومرتاح الا الي عجبو التمريض وخلاص حابب يكمل فيه ..
اقرأو ابحثو اسألو تعالو روحو ضيعو اجازتكم واتعبو فيها شوية استفهمو عن التخصص دا اش هوا .. صدقوني مافي شي يعدي عليكي كدا سبهللة .. ربنا اختارلك تسكينك يكون تمريض لحكمة .. كلنا مانعرفها ..
اتعبو شوية عشان تفهمو وضعكم احسن من كدا ..
عشان ماتضيعو عليكم سنة ولا سنتين في تخصص ماتبوه وبعدها تعيشو يئس اليم .. ولا من البداية ترفضو التخصص وانتو ماتعرفو عنو شي وتسووو دراما وتحولي لتخصص تاني ومدري ايش وبعدينا بعد زمن تندمي وتقولي ياريتني ماضيعت على نفسي واعطيت للتمريض فرصة ..
<< مدري مين الدراما فينا x'D
الصراحة حست في الموضوع دا الي مالو نهاية من بداية وروايتو كتيرة وتختف من كائن لأخى ..
بس ختاما لـ موضوع التحويل ياجميلات .. ارجعو لربكم واستخيرو في تخصصكم وإن شاء الله ربنا ماحيضيعكم .. وقبل كل شي اعطي للتمريض فرصة سواء كانت ركعة ام بسؤال او قراءة.
2) التحويل لـ التمريض
ممممم هوا طبعن اسهل من التحويل من التمريض بمراحل ومرااااااااااحل ..
بس غالبا اغلب الي يحولو من العلوم يجي نصيبهم تمريض ..
<< قلت "اغلب" لاتاكلوني 
ولو رحتي اتكلمتي مع وكيلتنا بشكل ودي ويناسو برضو ممكن تتفهمك وتحولي .. امكن احنا الكلية الوحيدة اليناسو الي تستقبل بدون تعقيدات كثيرة ..
طبعا لعدة اسباب واهمها زي ماقلت البنات بيدخلو عمياني .. وتلات اربعاهم تلاقيهم فقعو من نص السنة وقعدو في البيت عشان يبو يحولو كلية او جامعة او طلعو مدرري فين .. اللهم انهم مسكو مقاعد ع الفاضي الله يسامحهم .. دفعتنا مسلن دخلنا عددنا 110 ماخلصت السنة الا احنا شي و80 طوال السنة ناس تسحب وناس تعتزر وناس تعمل اخلاء طرف ..!!!!! شي يبكي ادري :S
الله يهدينا اجمعين يارب
ف خلاصة الكلام الي حابة التمريض والي مو حاباه كلكم تقرأو عنو قبل ماتدخلو عالمو لوسمحتو ..
3) هل التمريض سهل ولا صعب .. كرف ولا لعب .. ؟
بصراحة انو يختلف من انسان لأخر ..
بس بشكل عام التمريض مهو تخصص سهل .. وبالعكس يعتبر من المهن المقاتلة الجهادية .. مااقلكم انو صعب ..
بس مايقل اهمية عن الطب .. ف وازنوها انتو ..
بس الي يقدر يدير وقته وينظم حياته حيكون اكتر من مبسوط مو بس في التمريض الا في حياتو كلها
وفي عالم كتير تمريض وعايشة حياتها كل يوم بره وبعد كل اختبار جمعة ودنيا عادي يعني ..
وفي ناس
الله يهديهم عندهم كل يومين مباراه في النادي الطبي الرياضي
<< دا موضوع تاني نتكلم عليه بعدينا ..
4) الدراسة في التمريض :
التحضيري سنة .. بعدينا ندرس تلاتة سنين في كلية التمريض .. ننزل خلالها تدريب بالتدريج .. والسنة الخامسة والاخيرة الي هيا الامتياز .. وكدا نودع الجامعة فور ايفر x'P
<< الا لو اخدتو معيدية نتكلم بعدينا x'P
من سنة تانية نبدأ تدريب في المستشفى من الترم التاني ننزل يومين في الاسبوع لمدة كم ساعة .. ونبدأ نطبق ونتدرب على كل الاساسيات الي علمونا هيا نظريا الترم الاول والي بناخدها في الكلاسات النظرية والمعامل التدريبية في الكلية..
وبعدينا سنة تالت ننزل يومين في الاسبوع بس دوام كامل مو زي سنة تانية نص دوام
وسنة رابع .. تبدؤو تختفو وسط المستشفيات ومختلف التخصصات بس برضو عندكم كلاسات في الكلية ..
ولو تبو تسألو او تعرفو عن المواد او الخطط الدراسية او الجداول وماشابه ..
تفزلو موقع الكلية الرسمي ..
http://nurs.kau.edu.sa/Default.aspx?Site_ID=667&lng=AR
تنزلنا فيه الجداول جاهزة على بداية السنة ..
ايوا جداولنا مانختارها احنا .. تنزلنا ع الموقع ووتتعلق ع الباب وايوا نظام فصول x'P
اغلب الصحية كدا ويجمعنا النظام السنوي ..
بالمناسبة كليتنا منفصلة عن الكلية الطبية التطبيقية .. بس الانفصال دا جديد سار السنة دي عشان كدا المنتدى مافصلونا الى الان عنهم ..
5) اش نلبس ..؟
واللهي ياحبيباتي اننا نلبس الي نباه .. الا في المستشفى فأنهم يضيقون الخناق علينا جدا بالابيض والطويل والواسع والمحترم .. بس في الجامعة .. البسي تنورة جينز بجامة ليجنج سكرب اخضر موف احمر رمادي بكيف كيفك البسي الي تبيه عادي .. تعالي بلابكوت او لاتيجي عادي .. الا ايام المعامل الزامي فيها تكوني بالابكوت .. ودي الايام تنعد ع الاصابع ..
في النهاية لاتستعجلو ابدا على قدركم كل شي حيتوضحلكم من نحية التفاصيل الصغيرة دي .. بس التفاصيل العظيمة
كـ انتسابك لمجال التمريض لابد طبعا من البحث ثم البحث ثم البحث فيها .. الى يتفرقع دماغكي وتتوصلي لحل يرضيكي
وكدا إن شاء الله اكون لميت بأغلب الاسألة الي طوال م انا ماشية اسمعكم ترددوها والي انا شخصياً كانت في بالي لمن كنت مكانكم ..
ملاحظة : والله مافحال حاااااالي ارجع اقرأ واراجع كل الي كتبته فوق .. ف لو كان في اي خطأ املائي نحوي هبابي غمضو عيونكم وسو انكم مو شايفين وشكرررن 