و عليكم السلام و الرحمة ..
انا برضو خريجة السنة اللي فاتت كيميا من جامعة الطايف و اجنبية برضو >> احس انك اختي هههههههههه
المهم اول شي مبروك تخرجك مقدما ..
ثاني شي اتوقع انو كذا او كذا ح تتاخري في قبولك. اذا كنتي خريجة الترم الاول ف التقديم ح يبدا شهر واحد يعني قبل ما تستلمي وثيقتك و نفس الشي لو تخرجك ترم ثاني ..
و ح تتأخري زيادة ف القبول عشانك اجنبية احنا لنا معاملة خاصة و بيرفعو اوراقنا لوزارة التعليم العالي و المعاملة ذي تطول يعني انا مثلا انقبلت ماستر كيميا حيوي و طابقت اوراقي من شهر 6 و لين اليوم صارلنا 5 شهور ما نزلت ارقامنا الجامعية و بالتالي مالنا جداول و لانقدر نداوم ، ف يعني لا تتعشمي انك ح تنقبلي ع طول و ح تداومي لازم تطولي بالك كثيير بس اهم شي انك ضامنة مقعدك و ان شالله بتدرسي و تكملي دراستك حتى لو بعد خمس سنين ...
اما بالنسبة ايت احسن الطايف او المؤسس ف شخصيا ارتحت ف المؤسس ف التقديم الكل متجاوب معاكي (ديموقراطيين درجة اولى ماشالله)و كل شي بتشوفيه بعيونك عندهم جدول و خطة واضحة و بيحطو اخر نسبة قبلوها ف البرنامج بحيث تعرفي انتي نسبتك كم و نسبة اخر وحدة كم و تشدي حيلك لو ما انقبلتي ..
ف قسم الكيميا جامعة الطايف طالبة قدرات و ستيب و الستيب 67 اما المؤسس ماهي طالبة قدرات لكن فيه اختبار مفاضلة عام و سههههل و في الكيميا ف نفس اللي درستيه مو زي القدرات طبعا .. و الستيب 52 .. << الشروط اسهل
جامعة الطايف طالبة انك تجيبي المنحة عشان يقبلوكي اما ف جامعة المؤسس هم بيجيبولك المنحة و بيعاملو مع وزارة التعليم العالي بدالك << ريحوني خصوصا انو ماعندي احد يجريلي وراها ..
اخر شي و بما اني كنت خريجة كيميا الطايف ف انا مني عارفة كيف بتفكري تكملي الماستر ف الطايف بالنسبة ليا شششي مستحيل اني اكمل ف نفس ذيك الجامعة و مع ذولاك الدكتورات مع احترامي ليهم اللي اكلتو عندهم ف البكالوريوس كفاية ان شاء الله ربي يعوضني في ذي الجامعة بدكتورات كويسات :)