بهذله استعارة الشهاده إللي صارت لي

شيري · #1 13-08-2009, 12:54 AM

السلام عليكم
كيفكم .. اخباركم؟
يالله ابدأ بقصتي
انا قدمت في كليه وطلبوا الشهاده الاصليه وانو ماراح يقبلوني إلا بها وطبعا انا قولت في نفسي
احسن اروح استعيرها عشان إذا ماإنقبلت يصير ارجع للجامعه,فا من القلق والتوتر مانمت في الليل
ورحت مواصله رحت ساعه8 واخذت اختي معايا(توأمي) فاهيا إستنت في الانتظار وانا رحت العماده فارحت عند وحده وقلتلها ابغى استعير الشهاده راحت اعطتني ورقه مكتوب فيها إخلاء طرف
وقالت لي اروح اختمها من شؤون الطالبات(مبنى13)وبعدين المكتبه المركزيه فاأنا رحت المكتبه
اول وختمت الحرمه الورقه وقالت روحي مبنى 13,فارحت م13 ودخلت اول غرفه بابها مفتوح
فاكان فيها 3استاذات,رحت عند إللي في النص واعطيتها الورقه راحت وقعت فوق وبخط صغير
وقالت لي روحي مبنى 35 طبعا انا إستغربت وكررت كلامها قالت لي ايوه فالسه كنت ابغى اسألها
فين دا المبنى راحو دخلوا استاذات وقاعدين يسلموا على بعض ويتهرجوا وصفتني طبعا
فانزلت من المبنى وشفت فلبينيه من إللي في السيارات رحت سألتها قالت ماأدري
رحت للبوابه الغربيه2 وسألت الامن برضوا مايعرفوا فاقلت يالله اروح للحرمه إللي في المكتبه
واسألها تاني فاوريتها الورقه,قالت لي لا لسه ماإنختمت روحي لمبنى13 تاني ورحت (ولا تنسوا كان الجو حاااااار كمان مع الشمس فاكنت المعصبه)بعدين وانا داخله م13 جاتني فكره قولت مدا قصدها الحرمه غرفه 35 جربت ورحتها واعطيت اول وحده قابلتني الورقه وطلع عن جد كلامي صح وختمت لي الورقه (كان نفسي اضرب إللي مشورتني وقالت مبنى35)ورجعت العماده اخيرآ ورحت شباك7 فاأخدت الحرمه الورقه وراحت عند الكمبيوتر جات تبغى تضغط على زر في الكيبورد فجأه طالعت فيا وقالت ألحين إنتي تبغي تسحبي نهائي قولتلها لا, قالت اجل ايش تبي ,قولتلها ابغى استعير
جات قالت لي هادي الورقه غلط انها حقت إللي يبغوا يسحبو نهائي والمتخرجين,واعطتني ورقه تانيه فيها نفس كلام الورق الاولى بس مكتوب فوق استعارة اصل الشهاده الثانويه,وقالت روحي اختميها من نفس الاماكن إللي ختمتي منها الورقه الاولى(هيا أنا ألحين ايش اعمل في اللي اعطتني الورقه الغلط حسيت اني بنفجر من التعب وبروح ألطشها)فارحت تاني ختمتها واخيرآ خلصت.
بس الحمدالله انقبلت في الكليه وسبت الجامعه الهم.

هـمــhamsــس.. · 13-08-2009, 01:04 AM

اووماااااا هم

طيب معليش سؤال ليه رحتي للكليه وتركتي الجامعه

اللحين انا احوس ابحول من كليه لجامعه لاني اكتشفت اني دوامي ماراح يكون بالجامعه حيكون بالكليه اللي في الفيصليه

وحايسه مررررررررره

وانتي تقول هم :(

<< تدور هم الجامعه ولا هم الكليه

مدري ليه بس احس الجامعه احسن من الكليه

بس يمكن لاني كنت اسمع عن الكليه وكيف ان الجامعه اسهل منها مع انهم صاروا زي بعض

بس بجد حوسه وانا كنت اسمع اختي لمن تتكلم عن مشاوريها من مبنى للثاني

بس اهم شي لقيتي اللي انتي تبغيه

ويالله بالتوفيق يارب

سوار · 13-08-2009, 01:32 AM

دكرتيني لما سحبت ملفي

يلا الله يوفقك في الكليه

MNMO0ONA · 13-08-2009, 01:34 AM

هما كدا الجامعه كل وحده ترمي كلام من راسها
زكرتيني بالسنه اللي فاتت
وقت ماسحبت في شبابيك كتيره واللهي كل شويه يرموني على شباك مره طولت على دا الحال يمكن والله اكتر من ساعه وفالاخير خلاص مره ماتحملت وجلست ابكي هههههههههه
المهم جات بنت عمي الله يسعدها يارب ومسحت فيهم البلاط في ثواني ادوني ملفي هههههههههههههههههه

شيري · 13-08-2009, 02:26 AM

تسلموا على مروركم
وردي لهمس: هو انا ابغى ادخل تمريض بس معدلي مش عالي
فادورت على كليات تعطي بكالوريس تمريض والحمدالله لقيت كليه
مره كويسه وكمان بجنب البيت يعني اروح لها مشي واخذ 1500مكافئه
واول ماأخلص دراسه الوظيفه جاهزة.

شيري · 13-08-2009, 02:43 AM

عارفين ايش إللي خفف عليا وخلاني انبسط بعد ماطلعت من العماده رحت عند اختي(تؤامي)
ولقيتها جالسه مع وحده من صحباتي من نفس كلاسي طبعا انا اول ماشوفتها ضحكت لانها
اول مره تشوف اختي امل ولما مشيت صحبتي سألت امل هاا ايش قالتلك عاد اختي فتحت كاي
وقالت لما شافتها صحبتي قالتلها وي تنو ايش جابك(الحين على بالها انا)جات امل قالتلها جيت
استعير شهادتي راحت قالتلها صحبتي انا رحت من البوابه الشرقيه ومادخلوني انتي دخلوكي؟
(طبعا امل مكمله لسه ماقالتلها)ردت عليها اناجيت من هادي البوابه ودخلوني, راحت سألتها صحبتي
اسمعي الرقم السري مايرضى يفتح معايا انتي فتح معاكي؟الحين مفروض امل للتمويه تقول ايوه او لا عشان
لا يكثر هرجها تخيلو ايش ردت عليها؟(هو انتي تحتاجي ليه)عاد انا لما حكتني فطست ضحك.بعدين هي
اضطرت تقولها انا مو تنو عشان بدأت تسألها عن اشياء ماتعرفها عاد انتو تخيلي ملامح البنت كيف صارت.
وطبعا صحبتي استحت وماعرفت ايش تقول بس والله إنبسط على حسها.(هااا كيف التوأم اشرار ولا؟)

*طالبة العلم* · 13-08-2009, 03:08 AM

>> ونااااااسه لو يكون عندي اخت توأم خخخخخخخخخ

موووفقه خيتوووو :)

shooshaa · 13-08-2009, 03:14 AM

يووو جيتي تروحي في داهيه بس ربك ستر

والله ذكرتيني لما سحبت ملفي السنه الي فاتت تخيلي الموظفه الى في مبنى 13 لا وديتلها الورقه ماكان معاي قلم

ومارضيت تدريني قلمها عشان اوقع قدامها قالتلي روحي اشتري قلم وتعالي تخيلووووو وهي شكلها كانت تبغى تصرفني

عشان هم كانوو بيفطرووو وهاتك لزحمه عند الكشك نص ساعه عشان قلللم

والنفسيه زي الزفت وخوف اني راح اسحب يعني كان يوووم لا ينسي

والله انتي وتوأمك مرااااا خطيرين

هـمــhamsــس.. · 13-08-2009, 03:25 AM

الله يوفقك شيري
ههههههههههههههههههه عن جد تمنيت يكون لي اخت توأم اقلها حركات نذاله بيضاء مو يقولوا في كذب ابيض

يلا قلبو بالتوفيق يارب

روزاليندا&MJ · 13-08-2009, 03:31 AM

والله ضحكتيني على موضوع أختك بس المهم أنك سجلتي أوكي حبيبي بيست أوف لك

بهذله استعارة الشهاده إللي صارت لي

ملتقى المنتظمين