مشكلتي مع معهد العالميه.

[small ant]

السلام عليكم ورحمه الله وبركاته
مشكلتي طويلة عريضة راح أقولها بالتفصيل الغير ممل
القصة من البداية مع معهد العالمية الذي في شطر الطالبات
في 21-10-2007 رحت لمعهد العالمية للتسجيل في دورة فوتوشوب وفلاش
دفعت 500 لدورة الفوتوشوب وقلت للمسئوله اقدر ادفع لدوره الفلاش الآن وبعد مااخلص فوتوشوب أبدا فيها " اعتقد في هذي الفتره كان فيه تخفيض لطالبات الجامعة "
قالت عادي
بعد أربع أيام من التسجيل بدأت دورة الفوتوشوب 24-10 حضرت الدورة كله تمام خلصت الدورة سلمت البروجكت استلمت الشهادة في 4-1-2008 يعني تقريبا خلصت الدورة في شهرين و8 أيام .
خلصنا فوتوشوب وانتهينا منه بالسلامة
باقي دورة الفلاش !!!!
رحت للاداره قلت لها ( لو سمحتي الاختبارات قربت وأنا مااقدر اخذ الدورة مع الاختبارات ,,, كيف اخذ فلوسي !!)
قالت عادي تعالي الترم الجاي
قلت عادي أجي الترم الجاي قالت إيه لو بعد سنه او سنتين ... اسلوبها يبين لو بعد 100 سنه و جيتي عادي ... أهم شيء معاك السند " شيء يثبت الدفع "
قلت اوكي وأنا فرحانه
رحت جاء الترم ورى ترم وأنا مشغولة في التخصص مقدرت اخذ دوره الفلاش
رحت عندهم الترم الماضي لقيت وحده جديدة غير اللي سجلتني ,, وقلت لها ... " القصة كاملة "
قالت معاكي السند قلت ماجبته قالت جيبيه عشان نتأكد قلت لها طيب
رحت وجيت بعد شهر تقريبا لانشغالي بس كنت متطمنه علشان سألت عن السند ..
رجعت لهم ومعاي السند
قلت لهم ترى انا معد ابي فلاش قالت عادي بدليه بدوره ثانيه بنفس السعر قلت اش عندكم دورات قالت movie maker ,3d designوعددت لي دورات قلت خلاص ابغى موفي ميكر قالت اوكي جيبي جدولك بعد إجازة الحج ونسق لك الوقت .. قلت اوكي والسند معاي .
أنضغط ضغط في هذا الترم لايعلمه الا الله .. من درجت الضغط اعتذرت عن ماده من موادي.
رحت لهم تقريبا بعد فتره قلت لوسمحتي انا مااقدر اخذ الدور هوانا جدا مشغوله قلت ابغى اجيب اختي تاخذ الدوره باسمها " لان اختي كانت فاضيه في البيت ما قبلتها الجامعه " قالت اوكي عادي .
راحت اختي وسجلت في الكليه وقبلوها وصارت مشغوله في دراستها .
باقي هذه الدوره المنحوسه ...
صلب الموضوع ...........
جيتهم هذا الترم وقلت لهم انا ابغى استرجع فلوسي ..
الآن المديره او المسئوله جديده " ماتدري اش السالفه "\
قالت من متى قلت من 2007
قالت استرجاع الفلوس ياخذ منك وقت, قلت اهم شيء استرجع حقي
اخذت صوره من السند اللي معاي ..
رن جوالها تكلمت ولا كان احد قدامها بعد شوي اشرت لي براسها اطلعي برا .. قلت اوكي بنتظرهم برا اشوف اش نهايتها باسلوبهاالغير لائق بمسئوله تخدم العملاء.
انتظرت وطولت تقريبا 10 دق برا
راحت اشوفها اش السالفه طولت وانا عندي محاضره " خلصت مكالمتها ولا نادتني ضيعت وقتي على الفاضي "
لما دقيت الباب طالعت فيها اشرت لي براسها ادخلي ..
دخلت قالت المديرهتقول( ما لا تسترجع فلوسها لان لها 4 سنوات )
قلت ياحبيبتي انا من حقي استرجع فلوسي لان انا كنت مشغوله طول الاترام اللي فاتت ماقدرت اخذ الدوره لظروف انشغالي في الدراسه والترم الجاي انا تخرج وعند ي ضغط مواد وتدرييب عملي يعني مستحيل يكون عندي بريك واذا تخرجت بسافر على طول وانا الان محتاجه فلوسي لظروف خاصه جدا.
قالت معليش المديره قالت لا !!!!! قلت طيب قولي لها مشكلتي
قالت لا !\
احنا الان اللي يفوتها شهر بس على الدوره مانعطيها لا دوره ولا فلوس نظام جديد !
قلت لها انا على النظام القديم لما سجلت قلتو لي عادي ولو بعد ... كم سنه ومعاكي سند تاخذي دورتك
والنظام الجديد لا يشمل اللي على النظام القديم
قالت انتي لكي 4 سنوات ( لو اربع سنوات على قولتها كان تخرجت من سنتين )
وبعدين بعد ماشفتني معصبه قالت " انا اش ضمني انك اخذت الدوره وجايه تطالبين بفلوسك "
قلت ليش انتو ماتاخذو السند لما احضر الدوره قالت لا
قلت هذي مشكلتكم ومسئوليكم (اهمال وتسيب ) ماتعرفون مين اخذ عندكم ومين مااخذ .. مو هذي شركه و نظام ما عندهم قواعد بيانات وبرامج تسجلون فيها مين اللي اخذ ومين اللي ماخذ " عملت حركه بشفايفها انها ماتدري!!!!!
بعدين قالت اللي عندنا بس اللي من سنتين مو من اربع سنوات
لو لكي سنتين ممكن لكن انتي لكي 4 سنوات
قلت يعني المشكله على 4 سنوات
قالت ايوه قديم
قلت لها طيب عادي جيبي وحده من البنات نتبادل انا وهي الدور ه وانا اتفاهم مع البنت
قالت صحبتها ايوه يجي كذا قامت هي وقالت لا سندك قديم
قالت صحبتها طيب اعطيها رقم المديره تتفاهم معاها قالت لا قديم يعني لكي 4 سنوات .
قلت حقي لازم يرجع لي ....

قالت اشوف نكلم اللي في الرياض
قلت اوكي وانا جيتكم يوم الثلاثاء ,,
جيت يوم الثلاثاء
واخلاقها جدا سيئه ما تعرف تتعامل مع الناس
قلت لها لوسمحتي اش سويتي في موضوعي .. قالت المديره قالت نو وي .. لكي اربع سنوات دوبك تتطالبين بفلوسك
قلت لها فلوسي ترجع لي .. وانا حسبتها لي سنتين و3شهور تقريبا
وانا محتاجه الفلوس لظروفي وظروفي ما تسمح اني اخذ الدوره سواء هنا او في المعهد الخارجي ماعندي موصلات وانا والله محتاجه حقي ...
احسبي معايا ..
( من 21-10-2007 الى 21-10-2008 هذي سنه ومن 21-10-2008 الى 21-10-2009 هذي السنه الثانيه ومن21-10-2009 الى 21-10-2010هذا الى الان ماكمل سنه يدوب احنا في شهر 4 -2010 يعني لي سنتين و6 شهور اخصم منها شهرين و8 ايام لدوره الفوتوشوب كم صارت يعني لي سنتين وكم شهر فقط )
قالت انا ما ابغى احسب ولا شيء انا مالي صلاح اللي سجلوكي هم اللي مسئولين قلت لها فين ادور المسئولين اللي راحوا انتي اللي مسئوله بالله فيه مديره تقول كذا اش فايدك اجل
شدينا في الكلام مع بعض
قالوا صحباتها اعطيها رقم المديره
قالت لا خليها تجيبه بطريقتها وبكيفهااااااااااااااا

بالله اش رأيكم .. دولوني ياهل المساعدة والخبرة , كيف اخذ حقي قانونيا .أروح اشتكيهم على مين هل معي الحق أو لا ..ممكن انتو تشفونها 500 ولا شيء لكن هذي الفلوس تعني لي شيء كثير تفك على ازمه يعلم الله اني محتاجتها وما في أي شيء يسقط حقي اللي دفعته مهما كانت الأسباب لان أنا حاله خاصة ..
ابغى مساعدتكم واستشارتكم في استرجاع حقي بالطيب .
او انا من رأيي أوصلها إلى مدير الجامعة لان هذا المعهد نصااااب وهدفه تجاري .. مهملين لدرجه ماتتوقعونها
الكل يشتكي منه .
أسفه على الاطاله وعلى اللغة العامية وترى هذا وأنا مختصره أشياء كثير .. أي سؤال انا جاهزه.
جزاكم الله خير