السرعه

[شروفي]

اخواني الأعزاء السلام عليكم ورحمة الله وبركاته
حبيت أجبلكم موضوع يمكن يكون قديم شويا ويمكن البعض يقول إنوا تافه ويمكن ما يعجب البعض لاكن ماحبيت أكتب الموضوع دا إللى بعد ماشفت الشي دا بعيني ولعل الله يهديني ويهدي الكثير بموضوعي حبيت إني أتكلم عن السرعه
فوالله قبل 5 أيام فقدت عزيز على قلبي المشكله إنوا الأدمي عندوا بنتين بنت عمرها 4 سنوات وبنت عمرها سنتين كيف حيكون مصيرمصير دول البنات وكيف حيكون مصير أمهم الله يرحموا ويلطفبهم يارب
والسبب إللى خلاني أكتب موضوعي اليوم 8/5/1432هـ وانا نازل جده للدوام كنت أطارح ويشهد الله على كلامي وماأدرى فجأه إيش اللى خلاني أهدي والشخص اللى كنت أطارح معاه هدى معايا وسار يدق بوري ويأشر وأنا ولاكإنوا شي وفجأه جاتوا سياره تانيا تطارح معاه اتخيلوا بعد مطارحتي بي 5 او 6 دقايق وراح يطارح معاها وبشوفت عيني اللكزس اللى كنت اتطارح معاها على مد بصري حاصت وكان فيها شخصين وشالت شجره وماوقفها غير عامود لمبه ووالله ماكان يقل عن سرعة 160 وكان الكلام دا الساعه 7 قبل كبري الشميسي ووالله بشوفت عيني الله يرحمهم إذا ماتوا والله يلطفبهم إذا كانوا أحياء والله كد ايش كنت مجنون وراحت عليا سياره وسار سار لاكن الين متى ومتى الواحد يصحى لاكن بإذن الله تكون دي صحوتي واكثر سبب فكرت فيه الاثنين دول اللع واعلم ايش ماضيهم وهل يصلوا ولا لا وكم اعمارهم معقوله يعيش إلين سن معين ويتعب ويشقى فالحياة وفالاخر يهدر حياتوا وينهيها بحادث عشان لحظة سرعه طيب وهل هما متزوجين ولالا معقوله ييتموا عيالهم ويرملوا حريمهم عشان لحظة طيش والله حرام طبعا كلوا قدر ومكتوب بس برضوا الواحد ياخذ بالاسباب كم من عائله فقدت وكم من عائله فقدت عزيز عليهم وكم من اولاد وبنات ايتموا وكم من إمرأه اترملت ودا كلوا عشان لحظة سرعة ووالله إنها ماتفرق غير من 5 إلى 10 دقايق لا أكثرى ولا أقل وممكن لو مات ارحم الادهى والامر إنوا فالحادث لو اصيب بشلل يقعدوا طول عمروا على السرير طيب معقوله بعد ماكان يروح ويجي يقعد بلا حراك وهل اللى بيرعاه بيعشلوا طول عمروا وهل اللى بيرعاه بيتحملوا الله يسلمنا والحمد لله على العافيا والله ياأخوان نصيحه لوجه الله ترى إللي شفتوا شي مو هين لاكن بإذن الله يغير شي كثير فحياتي واتمنى من الله الهدايا ليا وللجميع ومعليش ع الموضوع الثقيل بس حبيت إني احكي اللى سار ولعل الله يهدي به ناس كثير