سلبية نظام الانتساب

[NOKIA]

السلام عليكم ورحمه الله وبركاته

اخواني الطلاب والطالبات.

الحمد لله على انتهاء الاختبارات .وان شاء الله بالتوفيق للجميع .

هناك عدة ملاحظات سلبيه على نظام الانتساب لجامعه الملك عبدالعزيز .

اولاً : الفترة الزمنية للاختبار "ساعه ونص" لجميع المواد . هل هذا معقول؟! هل المواد العلمية نفس المواد الدينية . الكل لاحظ اختبار التحليل الكمي في خطه ب عدد الاساله كان كبير وكل سؤال حتى لو كان صح وغلط يحتاج لتحليل وتطبيق القواعد عليه وكل سؤال يبغى لك فيه فتره علشان تشوف وين الجواب الصحيح . ومادة الحاسب الالي كان تعتمد على الحفظ يعني الي حافظ بيجاوب بسرعه مافيها تفكير زي التحليل الكمي .

ثانياً: وهو يمكن الاهم والكل انظلم فيه مهما كانت حالتك المادية . ياخوان كل طالب يدفع رسوم الدراسة "3000" ثلاث الاف ريال . خلونا ناخذها بتقدير بسيط بس . طلاب منطقة الرياض - خطه ب - كان عدد الي بالقاعه يختبرون مايفوق الف طالب - اذا كان كل طالب دافع 3000 - يعني الاجمالي من طلاب منطقة الرياض خطه ب =3000000 يعني ثلاث مليون ريال . طيب خطه أ لو قلنا نفس العدد يعني بيطلعون 3000000 يعني ثلاث مليون ريال الاجمالي =6000000 يعني ست مليون ريال من طلاب منطقة الرياض فقط . طيب الطالبات قول عددهم 500 طالبة ولا راح ابالغ في عددهم نصف عدد الطلاب يعني اخذوا من الطالبات 30000000 ثلاث مليون ريال يعني بحسبه بسيطة اخذوا من طلاب وطالبات منطقة الرياض 9000000 تسع مليون ريال خلال ترم واحد فقط . طيب باقي عندك منطقة الشرقيه وجدة وابها !! لو قلنا عدد باقي المناطق مثل الرياض يعني بحسبه بسيطة 9000000*4=36000000( يعني ست وثلاثين مليون ريال ) خلال ترم واحد فقط !!!!!

هذا المبلغ فقط تكاليف رسوم الانتساب غير تكاليف معهد العالمية غير تكاليف الكتب !!!

بالمقابل وش حصلت انت ياطالب وانتي ياطالبه ؟!

الجواب بكل بساطه : اربع كراتين ماء نصها حار مع عدد اربع مكيفات في قاعه فيها الف طالب !!

وياليت بعد دفع هالمبالغ نقول الكل راح ينجح ويعدي السنه التحضيريه . اذا ماعديت تمسك الباب بعد اعطائك فرصه ترم حسب ماقيل.

هل هذا ماتطمح له جامعه الملك عبدالعزيز ؟؟ هل الجامعه لديها عجز مالي؟

اسال نفسي سؤال واحد بس . هالمبلغ وين يروح ؟؟ هل يبنون مباني زيادة علشان مستقبلاً بننتظم معاهم ومايكون فيه ضيق في المباني بسبب العدد الكبير؟ او هل يوفرن لكل طالب وطالبه جهاز كمبيوتر ؟؟ او رسومنا تروح مكافئات لطلاب الانتظام ؟؟

ياخوان والله قمة الظلم الي احنا فيه . احنا مانبي ناخذ مكافئات مثل طلاب الانتظام ولا نبي منهم ريال واحد بس نبي تقدير لظروف ناس كثيرة .

ارحموا من في الارض يرحمكم من في السماء .

http://search.suhuf.net.sa/2009jaz/jun/11/ln18.htm

هذا رابط مقال نزل في جريدة الجزيرة عن نجاح نظام الانتساب وازاله كافه العقبات الي تواجهه الطلاب المساكين.

[فهد العنزان]

أخوي لو تكتب هذي الملاحظات وترسله إلى مدير الجامعة وعميد القبول والتسجيل وصورة منها إلى شركة العاليمة

وخاصة بالجزء الذي يخصهم من ناحية الملاحظات على التكيف وووو ...........

موفق

[على بركة الله]

يعطيك العافيه على الموضوع وانت سبقت اغلب الطلاب على الموضوع هذا

الي نبيه منهم انهم يعفونا من رسوم الاختبارات هذا الي نبيه

و انتمنا من الله ثم من هذا المنتدى انه يتفاعل مع صوت الطالب و يوصلونه الى الادارات العليا

[NOKIA]

يعطيك العافيه اخواني فهد العنزي و على بركة الله . يد وحدة ماتصفق ياخوان . اذكر واحد من الاخوان كتب موضوع عن ايصال هذي الملاحظات الى المسؤالين واذا مافاد احد الاخوان يحاول يوصل معاناتنا للجرايد مثل الوطن والجزيرة والرياض الكل يقرء ويشوفها واكيد بيكون فيه ردة فعل ياخوان سكوتنا اكبر غلط والله.

[فهد العنزان]

المشاركة الأصلية كتبت بواسطة nokia يعطيك العافيه اخواني فهد العنزي و على بركة الله . يد وحدة ماتصفق ياخوان . اذكر واحد من الاخوان كتب موضوع عن ايصال هذي الملاحظات الى المسؤالين واذا مافاد احد الاخوان يحاول يوصل معاناتنا للجرايد مثل الوطن والجزيرة والرياض الكل يقرء ويشوفها واكيد بيكون فيه ردة فعل ياخوان سكوتنا اكبر غلط والله.

أخوي الصحف ما بينفع

بس إذا انت ملزم على الصحف

فا من خلال الكتب المعروفين

على سبيل المثال من خلال إرسال الموضوع عن طريق إيميل الكاتب

الكاتب خالد السليمان بصحيفة عكاظ

الكاتب ابو هتان الاستاذ عبدالله الدوسري

صحيفة الرياض

الكاتب عبده خال صحيفة عكاظ

الكاتب عابد الخزندار صحيفة الرياض

أو من خلال

بس من خلال البريد الإلكتروني ومن خلال البرقيات والفاكسات

وكذلك الرسائل البريدية

وترسل بوقت واحد طبعاً بعد الاتفاق مع الطلاب والطالبات

النتيجة بأذن الله سوف تكون مثمرة

وهي بتشكيل لجنة للموضوع أخوي تخيل معي لو تجي مدير الجامعة

200 إلى 300 طلب في اليوم ؟؟؟

واليوم الآخر كذلك ؟؟؟

النتيجة مثمرة بأذن الله

[الـــدولار]

والله أنك صادق

إختلآس وظلم وتعقيد وش بقي ثاني 0

مثل الجامعه هاذي ما قد شفت الله لا يوفقهم

لآ بعد إذا جيت تقدم على إعفاء من الرسوم الدراسيه

عطوك لسته شروط مدري من الي حطها الله لآ يوفقه

مثل
1- تعريف بالراتب من جهة العمل
والي ما عندهـ عمل وش يسوي
2- يجب أن لايقل المعدل التراكمي للطالب عن 2,50
والي توهـ داخل أول ترم وما يدري كيف نظامها وجاب معدل أقل من المذكور
أنا عارف بتقولون يشد حيله ويجيب أعلى من 2,50
بس بأسئلتهم هذا المعقدهـ ما أظن أن أغلب الناس بيجيبون معدل زين
3-صورهـ من كرت العائله في حاله الزواج أو صورهـ من الهويه لغير المتزوجين
أما هاذي مقدور عليها
4-صورهـ من عقد أجار المنزل >إن وجد<
والي ساكن في بيت ملك ما يشمله الأعفاء
5-تقرير طبي في حاله وجود مرض مزمن لا قدر الله
والي بخير وعافيه ويحمد الله ويشكرهـ على هالنعمه ما يشمله الأعفاء
- - - - - - - -
الفقرات 4 - 5 إختياريه بس إذا ما جبتها يعتبر طلبك في الارشيف لأنها تعطي الأفضليه 0 0 0


وصلى الله على نبينا محمد 0 0 0 0

[NOKIA]

اخوي الدولار

عساك سالم انا قدمت على الاعفاء وعطيتهم تعريف من العمل بالراتب الي مايتجاوز 4000 ريال وجبت لهم ورقه مصدقه من البنك ان علي قرض حسب طلبهم وجبت لهم عقد ايجار خاص لي . وبعد طول انتظار احسبهم بيقولون لي مبروك شملك الاعفاء . لا قالوا لي امسك الباب سدد .

وحتى لو قبلوني بالاعفاء ياخي حرام باقي الناس جالسه تسدد على هالمبالغ الكبيرة الي كلها ظلم في ظلم . يعني اقل شي نسدد مبلغ معقول . مو ثلاث الاف ريال كل ترم .

[NOKIA]

اخوي فهد الله يعطيك العافيه على ردك . ماندري وين الايجابيه فيه لكن خلونا نجرب كل الطرق .مراسله الجرايد ونتفق على جريدة وحدة بوقت واحد ونرسل على كاتب معين . بس الموضوع لازم شخص من اداره المنتدى يدخل هنا ويبلغ الناس خلونا نجرب وش يضرنا ماحنا خسرانين شي ازين من اننا نقول هذا ينفع وهذا ماينفع .

هذا ايميلات الكتاب الي ذكرتهم بحثت فوق الانترنت وطلعوا لي مدري صحيح او غلط ايميلاتهم.


الاسم : خالد حمد السليمان
بريد إلكتروني : Jehat5@yahoo.com


الاسم : عبده خال
بريد إلكتروني : abdookhal@yahoo.com

قدرت احصل ايميلات هالكاتبين بس

[فهد العنزان]

المشاركة الأصلية كتبت بواسطة nokia اخوي فهد الله يعطيك العافيه على ردك . ماندري وين الايجابيه فيه لكن خلونا نجرب كل الطرق .مراسله الجرايد ونتفق على جريدة وحدة بوقت واحد ونرسل على كاتب معين . بس الموضوع لازم شخص من اداره المنتدى يدخل هنا ويبلغ الناس خلونا نجرب وش يضرنا ماحنا خسرانين شي ازين من اننا نقول هذا ينفع وهذا ماينفع .

أخوي صدقني جرب تراسل الكتب المذكورين

لن المسئولين في البلد بيعمل لهم حساب !!!

وانا موظف علاقات عامة أخوي اكثر من 12 سنة وكل يوم عندي

بالمكتب عندي موظفين مكلفين بمتابعة كل ما يكتبة

الكتب بجميع الصحف !!!

هؤلاء لهم وزنهم وغيرررررررررهم كثير

أخووووووووووووك

[اوطان]

ولا تنسوا

الي مايعدي السنه التخبيصيه لا قدر الله ويعطونه صيفي او اضافي

الله لا يهينه يروح يكع فلوس كعكعه

مافي شيء ببلاش

يعني ناتج عمليتك الحسابيه اضربه على اقل تقدير في نص او ربع عدد الطلاب

وطبعا هتكون بالزياده وفي الزياده افادة وفي الافاده جلاده

ودوري يارحا على حالنا دوري