دخلت اسنان ولكن

[wajarif]

السلام عليكم ورحمة الله وبركاته
منجد مني عارفة من فين ابدا حكايتي
بس ابدا بالف شكر ل اعضاء المنتدى وخصوصا Dr.nano0ok
لانك منجد الي محمستني انتي والبقية للقسم
انا قصتي تشبه قصتك شوية انا كنت طول حياتي ابغى طب بشري وماكنت حاطة في بالي طب اسنان بالمرة لانو القسم ماكان شادني وكنت احسه ممل والكل كان يعتبر البشري احسن
ولمن رتبت رغباتي في شي في نفسي يقلي حطي اسنان اول قبل بشري مع انو انا ابغى بشري بس حطيت اسنان ومااتوقعت انو انقبل
وكنت مسافرة قبل ماتطلع النتايج وفي السفر اكتشف اني دخلت اسنان بكيت وقلت ماابغى ودنيا
بس في شي صغير يقلي امكن هادا ربنا مقدرلك هوا امكن وامكن بس عشان اعرف اني جبت ولله الحمد نسبة كويسة
وجلست افكر طيب دا الي ابغاه واسال كل الي اعرفهم
ماما وبابا عجبهم الاسنان لانو مافي شفتات وراحة بس انا ماكنت افكر كده انا كنت ابغى شي احبه
وكلمت صحبتي وقالتلي انو امكن لو دخلتيه تحبيه
سوري اني طولت وبس انا محتارة بجد
كل ماادخل المنتدى واشوف تعليقاتكم وكيف فرحانين اقول ياريتني زيكم
وبالخص والله مااكدب كلام Dr.nano0ok يطمني بزيادة
انا عارفة اني رزلتها وطولت بس انا منجد خايفة
احول ولا اجلس
وسمعت انو الوظايف الحكومية قليلة
بس الدراسة مملة؟
خايفة اكمل واندم وخايفة احول واندم
منجد حاسة نفسي ضايعة
سوري انوكلامي اكتئاب
شفت لمواد تانية واتحمست
وفي سوال انا لمن كنت مسافرة فاتتني الدورتين
وهما للبشري سوالي الاسنان حيستفيدوا منها ولا يعني اشتري الكتب وابدا اطلع عليها ولا الاسنان مايحتاج


منجد مرة شكرا على رحابة صدركم
واتمنى انكم تساعدوني
انا مرة متحمسة للاسنان بس من الجدول باين انو كانو ملل
شكرا

[Randa39]

يمكن انا ما ادري كويس عن القسمين
بس (عسا ان تكرهو شيئا وهو خير لكم )
صدقني ما تدري فين الخيرة
بس فيه شي مستغربة منو شوية لما جاتك ورقة الرغبات حطتي الاسنان رغم انك تبغي بشري
يمكن خيرة ما تدري؟؟
وعلى حكاية ممل ما اعتقد لانو لا تحكمي ع الشي واله وانتي مجربتو
وترى من كتر اللي في بيتنا يشتكو من اسنانهم اتمنيت احد بس من العائلة دكتور اسنان
مررة ما اعتقد انو وظائف قليلة
وصراحة انا نفسي ادخل اسنان بس عندي مشكلة اني اقرف بسرعة واخاف من الدم
وبالتوفيق يا عسل
وتفائلي بالخير تجديه

[Naser]

السلام عليكم

يمكن هذي اول مشاركة في في الاقسام الطبية
لكن شدني الموضوع

طبعا عسى ان تكرهوا شيء وهو خيرا لكم , والأكيد الأخذ بالأسباب
نصيحتي من تجربة طويلة جداً .. أتجهي للقسم اللي راح تبدعي فيه , وماراح تبدعي بقسم إلا لو حبيتيه
فـ أديب مشهور ولا طبيب فاشل ( القصد ) قسم راح تبدعي فيه حتى لو كان سهل بنظر البعض أفضل بمراحل من قسم صعب بنظر البعض لكن ماراح تحققي ذاتك ( فـ تبدعي )
أبحثي عن القسم اللي بتحققي ذاتك فيه , بغض النظر عن إيش هوا القسم :)

واتمنى لك التوفيق
وياهلا

[wajarif]

شكرا ليكranda39 وجزاك الله خيير
والف شكر للnaser لانو زي ماانتا شايف الموضوع اتقفل وانا من غير مااعرف اجوبة لاسئلتي ولدحين كحتارة ومستغربة من الدكاترة الاسنان فينهم محد بيرد مع اني محتاجتهم الله يسعدها Dr.nano0o ردتلي بس محد جاوبني وشايفة انو كتير دخلوا بس ليش مابيردوا؟.؟؟؟؟

[Glamor Mada]

اممممممممممم والله يا اختي انا نفس حالك ..
بس خلاص بما اني قررت اسنان خلاص الخيره فيما اختاره الله .. طبعا وانا لازم اشد حيلي واعمل اللي عليا اكيد والتوفيق حيكون من ربك ..
وانتي محتارة بين البشري او الاسنان .. بس طبعا في النهاية الاختيار كان منك وبرضاكي اممممممم في مثل اسباني يقول Cuerpo en la cama..si no duerme descansa امممممم احاول اترجملك هوا بالعربي .. معناتو امممممم يعني زي ما تقولي .. كل واحد ينام عالجنب وبالطريقه اللي تريحو .. شوفي انتي لإيش مرتاحه اكثر وصدقيني حتبدعي لو كان في نيتك انك تبدعي ^^
الله يوفقك ياااارب ويسلهك طريقك ^^
وكل سنه وانتي طيبه

[wajarif]

تسلم ياخويا وجزاك الله خير
على قولك بس انا اخترت ولدحين عندي شك بس نقول الحمد لله على كل حال
وانتا بصحة وسلامة
والله يوفقنا كلنا يااااارب
شكرا على مرورك

[fasb1406]

المشاركة الأصلية كتبت بواسطة wajarif السلام عليكم ورحمة الله وبركاته منجد مني عارفة من فين ابدا حكايتي بس ابدا بالف شكر ل اعضاء المنتدى وخصوصا dr.nano0ok لانك منجد الي محمستني انتي والبقية للقسم انا قصتي تشبه قصتك شوية انا كنت طول حياتي ابغى طب بشري وماكنت حاطة في بالي طب اسنان بالمرة لانو القسم ماكان شادني وكنت احسه ممل والكل كان يعتبر البشري احسن ولمن رتبت رغباتي في شي في نفسي يقلي حطي اسنان اول قبل بشري مع انو انا ابغى بشري بس حطيت اسنان ومااتوقعت انو انقبل وكنت مسافرة قبل ماتطلع النتايج وفي السفر اكتشف اني دخلت اسنان بكيت وقلت ماابغى ودنيا بس في شي صغير يقلي امكن هادا ربنا مقدرلك هوا امكن وامكن بس عشان اعرف اني جبت ولله الحمد نسبة كويسة وجلست افكر طيب دا الي ابغاه واسال كل الي اعرفهم ماما وبابا عجبهم الاسنان لانو مافي شفتات وراحة بس انا ماكنت افكر كده انا كنت ابغى شي احبه وكلمت صحبتي وقالتلي انو امكن لو دخلتيه تحبيه سوري اني طولت وبس انا محتارة بجد كل ماادخل المنتدى واشوف تعليقاتكم وكيف فرحانين اقول ياريتني زيكم وبالخص والله مااكدب كلام dr.nano0ok يطمني بزيادة انا عارفة اني رزلتها وطولت بس انا منجد خايفة احول ولا اجلس وسمعت انو الوظايف الحكومية قليلة بس الدراسة مملة؟ خايفة اكمل واندم وخايفة احول واندم منجد حاسة نفسي ضايعة سوري انوكلامي اكتئاب شفت لمواد تانية واتحمست وفي سوال انا لمن كنت مسافرة فاتتني الدورتين وهما للبشري سوالي الاسنان حيستفيدوا منها ولا يعني اشتري الكتب وابدا اطلع عليها ولا الاسنان مايحتاج منجد مرة شكرا على رحابة صدركم واتمنى انكم تساعدوني انا مرة متحمسة للاسنان بس من الجدول باين انو كانو ملل شكرا

اهلين اختي اذا تبغي نصيحتي ومن واقع تجربة كملي دراستك ولا تحولي .. الحال من بعضو جميعنا وأولهم أنا كنت كاره هالقسم الى سنة رابعة وبعدها بدعنا ولله الحمد..أما بخصوص وظائف لا تخافي الوظايف موجودة ولله الحمد بس لازم تجدي من هالحين وما تعتمدي لانك دكتورة انك راح تتوظفي حتى بدرجة مقبول... ويارب نتوفق أجمعين

[DreamY CaT]

أهلآ أختي .. ^_^

هذآ الموضوع حتلآقي فيه اللي يريحك ان شآء الله , وأولآ وأخيرآ رغبتك الدآخلية هي الأهمـ مهما سمعتي آرآء ..

http://www.skaau.com/vb/showthread.php?t=225358

الله يوفقكـ , ورمضآنك مبآرك

[wajarif]

الف شكر ليكم على ردودكم الحلوة
بس كنت بسال المكافات الامتياز للبنات متى
ومتى نغير بطايقنا لانو لمن رحت الجامعة في شعبان قالوا لسه؟؟

[Dr~NanoOok]

المشاركة الأصلية كتبت بواسطة wajarif الف شكر ليكم على ردودكم الحلوة بس كنت بسال المكافات الامتياز للبنات متى ومتى نغير بطايقنا لانو لمن رحت الجامعة في شعبان قالوا لسه؟؟

اهلا عزيزتي

إن شاء الله ردي.. وردودنا جميعا ريّحتك وافادتك =)

,

بالنسبة لمكافأة الامتياز
فما يحتاج تقدمي طلب عليها.. كل شي حيكون جاهز والشؤون الطلابية عندنا بطب الأسنان
حتعملوا ليكم.. وحتسلمكم هو في بداية السنة الدراسية
فلا تاخدي همها

وبالنسبة لتغيير البطاقات
فتقدري هذه الفترة انك تروحي لعمادة القبول و التسجيل وتغيريها

لكن مو لازم

وبرضو ببداية السنة وبأول اسبوع دوام.. تقدري تروحي انتِ والبنات وتغيروها
وكليتنا حتوفرلكم باص يوديكم لهناك ويرجعكم

<< شفتي كيف كليتنا مدلعة بناتها ومهتمة بيهم ^_^
وفعلا هي كده.. والكل يشهد عن اهتمام إدارة طب الأسنان بطالباتها