نصيحة منك ربّما تغيّر مستقبلي فلا تبخل

[ريان ..~]

السلام عليكم ورحمة الله وبركاته

طلاب وطالبات ادارة الموارد البشرية

معاكم طالب هندسة تخطيط بكلية تصاميم البيئة وهذي سنتي الثانية .. للأمانة تعبت من تخصصي تعبت من السهر في الكلية لإنجاز أعمال ومشاريع وآخرتها يكون الرد من الدكتور الموقّر "دا مش شغل" ، هذا الترم بالذات تعبت والله ياجماعة الخير اني اداوم في الكلية صبح ومساء ليل ونهار .. ولما ارجع البيت أهلي يستقبلوني بالاحضان .. ماعاد فيه وقت العب كورة ، نادي استحالة اشترك .. حتى طلعات والله بطلتها .. صار البريك عندي يروح نوم .. خلاص يادوب تلقى وقت نام فيه احسن مستحيل تسوي شي ثاني !

ف قبل أسبوع قعدت مع الوالدة والوالد وطرحت عليهم فكرة اني احوّل .. وللأمانة فرحوا وشجعوني على هذي الخطوة .. لأن كليّتي أولاً أرهقتني بدنيّاً وحرمتني من أشياء كثيرة كوني بعمر الزهور ، والأهم والله ياجماعة الخير صرت أتوتر كثير .. أفكر قبل لا انام بالعنى والتعب ونتيجة هذا العنى والتعب .. يعني معاناة والله العظيم ما اقدر أوصفها ! .. دخلت الكلية ودفعتي تقريب ال 60 طالب .. وترم بعد ترم والرؤوس تتساقط كورق الزهور في فصل الخريف .. الان وبعد سنة ونصف بقي من دفعتنا 34 طالب فقط ! أي بمعنى أوضح 40% من الدفعة "باي باي" ! طبعاً النسبة قابلة للزيادة بشكل كبير والله اعلم ..
نظام كليتنا مادة أستوديو كل ترم وهذي المادة ب 5 ساعات .. واللي يرسب في المادة أو يسحبها يتأخر سنة كاملة عن التخرج .. والدكتور كل محاضرة "دا مش شغل حترصبوا .. حترصبوا" !
عشان كذا أصابني وكثير من الطلاب التوتّر النفسي والوالدة والله تقول أخرج من الكلية قبل مايجيك مرض قلب لا سمح الله ..
عموماً أثناء تفكيري بتوديع أرجاء كليّتنا الكئيبة فكرت بكلية الادارة والاقتصاد وعلى وجه الخصوص تخصص إدارة موارد بشريّة وفي بالي أسئلة كثيرة وأتمنى من طلاب الانتظام أو الخريجين ب بكالوريوس انتظام الاجابة عنها مشكورين
أولاً هل بسهولة يتم تحويلي بمعدل 3,3 تقريبا ؟
ثانياً هل تحويلي سيكون مباشرة على التخصص أو فيه سنة عامة وبعدها أتخصص ؟
ثالثاً هل سيكون مستقبلي الوظيفي مضمون باذن الله اذا ما استبعدنا فكرة العمل في أحد البنوك ؟
رابعاً هل الضغط يكون دائم أم فقط في اسابيع الاختبارات ؟!
خامساً هل التخصص ممتع ؟
سادساً هل فيه سهولة إني أرفع معدلي ولا الوضع صعب زي كليّتي بالعربي مستوى "أغلب المواد" يهيئك انك ترفع معدلك وتتميز ب a أو a+ ولا تقول انا أعدي المادة ب 60 وحلو الوضع ؟!
واللي عنده أي زيادة على هذي الأسئلة ياليت يفيدنا

أخيراً شكراً لكل من أفاد أو حاول الإفادة .. والله يجزاكم جميعاً كل خير

[ريان ..~]

رفع~~

[najmah]

مرحبا أخوي ريان

الله يوفقك ويكتب لك الخير ... بكل الأحوال انت لازم تستخير
ومن أهم أسباب النجاح إنك تدخل تخصص ترتاح فيه وتحبه .. دامك مو مرتاح من هالتخصص غيره أفضل عشان تنجح فيه
بصفة عامة كل أقسام كلية الإقتصاد والإدارة ممتعة وناجحة ولها مستقبل وظيفي وتخصص إدارة موارد مطلوب كثير هالأيام ..
أهم شي تكون لغتك الإنجليزية تمام .. أنا إدارة أعمال والتخصص رائع ولكن مشكلتي اللغة ..
والضغط هو دايما يجي بالامتحانات أكثر شيء ع العموم الله يوفقك وأنا أأيدك على التحويل والله يهديه الدكتور كرهكم بالتخصص ..

بالتوفيق وأعتذر إن ما أفدتك عن كل الأسئلة إن شاء الله غيري يفيدونك أكثر لأن ماعندي الخبرة الكافية
بس أنصحك تمر للإدارة المسئولة وتستفسر منهم عن كل هالأشياء ..

[ريان ..~]

الله يجزاكِ خير

[Salhn]

اذا الكليه اللي انت فيها مو عاجبتك او شي اطلع منها .. وانتا اخترتها ليش من الاساس !؟ لكن اذا التخصص اللي انت فيه حلمك واصل وبتوصل للي تبغاه واكيد الي يبغى يوصل لشي بيتعب ومستحيل يلاقي الطريق مفروش له ورد .. وتوقع انك تواجه ناس اخس من الدكتور الي تقول عنه ولازم تسلك وتمشي وتتعب عشان توصل ان شاء الله .. بخصوص قسم ادارة اعمال يقبلو المعدل هذا والكليه بكل اقسامها ممتعه الصراحه وكرفها وقت الاختبارات بسس وفي دكاتره بيعطوك واجبات كثيره لكن ماتاخذ من وقتك .. ورفع معدلك سهل جدا باذن الله المواد مو صعبه مره وتقدر ترفع معدلك بالراحه.. ومستقبلها الوظيفي مضمون دوليا كمان غير البنوك طبعا وللمعلوميه ادارة واقتصاد حاصله ع الاعتماد الاكاديمي يعني شهادتك معترف فيها المهم روح للتخصص الي تشوف نفسك فيه وعاجبك وربي يوفقك