دفعة 430~ أحلى دفعة !

[آمل..~]

صباح / مساء ~> الورد ....!

يـا هـلا بـ دفعة 430
كيفكم ..؟!
وكيف الشعور الجامعي؟

الموضوع عام لكل الطالبات المستجدات .. بس أكيد حطيت كم شيء مخصوص لبنات تخصصي الجميلات

بغيت احكي بهالموضوع عن كللللل شيء يخص الجامعة والدراسة .. علماً بأني مستجدة مثلكم .. بس ميخالف لازم نتعاون عشان نصير أحسن دفعة

أكيد فيه ناس خايفين .. وفيه ناس قلقانين .. وفيه ناس ماودهم يداومون ..... الخ الخ
بس بنحكي عن كل شيء ان شاء الله .. عشان ماتبدا الدراسة الا وحنا متحمسين

شيء طبيعي كلنا مثلك وانا أكثر وحدة بعد! .. واكيد راح تقلقين وتخافين .. مكان جديد عليك ونظام جديد وناس جدد ماتعرفين منهم أحد
لكن هالشعور بيزول بسرعة ان شاء الله .. أكيد راح تكرهين الجامعة بالبداية .. بس كلها اسبوعين أو ثلاث بالكثير وتتعودين ..
وكثير كثير ناس يقولون ان الجامعة أحلى من المدرسة بكثيييير

لازم تدركين أهمية الدراسة والشهادة .. وانها أهم شيء بحياتك الحين .. وانك طالبة علم .. وطلبك للعلم تقدرين تخلينه عبادة خصوصاً اننا الحين بالمجال الصحي
لازم تشدين حيلك .. لاتقولين ضغط ومدري ايش .. الدراسة لابد منها .. اجل تبين تجلسين بس كذا بدون هدف بالحياة؟ ولا تبين هدفك يجيك بالساهل؟ أصلاً حتى العطلة ماراح يكون لها طعم لو كنتي بأيام الدراسة مرتاحة .. وحتى النتيجة ماراح يكون لها طعم لو انك ماتعبتي عشان تجيبينها

ودايم تذكري قوله تعالى: " يَرْفَعِ اللَّهُ الَّذِينَ آمَنُوا مِنكُمْ وَالَّذِينَ أُوتُوا الْعِلْمَ دَرَجَاتٍ وَاللَّهُ بِمَا تَعْمَلُونَ خَبِير " *سورة المجادلة آية 11

وتفسير الآية~
اقتباس لا ريب في أن لازم رفعه تعالى درجة عبد من عباده مزيد قربه منه تعالى، و هذا قرينة عقلية على أن المراد بهؤلاء الذين أوتوا العلم العلماء من المؤمنين فتدل الآية على انقسام المؤمنين إلى طائفتين: مؤمن و مؤمن عالم، و المؤمن العالم أفضل و قد قال تعالى: «هل يستوي الذين يعلمون و الذين لا يعلمون»: الزمر: 9.
و يتبين بذلك أن ما ذكر من رفع الدرجات في الآية مخصوص بالذين أوتوا العلم و يبقى لسائر المؤمنين من الرفع الرفع درجة واحدة و يكون التقدير يرفع الله الذين آمنوا منكم درجة و يرفع الذين أوتوا العلم منكم درجات.

و في الآية من تعظيم أمر العلماء و رفع قدرهم ما لا يخفى.

و أكد الحكم بتذييل الآية بقوله: «و الله بما تعملون خبير».
شعور رائع صح؟!
اللهم اجعلنا من العلماء

وانتي بالجامعة ~
لا تفوتين ولا محاضرة .. وركزي بالشرح عشان المذاكرة بالبيت تصير سهلة عليك .. ومب شرط تجلسين قدام لان المكان مب مهم المهم انك تركزين .. انتي شوفي وش المكان اللي ترتاحين فيه واجلسي فيه دايم .. واذا انتي من النوع اللي يتشتت بسرعة بعدي عن البنات اللي يحكون كثير .. واكتبي كل اللي تقوله الدكتورة .. حتى لو حسيتي انه مو مهم يمكن يفيدك بعدين ..!
واذا تعرفين احد من السنوات اللي قبل تقدرين تاخذين كتبهم واوراقهم خذيها .. زيادة الخير خيرين

لازم تدركين أهمية الدراسة .. ولازم تفهمين انك مسؤولة عن نفسك خلاص .. مب زي المدرسة المعلمة تكتب لك كل شيء على السبورة وتلاحق وراك عشان تتأكد ان دفترك كامل .. بالجامعة لازم انتي تكتبين كل شيء بنفسك .. وتدرسين نفسك وتفهمين نفسك .. واذا فيه واجب انتي تروحين تودينه للدكتورة مافيه احد بيجي ياخذه منك ..!
بس ترا هالشيء مب صعب ! منتب أول وحدة تدخل الجامعة .. وكثييير ناس دخلوا وطلعوا وتميزوا

وتعالي الصباح بدري .. لا تتأخرين .. وانتبهي لساعتك وقت البريك ترا مافيه جرس .. وادخلي القاعة قبل المحاضرة بـ 5 دقايق .. معليش الحرص زين .. وازين عشان تلقين لك مكان يناسبك وتقدرين ترتبين عفشك ولا انك تدخلين محتاسة (ان كانك راعية عفش مثلي )

روتينّا اليومي ~
لنفرض مثلاً ان دوامنا ينتهي الساعة 4 العصر .. ووصلنا البيت 5 العصر (انا افرض اسوء الاحتمالات للاحتياط بس ) .. انا فكرت بأكثر من روتين
روتين نمبر ون: تتروشين وتاكلين (صارت الساعة 6) .. تمسكين دروسك وتجلسين تذاكرين (صارت الساعة 10) .. تنامين .. عاد كلن يصحى على حسب الوقت اللي ياخذه وهو يتجهز .. وعلى حسب السيارة اللي بتوديه ومن معاه
روتين نمبر تو: تتروشين وتاكلين وتجلسين على النت أو مع أهلك لين أذان العشاء .. بعدها تصلين وتنامين لين الساعة 3 أو 4 .. ومن تصحين تجلسين تدرسين وبعدها تتلبسين وتروحين للجامعة
[ أحس هالروتين أحلى شيء لعدة أسباب .. أولاً: وقت النوم مرة كويس .. ثانياً: فيه جلسة مع الاهل .. ثالثاً: المذاكرة تكون بالفجر وهذا أحسن وقت للمذاكرة .. رابعاً: ان المذاكرة تكون قبل الجامعة يعني لمن تروحين للمحاضرة تصيرين توك دارسة الدرس اللي قبل ويصير ربط المعلومات عندك سهل ]
روتين نمبر ثري: أول ماترجعين تنامين لين 7 .. تجلسين تتقهوين مع اهلك أو على النت لين 8 .. وتجلسين تدرسين لين 12 .. وتنامين

طبعاً كل بنت واللي يناسبها .. فيه بنات لازم ينامون أول مايرجعون .. وفيه بنات عادي عندهم .. انا بالنسبة لي النومة اللي بالوسط تجيب لي النكد عشان كذا ما انام ..!
وبرضه لو تلاحظون اني حاطه النت بكل روتين لأني مدمنة عليه مرة .. ولازم اجلس عليه لو خمس دقايق باليوم .. بس طبعاً هو شيء مب مهم .. ولازم ماتخلونه يأثر على مستواكم الدراسي
ولو كان بيتك بعيد عن الجامعة ممكن تستغلين وقت الطريق .. مثلاً تفطرين بالسيارة أو تجلسين تدرسين أو تحلين لك أي شيء .. وممكن تقولين للشغالة تحط لك غداك بالسيارة عشان اذا طلعتي من الجامعة تاكلينه بالسيارة

فيه مليون طريقة للمذاكرة .. كلن وطقوسه

أول شيء بقول لكم طقوسي
لازم مذاكرتي تكون أول ما اصحى من النوم سواء بالويكند ولا بأيام المراجعة او بأيام الدراسة اذا كنت نايمة العصر .. وامسك الكتاب واجلس اذاكر بدون بريكات .. لاني اذا اخذت بريك خلاص ماعاد اقدر ارجع زي أول .. ولازم كتبي ودفاتري كلها ملونة وملصق عليها اوراق ملونة وشرح بالرصاص واحياناً سمايلات .. وانا من النوع اللي يذاكر بصوت عالي واردد الشيء اللي ابي احفظه .. وطبعاً قبل احفظ لازم افهم ما اقدر احفظ بدون فهم .. وفيه عندي لوحة صغيرة شاريتها من جرير نصها فلين ونصها سبورة .. الفلين الصق عليها عبارات تشجيعية والسبورة كاتبة فيها الأيام والمواد والاشياء اللي لازم اسويها ( راح انزل صورة للوحة بنهاية الموضوع ان شاء الله )
ايه صح .. انا الدراسة اليومية ادرس بغرفتي على المكتب .. بس ايام الاختبارات ادرس بغرفة التلفزيون بس طبعاً والتلفزيون طافي .. بس آخر ترم درست كلش بغرفتي

أياً كان المكان اللي بتدرسين فيه وترتاحين فيه .. لازم يكون عفشك كله فيه عشان مايكون لك عذر انك كل شوي تقومين تجيبين شيء .. ولازم تكون اضاءة المكان زينة .. وحبذا يكون هدوء بعيد عن الملهيات

ووانتي تدرسين علقي على باب غرفتك شيء يفهّم اهلك انك تدرسين عشان محد يزعجك .. مثل هذي:

[ لقيتها بالنت .. بس ان شاء الله راح أسوي لنفسي قريب ]

خلي كتبك ودفاترك كلها ألوان .. خليها فرفوشية .. استخدمي هايلاترز والأوراق الملونة .. خلي كل معلومة بلون غير اللي قبلها تساعدك بانك تتذكرين وتفرقين بين المعلومات .. وعشان تنفتح نفسك للمذاكرة
ولو تحطين استكرات وسمايلات عشان تونسك مافيه مانع

اذا عندك معلومات كثير مرتبطة بعض وحاسة انك محيوسة .. سوي رسم بياني يربط هالمعلومات ببعض .. يعني دوائر واسهم والعلاقة على الاسهم .. زي هذا:

بس طبعاً خلي حقك ملون ومرسّم عليه أحسن

اذا المادة فيها تعاريف كثير أو مصطلحات كثير .. اجمعيها كللللها في جدول عشان يسهل عليك انك تذاكرينها وتراجعينها وتفرقين بينها بعد

اذا مثلاً عندك تعريف طويل ابدي رقميه .. واذا فيه معلومة طويلة رقميها بعد .. يسهّل عليك الحفظ

ادرسي زين تجيبين زين ..اجتهدي قد ماتقدرين .. شدي حيلك وجيبي نتيجة تسعدك وتسعد اهلك .. شدي حيلك وادخلي التخصص اللي تبينه سواء كان طب بشري أو طب أسنان أو صيدلة أو علوم طبية .. حتى لو كان التخصص اللي تبينه المعدل اللي يطلبه مب عالي معليش ادرسي وجيبي معدل عالي بس عشان تحسين بالرضا عن نفسك ولا انك تخصصين ع الحافة ..!

ادرسي أول بأول عشان ماتنضغطين أيام الاختبارات .. لا تتكاسلين ولا تفوتين محاضرات ولا تتساهلين بالواجبات .. ترا أيام الثانوي والدراسة ليلة الاختبار ولّت

دايم خليك مرتبة .. نظمي أوراقك بملفات وكتبك حتى شنطتك خليها مرتبة .. وخلي معاك دفتر نوت صغير تكتبين فيه الواجبات اللي عليك والاختبارات حبذا يكون دفتر مواعيد هذاك اللي مقسم لأيام وشهور وكذا << ما اعرف اشرح

خلي عندك بالمكتب لوحة صغيرة عليها عبارات تشجيعية وتذكير بمواعيد الأشياء المهمة

لمن يكون فيه واجب أو اختبار نص الترم واخطأتي فيه حاولي انك تعرفين خطأك وتصحيحه عشان ماتغطلين فيه بالاختبار النهائي .. وحبذا تدونين الخطأ والتصحيح عندك عشان جد ماتنسينه طوول حياتك

حاولي تاكلين أكل صحي .. مب شرط تقلبين اكلك كله خضروات وفواكه .. لا كلي من مطاعم ووسعي صدرك .. بس على الأقل لو حبة برتقالة أو تفاحة باليوم .. أو اشتري فيتامينات من الصيدلة وكليها (بس استشيري الطبيب أول )

دلعي نفسك وانتي تذاكرين .. جيبي تشوكلت ولا عصير ولا شاهي أو قهوة .. أو تروشي وتعطري قبل تدرسين عشان تحسين بانتعاش وانتي تدرسين

لا تخلين الدراسة تلهيك عن صلاتك .. اذا أذّن وانتي تدرسين وقفي وروحي توضي وصلي وادعي .. ما اتوقع راح تاخذ منك أكثر من 10 دقايق .. وولا راح تقطع حبل أفكارك .. واعتبريها بريك

حاولي انك تتركين الأغاني قد ماتقدرين .. ترا كثر الذنوب يسبب النسيان (عشان كذا كثري من الاستغفار اذا حسيتي انك بتنسين) .. وترا الاغاني ماتجيب الا الهم والنكد

قبل تنامين اقري لك شوي قرآن .. لو وجه على الأقل .. ماراح ياخذ منك وقت وولا راح يطير النوم

[ طبعاً قراءة القرآن وترك الأغاني مب قصدي انها لوقت الدراسة وبعدين نتركها .. لا بالعكس المفروض تكون ملازمة لنا في حياتنا عشان ربي يوفقنا بأمورنا كلها .. وعشان مايكون همنا درجات الدنيا وبس! ]

وهذا ملف فيه صورة أدعية .. هي كبيرة بس اذا طبعتيها بيطلع مقاسها مضبوط .. تقدرين تطبعينها وتعلقينها بمكتبك وتقرينها قبل تدرسين

4shared.com - online file sharing and storage - download أدعية.rar

أهم شيء حالتك النفسية .. لاتخلين أحد يأثر على نفسيتك .. اللي يقولون "ضغط - كرف - تعبنا ... الخ" لا تسمعين لهم .. اذا انتي درستي أول بأول كل شيء بيطلع سهل عليك .. شيلي من بالك انك بتنكرفين .. كلها 3 ساعات دراسة بالكثير بالبيت لو درستي أول بأول .. وبالاختبارات بيكون كل شيء كأنه مراجعة لانك فاهمة كل شيء ودارسة كل شيء .. وحتى لو كان فيه شوية ضغط ايام الاختبارات عادي! كلها اسبوعين أو ثلاث اسابيع وبعدها عطلة ..!

" The most dark hour is the hour before sunrise "

لمن تتعبين راح تلقين نتيجة تعبك .. ونتيجة التعب دايم حلوة

خليك متفائلة دائماً .. " تفائلوا بالخير تجدوه " .. وابعدي عن البنات المتشائمات اذا انتي من النوع اللي يتأثر بالصديقات بسرعة .. ولا تخلين أي ظرف يأثر على مستواك .. لو الظروف تمنع الانسان من الدراسة كان محد نجح ! لا تستسلمين لأي شيء أبد ! ولا تظنين ان الدنيا بتصفى لك .. أكيد راح يجي مليون شيء يكدر صفو حياتك ..!

ومب معنى انك لازم تجيبين معدل عالي يعني ان مالك حياة .. تقدرين تطلعين وتنبسطين بس طبعاً طلعاتك تقل .. إلغي طلعات أيام الاسبوع .. وخلي الطلعات بالخميس والجمعة .. نظمي وقتك وواجباتك ودروسك وراح تلقين لك وقت للطلعات

هذي صورة لورقة أحياء جمعت فيها المعلومات ولونتها ..!

وهذي اوراق حاسب كانت مسويتها لنا العضوة lamloom (الله يجزاك خير) .. ملونة وتفتح النفس للدراسة ..!

هذي ستكرات كيووت مرة .. مكتبة جرير عندها ستكرات كثير .. ومكتبة اسمها "بلنسيه" عندها اشياء كيووت مرة واتوقع العبيكان عندهم ستكرات حلوة بس انا اهلي دايم يروحون لجرير

هايلايترز وأوراق .. الأوراق شريتها من امريكا والهايلاترز تلقونها بأي مكتبة وحتى الأوراق الملونة بكل المكتبات

دفاتر عندي من أول .. اللي بالوسط من سنتر بوينت .. واللي ع اليمين وع اليسار من مكتبة صغيرة نسيت اسمها

برضه دفاتر بس صغيرة شوي .. اللي ع اليمين من كليرز .. واللي ع اليسار من سنتر بوينت .. بس تراني شاريتها منزماان يعني ممكن ماتحصلونها

نوتات .. اللي ع اليمين من "غراس" .. واللي بالوسط من امريكا .. واللي باليسار من مكتبة بلنسيه المذكورة آنفاً

طوابع تحفّز .. شريتها من مكتبة جرير

ملفات .. أول اثنين ع اليمين من "معاً لنضيء الكون" .. وآخر اثنين من جرير

مادري وش اسمها .. انا مسويتها

هذي اللوحة اللي قلت لكم عنها .. الحين فاضية عشاننا اجازة .. بس ان شاء الله أول ما اعبيها راح اصورها وانزلها لكم .. وشريتها من جرير

وهذي سبورة توني شاريتها من محل ياباني اسمه دايسو بالعثيم مول اللي بخريص .. اعجبني فيها انها مقسمة

انتهى الموضوع ..!

" سبحانك اللهم وبحمدك، أشهد أن لا إله إلا أنت، أستغفرك وأتوب إليك "

أول موضوع سنع لي بالمنتدى .. أتمنى يكون قد المقام

وآسفة على الاطالة

دفعة 430 .. نهاية العقد .. ختامه مسك بإذن الله

في أمان الكريم ،،

يللا ردوا

[ الموضوع جهد شخصي تعبت عليه! ما احلل ولا اسامح النقل لموقع أو لمنتدى أو لايميل الا بذكر المصدر (اسمي والمنتدى) ]

الموضوع خاص بلولو <لها خآآلص شكري وآمتنآآن

مرروها لكل طالب اوطالبه جامعيه فلعلهم يستفيدون مما فيها..

[بتوحشنـــي]

يسعد قلبك على النصائح الرااااااائعه ياأموله

من جد موضوع قمه في الروعه ونصائح أحلى وأحلى

يعطيكي ألف عاافيه على الموضوع المتعب فيه من جد وترى ثلث الكلام هدا أنا كمان أعمله قبل الاختبارات

وكويس أستفتدت منك كثيير يعني جاري على المكتبه >>>>>>>

والله يديكي على قد نيتك ياقلبي

ويسعدني أكون أول وحده مرت وقرت كلامك الحلو

الله لا يحرمنا منك

تحياتي لقلـبك

[أحاسيس مبعثرهـ]

\
\


مشاء الله تبارك الله

الله ينور لك طريقك اختي

بصراحهـ موضوعك أكثر من راااائع

أشياء راحت عن بالي الحين نبهتيني لها

ربي يوفقك في الدارين ان شاء الله

أشكركِ من الاعماآآق

\
\

[..Strawberry..]

يسلمو ياعسل
وكلمة روعة ع الموضوع قليله عليه

ومن جد استفدت منك

تحيآتي
..stropary..

[فهد العنزان]

مشاء الله تبارك الله

[عنيد بس عميد]

ماشاء الله تبارك الله
أمداك تكتبين قصة حياتك هههههههههههههههه
أمزح معك معلومات ونصائح قيمة جعلها الله في ميزان حسناتك
وأسأل الله أن يوفقك في الدنيا والأخرة وأن يجعل النجاح حليفك وأن ينور قلبك ويحفظك من كل شر

[متفائله واليأس بالمرصاد]

يسلموا ياعثثثثثثثثثل على النقل المميز

[ღسِـهـآمــ اِلشـوووقّღ]

مـــــآ شآء الله عليك عيني عليك بآردهـ
موضوع متعووووب عليه تسلمـ انآملك
الذهبيــــــــه بجد موضوعك مهم ومفيــــــــد^_^

[Mr.Perfect]

ما شاء الله عليكي .. موضوع طويييييييل إنتي كاتبه قصة حياتك ولا أيه؟ أمزح لا عن جد موضوع روعه وقريته بتركيز عالي وأكيد استفدت منه لأنه ما يخص البنات بس ويخص الشباب كمان .. بس يا ليت لو كان حجم الخط أكبر من كذا عشان عيوني تعبت وأنا قاعد اقرا الموضوع

بصراحة موضوع يستاهل التثبيت بجداررره

[آمل..~]

يسعد قلبك على النصائح الرااااااائعه ياأموله من جد موضوع قمه في الروعه ونصائح أحلى وأحلى يعطيكي ألف عاافيه على الموضوع المتعب فيه من جد وترى ثلث الكلام هدا أنا كمان أعمله قبل الاختبارات وكويس أستفتدت منك كثيير يعني جاري على المكتبه >>>>>>> والله يديكي على قد نيتك ياقلبي ويسعدني أكون أول وحده مرت وقرت كلامك الحلو الله لا يحرمنا منك تحياتي لقلـبك

آهلين خيتوو نووورتي

الرووعه حضورك وتواجدك اختي منورة الموضوع بطلتك وردك العطر

الله يعافيك ياارب <<من جد ياليت نطبقها من الحين من البداية عشان ما نتعب بعدين