اقتصادي باقي له سنه وتوهق

[اقتصادي غلبان]

السلام عليكم يا حبايبي اعضاء المنتدى
السالفه ومافيها اني حصلت عدد من المواد الحره والاختياريه نازله لي لما فتحت خيار الحذف والاضافه لكني ما اعرف وش الماده السهله اللي ممكن انزلها يعني مثلاً دورت مادة علاقات عامه وماحصلتها لقيت اداره محليه بس حصلت مواضيع كثيره هنا يذمونها وبرضو محسوبكم غشيم في سالفة اختيار الشعب ومعرفة او تحديد الدكتور يعني اذا ممكن احد يفيدني في سالفة المواد كذلك موضوع اختيار الشعبه والدكتور
شاكر لكم سلفاً حسن تعاونكم الغير مستغرب

[اقتصادي غلبان]

للرفع برجاء الافاده

[tagread]

للرفع

[اقتصادي غلبان]

للرفع للأهميه

[اقتصادي غلبان]

بديت ارضخ لواقع انه محد بيرد علي لكن للرفع برضو

[Francesco82]

السلام عليكم ورحمه الله وبركاته ...
بعد التحية عزيزي اقتصادي غلبان شلونك يالغالي انا بصراحة شفت استفسارك وحاب اعطيك اللي عندي لاني قبل اسبوعين كنت حايس مثلك وكتبت موضوع عاجل بخصوص مادة إدارة العلاقات العامة على اساس اني ابيها مادة حرة وبعد عدة محاولات وردود على نفسي ردوا علي اختين الله يجزاهم الف خير ووضحوا لي الاشكال ووجهوني يا اني اكتب معاملة الكترونية او اني اروح لهم وانا سويت الطريقتين كتبت معاملة الكترونية ووضحت لهم اني ابي اضيف مادة pad461 العلاقات العامة لكن كان ردهم مخيب للآمال وقالو ان المادة هذي تتعارض مع جدول اختباراتك عموما قلت مالي غير ان اروح لهم واشوف ايش الحكاية روحت لشؤون الانتساب وقالوا لي روح لكلية الاقتصاد والادارة وفعلا روحت وتفاجأت بان كان ردهم ان المادة الترم هذا ماهي نازلة في مواد الحذف والاضافة وراح تكون موجودة في الترم الثاني وانا مستغرب وقالي احد الاخوان في نفس الكلية دايما مادة العلاقات العامة في الترم الاول لطلاب ادارة الاعمال ما تكون موجودة اذا تبغى تنزلها انتظر للترم الثاني راح تكون دايركت نازلة في مواد الحذف والاضافة هذا بالنسبة لمادة العلاقات العامة.
وبالنسبة pad341 الادارة المحلية اذا كان عندك استعداد للحفظ فا المادة راح تكون جدا سهلة مع اني انا ما نزلتها لانها بصراحة عن قناعة في نفسي لما قريت الكتاب حقها >>>طبعه مصرية متعقد من مادة السلوك الانساني في المنظمات ما عجبتني بصراحة لانها تعتمد على حفظ المادة رقم كذا تقول كذا وكانك قاعد تدرس قانون , بالعكس تمام راح نظري اكثر اني انزل مادة مبادئ القانون bl101 كمادة اختيارية بصراحة مادة حلوة وما هي ملخبطة واذا تبي تنزل مادة اختيارية ثانية انصحك بمادة pad101 مادة حلوة تتكلم عن الادارة العامة ولعلمك الاثنين لها ملخص لهاني عرب والمفردات المقررة عليك تماما متطابقة .
اما بالنسبة للمواد الحرة فانا عن نفسي اخذت معايا الان مادة في الترم هذا اسمها com204 الرأي العام وطرق قياسه كتاب للدكتور /عاطف عدلي العبد طبعه مصرية صح لكن فيه ترتيب احسن من غيره 2010م تحصله في مكتبة خوارزم العلمية انا اخذته يوم الاربعاء اللي راح جديد بقراطيسه وابشرك بعد الكتاب اغلبه نماذج استقصاء للرأي العام والمادة من خلال قراءتي لها السريعة سهلة زي العلاقات العامة ولعلمك طابقت المفردات المقررة بمذكرة لاحد الاخوان اسمه ابو جاسم موجودة في موقعنا الغالي منتديات طلاب وطالبات جامعة الملك عبدالعزيز وحصلتها مطابقة تماما لها وان شاء الله انها تغني عن الكتاب لو ما عجبك والمذكرة مكونة من 46 صفحة وان شاء الله اكون افدتك عزيزي واي سؤال احنا حاضرين وسلام يالغالي.

[بنت الخليج..]

نصيحة لاتأخذ إدارة محلية أنا أخذتها اختياري المستوى اللي طاف وتوهقت فيها بس الحمد لله أزمة وعدت..
تحيااتي،،

[اقتصادي غلبان]

اخويFrancesco82 تسلم وماقصرت على تعاونك لكن المشكله اللي عندي هي ان المواد اللي ابيها مو نازله لي في خيار الحذف والاضافه وبالنسبه لمادة القانون والاداره العامه فهذي سبق اني اخذتها في اترام سابقه والترم هذا عندي ماده اختياريه مو حره يعني محتار مابين اداره محليه او سلوك مستهلكbus311 وان شاء الله الترم الجاي نسألك عن مادة الرأي العام وزي ماقلت لك وضعي الحين مابين هالمادتين أعلاه واذا كان عندك خبر عنها فياليت تفيدني وكنت اتمنى اني في جده عشان اروح وارتب وضعي لكن في الرياض ومالنا حيله الا عن طريق هالنت


اختي بنت الخليج مشكوره عالنصيحه وماقصرتي مع اني اتوقع هالماده فيني فيني وعلى قولتهم هي احسن الاسوأ

[Francesco82]

بسم الله الرحمن الرحيم

السلام عليكم ورحمه الله وبركاته ... بعد التحية عزيزي اقتصادي
انا مقدر وضعك والحال اللي انت فيه هالحين بالنسبة للخيارين اللي وضعته انت بين مادتين الادارة المحلية pad341 و سلوك المستهلك bus311 انا زي ما سبق وقلتلك بالنسبة للادارة المحلية بصراحة توهق لاني بخصوص موضوعك هذا اتصلت على احد الزملاء وسألته على هذه المادة سبق واخذها وبصراحة ما مدح لي فيها , بس صدقيني كل واحد وله قدرات يمكن انت تمشي معاك لكن برضو السؤال واجب وزي ما تفضلت الاخت بنت الخليج وقالت لك انها شوية معقدة .
نجي للمادة الثانية اللي هي سلوك المستهلك ويا عيني على هالمادة والله انها اسهل مادة بعد ps101 بصراحة هذه المادة اخذتها مع الدكتور/ياسر عبدالحميد الخطيب وعن جد كانت اسئلته حلوة ومافيها صعوبة لان اصلا المادة سهلة وحلوة تتكلم عن سلوك المستهلك والقرارات الشرائية للمستهلك والعوامل السيكولوجية والبيئة الاجتماعية والثقافية المؤثرة في المستهلك طبعا الكتاب يحتوي على ثلاثة ابواب الباب الأول:سلوك المستهلك والقرارات الشرائية... وهذا الباب زي ما تفضل الدكتور مجرد قراءة سريعة تفهم منها المغزى بالنسبة للباب الثاني:العوامل السيكولوجية المؤثرة في سلوك المستهلك تتكون من اربعة عناصر الدوافع والإدراك والتعلم والاتجاهات وهذا الباب الاختبار كله جاء منه لانه جدا مهم فاذا استعنت بالله واخذتها لازم تركز على هذا الباب وتحفظه زي اسمك نجي للباب الثالث:البيئة الاجتماعية والثقافية المؤثرة في سلوك المستهلك وتتكون من ثلاثة فصول الثقافة والطبقات الاجتماعية والجماعات المرجعية ويعتبر هذا الباب من اسهل الابواب في المادة لانها اشياء ملموسة في الواقع اللي تعيشه, عموما اخوي اقتصادي قبل ما تفكر تاخذ المادة هذه لازم تقرأ الكتاب عشان نفسيا ترتاح لها وتشوف اذا دشت رأسك او عندك خيار ثاني تختار فيه مادة غيرها وهذا الشيء راجع لك وانت اللي في الاخير تقرر , انا عن نفسي لما اجي اخذ مادة واسأل عليها اول شيء اشوف اذا المادة هذه مرتاح لها نفسيا وسهلة الفهم والحفظ وبعد كذا اترك الباقي على ربي.

أتمنى اني اكون افدتك اخوي اقتصادي واي استفسار على اي مادة احنا حاضرين

نشوف على خير اخوي وفي حفظ الله تعالى

[اقتصادي غلبان]

اخوي Francesco82 مشكور وماقصرت شكلي بستخير وبنزل مادة سلوك مستهلك وان شاءالله انها تكون خيره
وعلى طاري الدكتور كيف اقدر اختار الدكتور اللي ابيه او هذا شي خاص بحقين الانتظام لأني مره حاولت ودخلت نظام الشعب طلب مني السنه ورقم الماده بعدين طلع لي جدول فيه ارقام لكن عند خانة اسم الاستاذ كان الحقل حقها فاضي فما ادري هل لها طريقه معينه وانا ماعرفتها
شاكر لك اخوي تعاونك ويعطيك الف عافيه
تحياتي ..اخوك