الحمد لله تخرجنا .. وهذي قصة مشواري

[عازف الروح]

السلام عليكم ورحمة الله وبركاته

الحمد لله رب العالمين
اليوم بفضل من الله نزلت اخر نتيجه لي في الجامعه فن الاقناع
وبها الماده اكون انهيت دراستي الجامعية وتخرجت ولله الحمد والمنه

اولا شكر خاص لاخواني واصدقائي في حلي وترحالي وفي شقة الحرية
سلطان بن عبدالعزيز ( ابو تالين )
وابو ريتال ( بيبو )
وابو لارا ( ABUSHOOOG )


واقول الله يعينكم الترم الجاي دورو لكم رابع يكمل لكم البلوت
لاني من الحين ما اعرفكم والوجه من الوجه ابيض << سحب عليهم
تراامزح الا والله احس اني ابفقد هالايام .. ويا زينها من ايام
وشكر خاص لجميع الاعضاء بلا استثناء
اللي لو ذكرتهم يبيلي صفحات .. ما شاء الله الكل متعاون والكل في خدمة الجميع وهذي نقطه لمستها في الكثيرين ما شاء الله تبارك الله .. الله لا يغير عليكم

...........................
الفشل -- هو الطريق الى النجاح
والفشل - هو نقطة الانطلاق
وهذه المقوله صحيحه
وانا ابقول سالفتي مع الجامعه ليستفيد منها الجميع ..
لكل انسان عدو لدود
يختلف بطبيعته
لكن احنا يالطلاب نتفق على عدو واحد
اللي هو هذا


طبعا اخوكم دفعة 06
عدد مرات ابو جلمبو : 7 مرات خلال مشواري الدراسي
اربع منهم في ترم واحد
اللي هو الترم الثالث
وسبب دمار شامل للمعدل
صار المعدل 1.55
يعني احباط ما بعده احبااط
قلبتها يمين
قلبتها يساار
والكثير صار لهم مثل هالموقف
وقررو ترك الجامعه .. وهذا خطا .. وخطا كبير
الاستسلام مو لنا .. وحنا لها
والانسان لابد يثق في قدراته ولا يحط الاساتذه وطريقة الاسألة شماعه
المسألة يبيلها شوية جهد وتركيز
لا حياة مع اليأس
ولا يأس مع الحياة

المهم وقتها لقيت ان النجاح له طعم اروع بعد الفشل
وصرت اكثر عزيمه واكثر حرص وحطيت نفسي امام تحدي ولا بد لما تتحدا تكون قدها
وبدت مرحلة رفع المعدل
وانهاء الانذار بالفصل
الحمد لله في الترم الرابع تم رفع المعدل الى 2.04
يعني راح الانذار في ترم واحد
وهذا كله بفضل الله ثم العزيمه والاصرار
الان انتهينا من الانذار
باقي النقطه الثانيه
المعدل ...
لان حرام تكر بالجامعه وفي النهايه تتخرج بمقبول والمقبول للاسف عارفين وضعه
...................
بديت ارفع المعدل نقطه نقطه
الى ان وصل الترم الماضي الى 2.58
والجيد يحتاج الى 2.75

والمعدل في الفصل الاخير ثقيل .. يالله يتحرك وهالنقطه يعرفونها الخريجين
من نهاية الترم الماضي
حطيت قدامي هدف .. اني ابجيب الـ 2.75 باذن الله ابجيبها

ومع بداية الترم بديت اوزع جدولي
وللامانه من الترم الماضي وانا حريص اني اخلص كل المواد الاساسية خصوصا الصعبه منها
بحيث ان الترم الاخير يكون للمواد الحره والاختياريه والبحث والتدريب
وهذي نقطه ليت الاخوه يحطونها في بالهم
لا تأجل المواد اكثر من اللازم
حاول الترم اللي قبل الاخير تنتهي من جميع المواد الصعبه ولا تأجلها لترم التخرج
خل الترم الاخير تهيئ نفسك للتخرج وتكون اكثر اريحيه
لان المواد الصعبه تخليك تحت ضغوط نفسيه ممكن تحملها وممكن لا
والكثير عانو من الشي هذا ووممكن الاخوان الخريجين يفيدونكم بها النقطه بعد

المهم انه كان متبقي لي 17 ساعه على التخرج
وانا لحرصي على رفع المعدل ... نزلت 20 ساعه
يعني نزلت ماده زياده ..
يعني بالعربي اي ماده بتنزلها زياده وتحس انك بتجيب درجه حلوه نزلها وتوكل على الله اذا معدلك نازل فلها دور في رفع المعدل اذا جبت فيها درجه حلوه
وها النقطه يمكن يجهلها الكثيرين لانه يبي يتخرج بعدد ساعات التخرج وبس ما يبي زياده
حتى لو كان تخرجه بتقدير مقبول
والحمد لله
بفضل من الله ومنته
تجاوزت الهدف
وحققت A و A+في معظم مواد الترم
وقفزت بالمعدل من 2.58
الى 2.84
يعني 26 نقطه اضيفت للمعدل التراكمي في الترم الاخير
وهذا كله بفضل الله .. والمذاكره والحرص وبفضل اعضاء المنتدى ايضا
يعني تبي ترفع معدلك .. ركز مع بداية الترم وصدقوني تقدرون
بالعربي المسأله كلها اسبوعين قبل الاختبارات تفرغ .. وصدقوني راح تفكرون بتقدير ممتاز وجيد جدا
طبعا كلامي هذا للمحبطين اللي اشوفهم بازدياد للاسف ..
اما ما شاء الله فيه ناس معدلاتهم ثابته من 4 وفووق الله لا يضرهم

نقاط مهمه ..

رتب جدولك دائما واعرف موادك قبل اضافتها ( بمعنى اعرف طبيعة الماده وخذ فكره عنها )
دائما ابحث عن دكتور الماده قبل الماده نفسها .. فهناك اساتذه يعتبرون ( لُقطه )
حاول التخلص من المواد الصعبه وعدم تأجيلها اكثر من اللازم ( السبب انك ترتاح وتفكر برفع المعدل بجديه )
اذا معدلك اقل من 2 ابحث عن المواد الأسهل فقط حتى لو كانت 3 مواد فهي كافيه لرفع المعدل بشرط ان لا يكون الهدف هو النجاح بل يكون الهدف جيد جدا فما فوق في هذا الترم
اذا لقيت اسأله سابقه بالموقع .. لا تعتمد على الحلول الموجوده فيها نهائيا
بل حلها بنفسك .. لان الكثير من الاسئلة فيها اخطاء لربما تؤدي الى الرسوب للاسف ( خذ المعلومه من المصدر اللي هو الكتاب ولا تاخذها من اوراق الاسئلة المتداوله )

بالتوفيق للجميع

ادري طولت عليكم
بس حبيت اقولكم مشواري اللي احس اني ابي اكتب صفحاااات عنه واحس رغم هالكلام اللي كتبته اني اختصرت الشي الكثير .. ولكن اتمنى يكون فيها فايده

وبالتوفيق للجميع

يالله الحين نستقبل التهانــي بالتخرج
اللهم لك الحمد حتى ترضى ... ولك الحمد اذا رضيت ... ولك الحمد بعد الرضا

[فهد العنزان]

الف الف مبروك ومشاء الله قصة نجاح مفيدة

موفق أخوي

[عازف الروح]

ما شاء الله على الردود والحماس من الاخوان
واسف يا اخوان .. تأخرت عليكم
بس اعذروني الدكتور مانعني من الاوديوس من كثر ما وجهي ناشب فيه الى طلعت النتايج

وابجي لردودكم واحد واحد

المشاركة الأصلية كتبت بواسطة فهد العنزان الف الف مبروك ومشاء الله قصة نجاح مفيدة موفق أخوي

هلا بك اخوي فهد
الله يبارك في ايام يالغالي وعقبال ما نشوفكم خريجين ان شاء الله

بالتوفيق

[اسيــر عيــونها]

الف مليووووووون مبروووووووك
ماشاء الله تبارك الله
بصراحة قصة كفاح رائعة تستاهل ياااابطل

[عازف الروح]

المشاركة الأصلية كتبت بواسطة اسيــر عيــونها الف مليووووووون مبروووووووك ماشاء الله تبارك الله بصراحة قصة كفاح رائعة تستاهل ياااابطل

اسير عيونها

الله يبااارك في اياامك يالغالي

تسلم يا بعدي

والف شكر لك

[ITUNE]

الأخ /فهد
لو تكرمت أحتاج أتواصل معك لأن تخصصي نفس تخصصك بإذن الله وعندي أسئلة محيرتني الله يوفقك
شكراً

[Hard 2 Reach]

مليووووووووووووووووووووون تريليوووووووووووووووووووووووووووووووون مبرووووووووووووووووووووووك

يا عازف والله فرحت لك من قلبي تستاهل كل خير والله يوفقك في حياتك الدنيا والاخره

وعقبالنا يا رب

[عازف الروح]

المشاركة الأصلية كتبت بواسطة hard 2 reach مليووووووووووووووووووووون تريليوووووووووووووووووووووووووووووووون مبرووووووووووووووووووووووك يا عازف والله فرحت لك من قلبي تستاهل كل خير والله يوفقك في حياتك الدنيا والاخره وعقبالنا يا رب

هلا حبيب قلبي هارد تو ريتش
الله يباارك في اياامك .. والله يوفقك يارب وين ما كنت
وعقبااالك ان شاء الله نشووفك خريج فووق بالعلاااالي

يالله بالتوفيق

[المحافظ]

الف الف مبررروك اخوي عازف....من جد العزيمه والاصرار هي بوابه النجاح والوصول للهدف
يالله عقبال الماجستير والدكتوراه

انت سويت فيني معروف ما انساه وافدتني بشكل كبير بماده تقييم البرامج الحكوميه لانها كانت بعبع فشكرا لك وتستاهل كل خير

[haneo10]

الف الف مبروك التخرج وشكرا لما قدمته لطلاب المنتدى من نصائح وجزاك الله كل خير