Lesson 2: Using AED For Adults

[Dr.Passed]

السلام عليكم ورحمه الله وبركاته

كيف ان شالله الدرس الماضي كان حلو وبسيط..؟
دحين سرنا نعرف كيف نسوي CPR ومتى نطلب المساعده عشان ماتطلع الضحيه تستهبل علينا وتجي الاسعاف و ماتلاقي شي عرفنا متى نوقف CPR و ايش هيا الاربعه حالات هادي

عرفنا كيف ندي breaths و compressions بصوره صحيحه
الكوعين لازم يكونو سيدا مستقيمين ما نتنيهم في ال compressions

وعرفنا انو الضحيه ماتتحرك من مكانها الا لو مكانها كان ( خطر) ولازم نبعدها زي في وسط الشارع مثلا...ايضا عرفنا متى نحط الضحيه في ال recovery position الي هيا وضعيه الافاقه ...وبرضو عرفنا الاسباب حقت ال cardiac arrest في الكبار انو سببها اغلب شي ال arrhythmia الي هيا عدم الانتظام في ضربات القلب
__________________________________________________

الان ان شالله حنتكلم عن كيف نستعمل ال AED

ال AED

اختصار لي ِAutomated External Defibrilator الي هوا جهاز مانع الرجفان

هادي صوره الجهاز ( الاحمر على يمين الضحيه )

كيفيه الاستعمال ...

بس زي ما سوينا المره الي فاتت..حاقلكم على كم حاجه قبل الفيديو

* اذا كان الضحيه عليها مويه ( غالبا لمن تكون الضحيه غرقانه) لازم نمسح المويه وننشفو كويس عشان ال AED محايشتغل اذا كان في مويه او الضحيه مبلوله...لابد ننشف

* لازم نتأكد انو محد حاطط يدو وقت مايشتغل الجهاز نجي نبا ندي الشوك على الضحيه عشان مانلاقي نفسنا مسدوحين جمب الضحيه لازم نقول بصوت عالي !!!Clear

* اذا كانت الضحيه نايمه على سطح مبلول زي مثلا خرجنا من مسبح لازم نشيلو ونغير المكان ونتأكد انو ناشف زي ما قلنا

* الجهاز حيدينا التعليمات وحيقلنا بالزبط ايش نسوي
* في اجهزه AED تشتغل لحالها اول ما تنفتح و في بعضها فيها زر لازم نضغطو
* مواقع الpads وكيف نحطها حتشوفوها في الفديو + كل جهاز AED يجي نفسهم ال pads الي تجي معا مرسوم عليها رسمه تقلكم فين تلصقوها

و الان حاوريكم هنا شوفو في الصوره دي كان عشان تعرفو فين تلصق دي

الان اتفضلو اتفرجو على الفيديو

فيديو تاني

طيب ....هادي اهم الاشياء في ال aed
الجهاز حيقلنا كل حاجه ...وايش نسوي

يعني لاتقلقو الجهاز اصلا بيوجهنا ايش نعمل

______________

طبعا لسا الدوره ما خلصت...باقيلنا CPR الاطفال وباقيلنا الغصه ( choking )في الكبار و الصغار

بس شوفولي كيف دحين ال CPR و ال AED معاكم ...في شي صعب؟ مو واضح؟ في اسئله؟

اتفضلو..واذا عجبكم و حسيتو انكم استدفدتو نكمل

و السيناريوهات اخليها عليكم دي المره ...كل شخص يحط سيناريو واحنا نجاوب..لسا انا ورايا الغصه و ال CPRالاطفال و الaed قاعده اشتغل عليهم..فا اتفضلو وضيفو اسئلتكم يخصوص الدرس دا او الدرس الماضي و احنا نتساعد ونحاول نجاوب على كل الاسئله =)

[(elaf)]

ماشالله مجهوود اكثررر من راااائع

الله يعطيك العافية ... وجزاك الله خير

[Dr.Passed]

المشاركة الأصلية كتبت بواسطة (elaf) ماشالله مجهوود اكثررر من راااائع الله يعطيك العافية ... وجزاك الله خير

الله يسلمك 3>

[كياني]

الله يعططييييييك العافييية '
الدرسسس جدا سسهل ومهم
كلو واضح بالنسبه لي ، جربت الخطوات نقلا عن الطرقق اللي ف الفيديوهات
امممم ، ماعندي سؤال ، كلو واضحح ^^

[Dr.Passed]

المشاركة الأصلية كتبت بواسطة كياني الله يعططييييييك العافييية ' الدرسسس جدا سسهل ومهم كلو واضح بالنسبه لي ، جربت الخطوات نقلا عن الطرقق اللي ف الفيديوهات امممم ، ماعندي سؤال ، كلو واضحح ^^

الله يخليكي =)
...طيب تمام الحمد لله

[اسرار علي]

يعطيك العافيه وربي يجعلها في موازين حسناتك ياارب افدتنا كثيررر ومجهود عظيمممممم الف شكرر

[Feras L. Kindi]

دروس رائعة صراحة ومن جدت اتحمست اكثر للكلية !!
حتى مستعد أروح اشتري العدة والـaed وأخليه معايا بالسيارة... بس ماقد شفت واحد مغمى عليه او شي من هذا القبيل ... بس شفت واحد مقتول برصاصة وفات الآوان ><"

يعطيك العافيا وبانتظار الباقي :)

[Dr.Passed]

المشاركة الأصلية كتبت بواسطة feras l. Kindi دروس رائعة صراحة ومن جدت اتحمست اكثر للكلية !! حتى مستعد أروح اشتري العدة والـaed وأخليه معايا بالسيارة... بس ماقد شفت واحد مغمى عليه او شي من هذا القبيل ... بس شفت واحد مقتول برصاصة وفات الآوان ><" يعطيك العافيا وبانتظار الباقي :)

ايوا روح اشتري و خليها في السياره احتياط والله من جد...عشان الطوارئ بس

دكتور بالنسبة للدرس الماضي انت سألت سؤال مهم اذا ماشفت اجابتو ياريت تروح تشوفها

[Feras L. Kindi]

المشاركة الأصلية كتبت بواسطة dr.passed ايوا روح اشتري و خليها في السياره احتياط والله من جد...عشان الطوارئ بس دكتور بالنسبة للدرس الماضي انت سألت سؤال مهم اذا ماشفت اجابتو ياريت تروح تشوفها

طيب تعرفِ من وين وبكم يكون سعره؟


وبالنسبة للدرس الماضي أي نعم متابع الموضوع وشفت جواب السؤال جزاك الله خير .. حاولت اجربها فنفسي حسيت اني بكسر فكي .


طيب الحين في شي بسيط مافهمته .. لازم المريض يكون ناشف .. طيب هل لازم يكون ناشف فقط في مكان البادز ولا لازم جسمه؟

لأنه لو كان في بلل في رجوله او ساقه من العرق ماراح افسخ وانشفه .... وفي حال وجود مطر طبعًا حيكون مبتل تماما فهل فقط مكان البادز ولا ماراح ينفع اساسا؟ << طبعًا بعد أخذه إلى مكان ناشف مافيه مطر.

[Dr.Passed]

المشاركة الأصلية كتبت بواسطة feras l. Kindi طيب تعرفِ من وين وبكم يكون سعره؟ وبالنسبة للدرس الماضي أي نعم متابع الموضوع وشفت جواب السؤال جزاك الله خير .. حاولت اجربها فنفسي حسيت اني بكسر فكي . طيب الحين في شي بسيط مافهمته .. لازم المريض يكون ناشف .. طيب هل لازم يكون ناشف فقط في مكان البادز ولا لازم جسمه؟ لأنه لو كان في بلل في رجوله او ساقه من العرق ماراح افسخ وانشفه .... وفي حال وجود مطر طبعًا حيكون مبتل تماما فهل فقط مكان البادز ولا ماراح ينفع اساسا؟ << طبعًا بعد أخذه إلى مكان ناشف مافيه مطر.

سعره يتراوح من 200 الى 5000

تلاقي عادة في المحلات الطبيه

--------------

شوف بالنسبة للرجول هوا على بال ماتقعد تنشفلو وتليفلو في رجولو يكون مات و شبع موت كمان فا بليز سيب رجولو في حالها و سوي ال cpr وحطلو ال aed

مافي مشكله الرجول بعيده إحنا ننشف الي نقدر عليه عشان توصلو الكهربه ( منطقه الصدر غالبا ) نحرص انها تكون ناشفه...وانو طبعا اذا كان على سطح مبلل نغير المكان ونشيلو مكان ناشف