حدث اليوم بالقصيم "ورقة الإجابة" كومنكيشن 463 ضاعت

[طارق الرايق]

إذا فيكم أحد يذكرني انا الي العام الماضي سوو معي تحقيق وأنا أختبر بيتأكدون من هويتي، لأن صورة البطاقة حقتهم منمسحه شوي، ورجوني رج بعد التحقيق الطويل ...... رجعت وكملت اختباري

اليوم الخميس في اختبار الفترة الاولى في اختبار حالات متقدمة جيت قبل الوقت بربع ساعة مذاكر ومعيـ(ن) خير، وجلست بالقاعة، وبعد توزيع ورقة الاجابة والأسئلة حليت، وابشركم خلصت أول واحد، وقعت على ورقة حضور الامتحان، كالعادة وكالمتبع سلمت الورقة وطلعت.
كان عندي عطل بسيط بالسيارة ( وأنا على فكرة مواصل ) بس قلت اليوم خميس وفرصة الورش فاضية، رحت للوكالة واشتريت القطعة ورحت للورشة، فجأة جوالي رن الساعة 8:30 ...
المتصل: س ع
أنا : ع س
المتصل : معك الدكتور ...............
أنا : يا مرحبا، هلا دكتور
الدكتور : ممكن ترجع يا أبني لقاعة الامتحان
أنا : خير يا دكتور
الدكتور : لا يا أبني شغلة بسيطة محتاجينك بس تعال بسرعة
أنا : خير إن شاء الله "مسافة السكة وهكون عندك"
وأنا راجع اتصل الدكتور مرة ثانية وحرصني أجي بسرعة.!! عاد كل علامات التعجب والاستفاهم الي بالدنيا جت فوق راسي، ليش ..؟ وكيف جابو رقم جوالي بالسرعة هذي..؟
أنا بيني وبينكم ارتبكت وأنا ما سويت شي، لكن اسلوب الدكتور يذكرني بأسلوب الي يقول "فلان قريبك صار عليه حادث وما فيه شيء.. بس انه توفى الله يرحمه"
رجعت للقاعة، وكانت الاخبار السيئة بانتظاري، قابلني الدكتور في مدخل القاعة وبابتسامة عريضة بعد مصافحة حارة، وبلهجة حجازية لذيذة " ورقت الاجابة حقتك ضاعت" عاد أنا قلت "أيش الهرجة"
كيف يادكتور ضاعت...؟ قال دورناها ومالقيناها.. تعال هنا هذي ورقة جديدة بس ضلل من جديد.. ههههههههههه
عاد قلت وبالبساطة هذي يا دكتور أنا مرتبك الحين، ولسا طالع من اختبار وأرجع ثانية أختبر من جديد ولسا أنا جاي من ورش، وأنا غير مهيأ نفسياً للاختبار، قال "الله يعينك تروح تختبر في جدة" قلت ما عندي مشكلة ولا اختبر الحين.
يوم شافني جازم قال يا ولدي تروح تتغرب على شان اختبار مادة وحدة، صلي على النبي واختبر الحين، قلت يا دكتور انت رجل اكاديمي وتعرف أني غير مهيأ للأختبار ومرتبك، من أسلوبكم معي، ما عطيتوني مبرر مقنع، او علمتوني وش حقوقي الي أقدر اسويها إذا ضاعت ورقة الامتحان وعلى حسب معلوماتي أني أخذ فل ماركت، أنا مالي ذنب، عاد أنا ما حبيت أطول الموضوع، وحسيت أني بسوي أحراج للرجل الفاضل هذا، مهما كان هو بمثابة والدي علاوة على ذلك رجل متعلم واكاديمي ربى اجيال، وهو من خيرة الناس هكذا احسبه والله حسيبه، قلت يا ولد اعتبرها فزعة، قلت يا دكتور بس بريح نصف ساعة عندكم هنا، قال ما عندك مشكلة وضيفني على فطور وكفي، وبعدها راجعت شوي ورجعت اختبرت، لكن الاول افضل بكثير، رغم اني ذاكرت الاسئلة الي قريتها.
هذي قصتي اليوم، والله يستر من الثالثة لا تكون طي قيد وما بقى لنا أخر مستوى .
بخصوص الاختبار، انا فقرة "ب" جاب 6 أو 7 أسئلة عن دراسة الحالة وكلمات الانقليزي انا ماركزت عليها جاب لنا منها أسماء ومعاني 6 أو سبع وجاب لنا عن الإعلان التجاري
وفقرة 29 تكملتها 30

[hi4rose]

الله المستعان قدر الله وماشاء فعل
الله يوفقك اخي الكريم ولا يضيع لك تعب

[زحمة مشآعر]

عشت تفاصيل القصة وبيني وبينك لو الدكتور داق علي يمكن اسحب عليه .. ياخي ماتخيل دكتور يدق علي يقول تعال هههههههه بقول له انا مسافر ياطويل العمر ..

بصراحة ماحصل لك اليوم شي غريب ولعلها خيره ولكن السؤال هنا ؟
وين ضاعت ورقتك وكيف بالبساطه هذي تضيع ؟؟ ومن المسؤول عن ضياعها .. وهل سيحاسب من تسبب في ضياع الورقه ؟؟؟؟؟؟؟؟

[Fayiz]

أضحكتني أضحك الله سنك يا رجل
دمعت عيوني من الضحك ....
لازم هالموقف يوصل لأحد كتاب الأعمدة في الصحف.. شرايك في خلف الحربي!!
ههههههه

[فاصل نهائي]

هههه شر البليه مايضحك
خوفتنا ياخي شكلي اباخذ معي نموذج تسليم الاجابات !!

عموما الله يعوضك خير والله يكتبلك التخرج بسهوله ويسر

[st444]

اشك ان في حاجه غير واضحه

[طارق الرايق]

المشاركة الأصلية كتبت بواسطة fayiz أضحكتني أضحك الله سنك يا رجل دمعت عيوني من الضحك .... لازم هالموقف يوصل لأحد كتاب الأعمدة في الصحف.. شرايك في خلف الحربي!! ههههههه

اتوقع لو تسويه يا فايز سيانريو وتعطيه سميك فايز المالكي ضبطه حلقه برمضان

[طارق الرايق]

المشاركة الأصلية كتبت بواسطة فاصل نهائي هههه شر البليه مايضحك خوفتنا ياخي شكلي اباخذ معي نموذج تسليم الاجابات !! عموما الله يعوضك خير والله يكتبلك التخرج بسهوله ويسر

كل واحد ياخذ باله من "لغليغه" لو الدكتور ضيع "لغلوغك" أنا غير مسئول

واقترح كل طالب يا خذ معه للامتحان ورقة تعهد للمراقب، ويكتب فيها أنا غير مسئول عن ضياع ورقة اجابتي ولن أعيد الامتحان.

[طارق الرايق]

المشاركة الأصلية كتبت بواسطة st444 اشك ان في حاجه غير واضحه

نورنا (طال عمرك)

[إعلامي المستقبل]

ربما علموا بفكاهتك

فأحبوا أن يمازحوك بهذا الموقف :)


والله يجعل الأختبار الثاني خير .. موفق يا بطل