نقاش في اسلوب المعامل الدراسية ......

[وسام الامان]

السلام عليكم ورحمة الله وبركاته

اهلين وسهلين كيفكم الله يوفقكم بالامتحانات يااااارب

انا طالبة بيوكمستري وبقي سنة واتخرج بإذن الله ,, وياليتني اتكلمت في هذا الموضوع من اول
من يوم ما اتخصصت وهو المعامل الدراسية وطريقة اعطائها خصوصا معامل الكيمياء والكيميا الحيوية ,حاسة اني ح اتخرج ومو فاهمة المعامل كويس,ما تلاحظون ان في مشكلة مدري هو من نفس الاستاذة ولا من المعامل نفسها .انا رح اعطيكم ملحوظاتي على المعامل واحكموا عاد بأرائكم ووجهات نظركم وحلولكم اذاكنتم موافقيني
بسم الله الرحمن الرحيم
اولا .. الكم الهائل من الطالبات في المعمل لدرجة تعيق استعياب شرح المعمل وتربك حركة البنات وتزاحم الطالبات عند دولاب الغازات وكانهم واقفين قدام مقصف ههههه>سوري ع الكلمة بس والله من قهري على انفسنا بكتب كذا ,, وكم مرة تصير مشاكل زي مثلا طالبة تأذي طالبة بدون قصد فتكب عليها محلول او حمض بسبب التجمهر هذا
ثانيا .. وقت المعامل لاخر الدوام وطولها والبنات اصلا يجون منتهين ومو مستوعبين يقعدون 3 ساعات وبس يبغوا يخلصوا من الشغل عشان يخرجوا .
ثالثا ..اكتفاء بعض الاستاذات بالشرح فقط دون العمل ..يعني الاستاذة لما تشرح ويجي وقت الشغل انا اشوف ان المفروض هي تشتغل واحنا نشتغل معها لان هذه الطريقة تخلي الواحد يستوعب اكثر ويخرج من المعمل وهو خلاص راكز في مخه اما انها تشرح وخاصة يكون المعمل طويل وصعب وخلاص تكتفي والبنات وقت الشغل يحتاسوا ويرتبكوا ,فانا اشوف هذه الطريقة تنفع خصوصا في المستويات الاولى عشان ع الاقل يتثبت

رابعا ...نقص المعدات ,وهذه كثير حصلت والنتيجة ان الوقت يضيع

خامسا .بعض الاستاذات يلزمون الطالبات يتقسمون قروبات توصل ان الجروب يكون فيه 5 طالبات وعلى معامل ماتستاهل هذا العدد ,هذه الطريقة ليست ناجحة صح ان المشاركة حلوة وتسهل لكن مو في اي شي و لان بكثرة عدد الطالبات في المجموعة الواحدة تصعب الاستعياب للشغل ويكون غير متكافيء فوحدة او اثنين يشتغلوا والبقية يتفرجون , اما ان يكون المجموعة مكونة من طالبتين فهذا احسن اختيار

والله الامور هذه تحسسنا ان المعامل بدل من انها تكون احسن من المحاضرة لانها تطبيق عملي لا صار المعمل هم ع القلب وكل وحدة تبغى تخلص الشغل بسرعة عشان تفتك لو انحلت مشاكل المعامل هذه رح تكون وقت المعامل من احلى الاوقات والمناظر اللي نشوفها دايما مثل (تذمر الطالبات والملل الطبيعي الي يعتريهم بسبب وقت المعمل وطوله او الاسلوب الجاف لبعض الاستاذات وتصعيبها للمعمل كل هذه رح تختفي لو اعطيت المعامل بأسلوب سلس ومريح

هذا رايي ووجهة نظري اتمنى انهم ينظروا للموضوع بعين الاعتبار
موفقين لك تحياتي

سبحان الله العظيم وبحمده